Read Fulfulde Yeremiya 8 Bible Online

Yeremiya 8 - Fulfulde bible

Yeremiya 8

¹Jawmiraawo wi'i: “Saa'i man ɓe ngurtinan i'e laamiiɓe e mawɓe Yahuuda nder genaale maɓɓe, non boo i'e liman'en e annabi'en e jooɗiiɓe haa Urusaliima.

²Ɓe mbaŋginan ɗe les naaŋge e lewru e koode asama. Kanjum, ɓe ngiɗno ɗum masin, ɓe ndewi ɗum, ɓe tokki ɗum, ɓe ɗakkotiri bee maajum, ɓe cujidani ɗum. I'e maɓɓe meetataa mooɓteego koo uweego, ammaa ɗe laatoto bana koonal dow lesdi.

³Luttuɓe yidere hallunde nde'e, jooɗiiɓe haa nokkuuje ɗe mi riiwi ɓe fuu, ngerdoto maayde dow ngeendam.” Non Jawmiraawo honooɓe asama wi'i.

⁴“An, yeccu ɓe: Ndaa nii Jawmiraawo wi'i: To goɗɗo do'ake, o ummataako na? To goɗɗo seli laawol, o lorataako na?

⁵Onon yimɓe ummaatoore am haa Urusaliima, koni on tuurtanto yam foroy? On ɗon tabiti nder pewe, on ɗon calo lortaago haa am.

⁶Mi heɗiti, mi nani, ammaa on mbolwaay gooŋga. Walaa koo gooto mooɗon mimsiti halleende muuɗum. Walaa koo gooto meeɗi wi'ugo: Kayya, ko mbaɗmi ɗo? Koo moy ɗon tokko laawol muuɗum, kal-kal bee puccu njaawananŋgu haɓre.

⁷Koo ngaasiyoowal boo anndi wakkati muuɗum. Poola e sonndu zawleeru e kumaarewal anndi wakkati loraaki muuɗum'en. Ammaa yimɓe ummaatoore am kam anndaa umrooje am.

⁸Noy mbi'roton: Min mari hakkiilo, tawreeta Jawmiraawo ɗon wondi bee amin! Ndaa, binndirɗi winndooɓe fewooɓe laatini ka fewre!

⁹Hikma'en mooɗon toskake, ɓe ɗon mbemmbo, ɓe naŋngaaɓe. Ɓe cali bolle am, hikma kaye ɓe mari jonta?

¹⁰Ngam maajum ndokkanmi rewɓe maɓɓe haa juuɗe woɗɓe, gese maɓɓe boo haa jawmiraaɓe woɗɓe. Koo moy maɓɓe, mawɗo e leesɗo fuu, ɗon ɗaɓɓa riba kalluka. Liman'en e annabi'en fuu ɓe ɗon mbaɗa rikici.

¹¹Ɓe ɗon kurga kuuduuje yimɓe am dow dow, ɓe ɗon mbi'a: Jam, jam koo ɗume! Asee boo jam woodaa!

¹²Kadi ɓe cemti ngam ɓe kuuwi nyidduɗum na? Aa'a, ɓe cemtaay, ɓe ngalaa semteende sam. Ngam maajum ɓe ndo'oto caka do'otooɓe. Saa'i mi hiitoto ɓe, ɓe njanan.” Non Jawmiraawo wi'i.

¹³“Mi nattinan ɓe. Ɓe laati bana inabohi ki walaa inabooje, bana ibbi ki walaa ibbe, koo haakooji boo ɗayli. Mi hokki ɓe haa saalotooɓe ton.”

¹⁴Yimɓe mbi'i: “Koni en ɗon njooɗi meere? Mooɓe haa en nasta berniiji cemmbiɗɗi, en kalka ton! Jawmiraawo Allah meeɗen ta'ani en kiita halkere, ɗon yarna en ndiyam mbaroojam, ngam en mbaɗi hakke dow maako.

¹⁵En tammino jam, ammaa hayru woodaa. En ɗonno ndeena wakkati nyawndeeki, ammaa kultoreeŋgol ukkani en.

¹⁶Haa berniwol Dan gonŋgol haa woyla en nani pucci konneejo ɗon pora. To pucci maako gorɗi ɗon kijo, lesdi fuu ɗon diwna. Ɗi ɗon ngara ngam halkugo lesdi e ko woni nder maari, berniwol meeɗen e jooɗiiɓe ton fuu.”

¹⁷Jawmiraawo wi'i: “Ndaa, mi nelan boɗɗe caka mooɗon, poosokje mbarooje ɗe pijirtaake, kanje ɗe coppoto on.”

¹⁸Bone am hurgataake, ɓernde am saklake.

¹⁹Ndaa, mi ɗon nana wookaandu ummaatoore am diga lesdi daayiindi: Jawmiraawo wurtake Siyona na? Laamiiɗo maako walaa ton na? Jawmiraawo ƴami: Koni ɓe tikkini yam bee suuraaji maɓɓe, labbi jananni meereeji?

²⁰Codol saali, dabbunde timmi, ammaa en kisaay!

²¹Ɓernde am naawnake, ngam ummaatoore am naawnaama. Mi ɗon woya, mi ɗon nder mettamɓeram.

²²Lekki woodaa haa lesdi Gile'at na? Walaa nyawndoowo ton na? Ngam ɗume ummaatoore am yamɗitaay?

²³Sey hoore am laato ndiyam, gite am boo ceeɓooje gonɗi, haa mi woya jemma e naaŋge fuu ngam mbaraaɓe ummaatoore am!