Read Fulfulde Yeremiya 52 Bible Online

Yeremiya 52 - Fulfulde bible

Yeremiya 52

¹Sedekiya woodi duuɓi noogas e go'o, saa'i o laamo. O laami haa Urusaliima duuɓi sappo e go'o. Innde daada maako Hamutal ɓii Yeremiya mo Libna.

²O waɗi kalluɗum yeeso Jawmiraawo, kal-kal bana Yooyakim waɗno.

³Ɗum waɗi non ngam Jawmiraawo tikkani Urusaliima e Yahuuda haa o riiwi ɓe daayiiɗum bee maako. Sedekiya boo tuurtani laamiiɗo Baabila.

⁴Nder nduuɓu laamu Sedekiya njoweenayaɓu, nder lewru sappooru, nyalaade sappo maaru, Nabukodonosor wardi bee jama'aare konu muuɗum fuu, ɓe mbaɗi saŋngeere maɓɓe yeeso berniwol, ɓe mbaagi lesdi, ɓe taari berniwol Urusaliima ngam hippaago ngol.

⁵Berniwol ngo'ol hippaama haa yotti nduuɓu laamiiɗo Sedekiya sappo e go'oowu.

⁶Nyannde joweenayaɓre nder lewru nayaɓru, weelo saatuŋgo waɗi nder berniwol. Ummaatoore walaa ko nyaame.

⁷Kaldiya'en cumpiti mahol berniwol. Nde jemma waɗi, jama'aare konu Yahuuda fuu doggi. Koo nde Kaldiya'en ɗon taari Urusaliima, ɓe caali gal dammugal gonŋgal hakkunde mahi ɗiɗi, ɗakki jarne laamiiɗo. Nden laamiiɗo Sedekiya tokki laawol gal waadiwol Urdun.

⁸Ammaa jama'aaje konu Kaldiya'en taasni mo, njokki mo haa yayre kommbi Yeriko. Jama'aare konu maako fuu saŋkiti, acci mo.

⁹Ɓe naŋngi laamiiɗo, ɓe njahri mo yeeso laamiiɗo Baabila, haa Ribla nder lesdi Hamat. Ton ɓe kiiti mo.

¹⁰Laamiiɗo Baabila umri hirsugo ɓiɓɓe Sedekiya yeeso maako. O umri hirsugo mawɓe Yahuuda boo.

¹¹Nden o umri ɓe ɗoofa gite Sedekiya, ɓe kaɓɓa mo bee callalluuji njamndi mboɗeeri. Ton Sedekiya jooɗi haa suudu daŋngay haa nyalaade nde o maayi.

¹²Nder nduuɓu laamu Nabukodonosor, laamiiɗo Baabila, sappo e njoweenayaɓu, nyannde sappoore maaru nder lewru jowaɓru, Nebuzaradan, hooreejo aynooɓe laamiiɗo Baabila nasti Urusaliima.

¹³O wuli haykaliiru Jawmiraawo e saare laamu e cuuɗi Urusaliima e cuuɗi mawɓe fuu.

¹⁴Jama'aare konu Kaldiya'en fuu e hooreejo aynooɓe ngibbini mahi taariiɗi Urusaliima.

¹⁵Yimɓe luttuɓe, waato laafuɓe e luttuɓe nder berniwol, hawtanɓe laamiiɗo Baabila e waɗooɓe sanaa'a luttuɓe, Nebuzaradan, hooreejo aynooɓe dahi ɓe.

¹⁶Ammaa o acci laafuɓe woɗɓe nder lesdi haa ɓe laato remooɓe inabooje e gese.

¹⁷Kaldiya'en pusi daŋraŋge njamndi mboɗeeri haa haykaliiru Jawmiraawo e jo'inirɗe e loonde njamndi mboɗeeri wonnde haa daldal haykaliiru Jawmiraawo, ɓe njahri kuuje ɗe njamndi mboɗeeri ɗe'e fuu haa Baabila[46].

¹⁸Ɓe kooci boo kuuje ɗe njamndi mboɗeeri kuuwtinirteeɗe ngam dewal, payanɗe ngam ndoondi, jarduɗe, ɓoftirɗe, laɓe e taasahoy.

