Read Fulfulde Yeremiya 6 Bible Online

Yeremiya 6 - Fulfulde bible

Yeremiya 6

¹“Onon yimɓe Benyamin, ndogge, ngurte Urusaliima! Puufe luwal haa Teko'a, mbaɗe alaama konu haa Bayti-Kerem, ngam sarru e halkere naawnde ɗon ngara diga woyla.

²Urusaliima, berniwol booɗŋgol ɗelemŋgol, mi halkan ngol!

³Waynaaɓe ngaran haa maagol bee tokke muuɗum'en, taarnan ngol bee bukkaaji, koo moy duran haa nokkuure muuɗum.

⁴Cene ko'e mooɗon ngam haɓre bee maagol. Ummen, kippen ngol caka nyalawma! — Kayto! kiikiiɗe waɗi, ɗowdiiji ɗon njuuta. —

⁵Ngare, kippen ngol bee jemma, en kalka cuuɗi maagol booɗɗi.”

⁶Ndaa nii Jawmiraawo honooɓe asama wi'i: “Pe'e leɗɗe, mbaage lesdi kommbi mahol Urusaliima. Kaŋgol woni berniwol ke'uŋgol kiita. Ngol heewi ɓillaare.

⁷Bana ɓulndu ɓulnirta ndiyam muuɗum, bana non Urusaliima ɓulnirta halleende muuɗum. Hoolo toonyaare e halkere ɗon nder maagol, bone e kuuduuje ɗon yeeso am tum.

⁸An Urusaliima, jaɓ barruye! Ngam taa mi acce, taa mi wartire nokkuure ladde nde walaa jooɗiiɓe ton.”

⁹Ndaa nii Jawmiraawo honooɓe asama wi'i yam: “Mooɓtu luttuɓe Isra'iila bana goɗɗo mooɓtirta luttuɗe inabooje. Wallin juŋngo ma fahin haa lice bana ittoowo inabooje waarata.”

¹⁰Mi ƴami: “Moy mbolwananmi, moy ceedinanmi haa ɓe nana ɗum? Keefeeraaku maɓɓe haɗi ɓe nanugo. Wolde Jawmiraawo laatani ɓe huunde jalnaare, fottantaa ɓe.

¹¹Min boo mi heewi tikkere Jawmiraawo, mi somi naŋgtuɗo nde.” O umri yam: “Ruf nde dow ɓikkoy haa laabi, non dow mooɓe suka'en boo. Nde naŋngan worɓe e rewɓe, ndotti'en e ɗuuɗa-duuɓi'en fuu.

¹²Cuuɗi maɓɓe laatanto woɗɓe, non boo gese maɓɓe e rewɓe maɓɓe. Ngam mi fortan juŋngo am dow yimɓe lesdi ndi'i.” Non Jawmiraawo wi'i.

¹³“Ɓe fuu maɓɓe, mawɓe e leesɓe, ɗon ɗaɓɓa riba kalluka. Annabi'en e liman'en fuu ɗon mbaɗa rikici.

¹⁴Ɓe ɗon kurga kuuduuje ummaatoore am dow dow bee wi'ugo: Jam, jam koo ɗume! Asee boo jam woodaa!

¹⁵Kadi ɓe cemti ngam ɓe kuuwi nyidduɗum na? Aa'a, ɓe cemtaay, ɓe ngalaa semteende sam. Ngam maajum ɓe ndo'oto caka do'otooɓe. Saa'i mi hiitoto ɓe, ɓe njanan.” Non Jawmiraawo wi'i.

¹⁶Ndaa nii Jawmiraawo wi'i: “Ndare haa laabi, ndaare laabi ɓooymaaji, ƴame laawol ngole wooɗi, nden tokke ngol, haa on keɓa de'ere ngam yoŋkiiji mooɗon. Ammaa on njaabi: Min tokkataako ngol!

¹⁷Nden mi darni aynooɓe ngam mooɗon, ɓe mbi'i: Kakkilane hoolo luwal! Ammaa onon on mbi'i: Min kakkilantaa ɗum!

¹⁸Ngam maajum nane, onon ummaatooje! Annde, onon jama'aare, ko ɗon laatano yimɓe am!

¹⁹An lesdi, nan! Ndaa, mi ɗon yahra sarru dow ummaatoore nde'e, ɗum ngeenaari nufayeeje maɓɓe. Ngam ɓe kakkilanaay bolle am, ɓe njawi tawreeta am.

²⁰Mi ɗaɓɓataa uurdi lesdi Seba, koo ƴommbe uurɗe ɗe lesdi ndaayiindi. Guleteeɗi mooɗon pottantaa yam, kirseteeɗi mooɗon pottantaa yam.

²¹Ngam maajum min Jawmiraawo mi wi'i: Mi wallinan perge haa laawol ummaatoore nde'e, haa baabiraaɓe e ɓikkoy fuu pergo, haa keeddiɗɗiraawo e soobaajo mum maaya.”

²²Ndaa nii Jawmiraawo wi'i: “Ndaa, yimɓe ummaatoore ɗon ngara diga lesdi woyla, ummaatoore ɗuuɗnde ummi haa keeri duniyaaru.

²³Ɓe ɗon njogi lagaaje e labbe, ɓe saatuɓe, ɓe ngalaa enɗam. Daaɗe maɓɓe ɗon iida bana maayo maŋngo, ɓe wa'iiɓe pucci, ɓe taaski bana gorko gooto ngam haɓre bee maaɗa, Urusaliima!”

²⁴Yimɓe mbi'i: “Min nani habaru maɓɓe, juuɗe amin tampi, kulol naŋngi min bana luuwe naŋngirta ɓesnanɗo.

²⁵Taa ngurte haa ngesa, taa njehe haa laawol! Kaafahi konneejo ɗon ton, kultoreeŋgol ɗon bakeeje fuu!”

²⁶Ummaatoore am, hadda limce buhuuje[8], talla nder ndoondi, woy bana dow maayde bajjo, ummin bojji kaaɗɗi! Ngam bonnoowo ukkanto en bee juhuki!

²⁷Jawmiraawo wi'i yam: “Mi jo'ini ma a poondoowo yimɓe ummaatoore am ngam a heɓta, a foonda yahdu maɓɓe.

²⁸Ɓe fuu maɓɓe ɓe tuurtuɓe masin, ɓe nyo'ooɓe, ɓe saatuɓe bana njamndi mboɗeeri e ɓaleeri, ɓe fuu ɓe wonnooɓe.

²⁹Buubuuti kilaajo wifi bee semmbe ngam wurtingo tuundi njamndi bee yiite. Ammaa kuugal ɓolinoowo nafaay, o heɓaay wurtingo tuundi man.

³⁰Jonta innde maɓɓe laati cardi ngudinaandi, ngam min Jawmiraawo mi wudini ɓe.”