¹⁹Hooreejo aynooɓe go hooci boo daarooje, pehe urnirɗe, taasaaje, payanɗe, jo'inirɗe pittirlaaji, jarduɗe, taasahon, kuuje kaŋŋeeri e cardi fuu.

²⁰Daŋraŋge ɗiɗi e loonde go bee ga'i sappo e ɗiɗi ɗi njamndi mboɗeeri les maaru e jo'inirɗe ɗe laamiiɗo Suleymaanu waɗno ngam haykaliiru Jawmiraawo, njamndi mboɗeeri kuuje ɗe'e fuu, goɗɗo waawataa awnugo ɗum.

²¹Towirka daŋraŋgal gootal waɗi meetir joweenayi. Ɓoggol ngol meetir joweego taaroto ngal. Ngal cookal, tekkirka njamndi maagal waɗi kooli nayi. Hoore njamndi mboɗeeri wonno dow maagal. Towirka hoore maagal waɗi meetir ɗiɗi bee reeta. Bamaaɗum e rummaanooje taari hoore man, ɗum fuu ɗum njamndi mboɗeeri. Bana non boo ngam daŋraŋgal feere bee rummaanooje muuɗum.

²³Haa bamaaɗum dow daŋraŋgal koo ngale, woodi rummaanooje cappanɗe joweenayi e joweego haa bakeeje fuu. Limgal rummaanooje taariiɗe ɗum fuu waɗi teemerre.

²⁴Nden hooreejo aynooɓe hoo'i Seraya, limanjo mawɗo e Sefaniya limanjo ɗiɗaɓo e aynooɓe dammuɗe tato.

²⁵Nder berniwol o hoo'i gooto nder saraaki'en maako kaliifaajo honooɓe e worɓe njoweeɗiɗo caka ɓurɓe ɓadaago bee laamiiɗo, tawaaɓe nder berniwol e binndoowo mawɗo konu, mo hoo'i yimɓe lesdi ngam jama'aare konu e worɓe cappanɗe njoweego nder yimɓe lesdi tawaaɓe nder berniwol.

²⁶Nebuzaradan, hooreejo aynooɓe hoo'i ɓe, yahri ɓe yeeso laamiiɗo Baabila haa Ribla.

²⁷Laamiiɗo Baabila umri ɓoccugo ɓe e mbarugo ɓe haa Ribla nder lesdi Hamat. Ton ɓe maayi. Bana nii yimɓe Yahuuda ndahira diga lesdi muuɗum'en.

²⁸Ndaa limgal yimɓe ɓe Nabukodonosor dahi: Nder nduuɓu laamu maako njoweeɗiɗaɓu, Yahuudu'en ujine tato e noogas e tato (3.023).

²⁹Nder nduuɓu maako sappo e njoweetataɓu, teemeɗɗe njoweetato e cappanɗe tato e ɗiɗo (832) diga Urusaliima.

³⁰Nder nduuɓu maako noogas e tataɓu boo, Nebuzaradan hooreejo aynooɓe Nabukodonosor dahi teemeɗɗe njoweeɗiɗo e cappanɗe nayo e njowo (745). Limgal dahaaɓe fuu waɗi ujine nayo e teemeɗɗe njoweego (4.600).

³¹Nder nduuɓu cappanɗe tati e njoweeɗiɗaɓu ɓaawo daheeki Yooyakin, laamiiɗo Yahuuda, nder lewru sappo e ɗiɗawru, nyannde maaru noogas e jowaɓre, Ewil-Merodak, laamiiɗo Baabila darjiɗini Yooyakin, o wurtini mo diga fursina. Ɗum nduuɓu ngu o heɓi laamu.

³²O mo'ani mo, o ɓaŋgti joonde maako dow joole laamiiɓe wonduɓe bee maako haa Baabila.

³³Ɓe ɓorti Yooyakin limce fursina. O nyaami haa taabal laamiiɗo balɗe maako fuu.

³⁴Nguure maako, nguure tabitiinde, laamiiɗo Baabila hokki mo nde nyalaade nyalaade, balɗe maako fuu.