Read Fulfulde Yeremiya 9 Bible Online

Yeremiya 9 - Fulfulde bible

Yeremiya 9

¹Jawmiraawo wi'i: “Mi yiɗi mi heɓa hoɗorde nder ladde bana dillooɓe jahaaŋgal, haa mi acca yimɓe ummaatoore am, mi daayto ɓe. Ngam ɓe fuu maɓɓe ɓe jeenooɓe, ɓe laati mooɓre zammbotooɓe.

²Foroy ɓe ɗon taaski fewugo. Ɓe kuuwtinirtaa gooŋga ngam laamanaago lesdi, ammaa fewre. Ɓe ɗon ɗuɗɗina kuuɗe kalluɗe, ɓe njaɓaay yam boo.

³Sey koo moy reento e soobaajo mum, taa o hoolo koo deerɗiiko boo. Ngam koo moy, deerɗum ɗon fewja ɗum, koo moy ɗon waɗa soobaajo mum tufle.

⁴Ɓe ɗon mbaɗindira rikici, walaa mo wolwata gooŋga. Ɓe mboowni ɗemɗe maɓɓe fewugo, ɓe ɗon mbaɗa hakke, ɓe cali tuubugo.

⁵Toonyaare dow toonyaare, rikici dow rikici! Ɓe cali anndugo yam.” Nii Jawmiraawo wi'i.

⁶Ngam maajum Jawmiraawo honooɓe asama wi'i: “Mi foondan ɓe, mi ɓolinan ɓe bana njamndi haa mi laara to ɓe gooŋga'en malla naa non. To naa non, noy mbaɗanmi ummaatoore am fahin?

⁷Ɗemɗe maɓɓe nanndi bee kuri mbarooji, ɗe ɗon mbolwa fewjere. Koo moy ɗon wolwana keeddiɗɗum haala jam, ammaa ɓernde maako ɗon tuufana mo tuuforli.

⁸Kadi mi hiitataako yimɓe ɓe'e na? Mi waatataako irin ummaatoore nde'e na?” Non Jawmiraawo wi'i.

⁹Yeremiya wi'i: “Mi woyan, mi uuman dow kooseeje, mi yiman gimol bojji ngam durduɗe nder ladde, ngam ɗe ngulaama, walaa caalotooɗo ton. Ubbaaŋgo ga'i woodaa, colli e dabbaaji ladde fuu ndoggi, ndilli.”

¹⁰Jawmiraawo wi'i: “Mi laatinan Urusaliima waagaare kaa'e e lowol cuuli. Mi laatinan gure Yahuuda ladde meere nde walaa jooɗiiɓe ton.”

¹¹Hikmaajo moy faami kuuje ɗe'e? To Jawmiraawo wolwani mo, nden kam sey o anndina ɗum woɗɓe! Ngam ɗume lesdi halki, wulaama bana ladde meere nde goɗɗo saalataako ɗum?

¹²Jawmiraawo jaabi: “Ngam yimɓe am acci tawreeta am ka ekkitinmi ɓe. Ɓe nananaay yam, ɓe tokkaaki yam.

¹³Ammaa ɓe tokki ɓerɗe maɓɓe caatuɗe, ɓe ɗowtani Ba'alji bana baabiraaɓe maɓɓe ekkitiniri ɓe.

¹⁴Ngam maajum min Jawmiraawo honooɓe asama, Allah Isra'iila mbi'anmi: Mi nyaamnan yimɓe am kaaɗɗum, mi yarnan ɓe ndiyam mbaroojam.

¹⁵Mi saŋkitan ɓe caka ummaatooje ɗe ɓe anndaa, koo kamɓe, koo kaakiraaɓe maɓɓe. Mi ukkanan ɓe konu haa to mi nattini ɓe.”

¹⁶Ndaa nii Jawmiraawo honooɓe asama wi'i: “Kakkile, ewne rewɓe woyooɓe e annduɓe gimi cunooji ɓe ngara.”

¹⁷Yimɓe mbi'i: “Sey ɓe njaawa, ɓe ngima yimre suno dow meeɗen! Sey gite men ndufa gonɗi, haa lare gite men ilna ndiyam!”

¹⁸Nane uumaali iwɗi Siyona: “Kayto! Ɓe mbili min, mbustu ɗon sudda min! Ɓe ndiiwi min diga lesdi amin, ɓe ngibbini cuuɗi amin.”

¹⁹Yeremiya wi'i: “Onon rewɓe, nane ko Jawmiraawo wi'i, keɗite koŋngol maako: Ekkitine ɓiɓɓe mon rewɓe uumugo, sooba'en mon boo yimugo gime cunooje!

²⁰Ngam waade nasti gal burɗe cuuɗi men e laamorɗe men. Nde wifti ɓikkoy e laabi, suka'en boo e luuɓe.

²¹Ɓalli maayɓe mbaaloto haa ngesa bana koonal, bana ƴommbe ɓaawo codoowo, walaa mooɓtanɗo ɗe. Kanjum Jawmiraawo anndini yam.”

²²Ndaa nii Jawmiraawo wi'i: “Hikmaajo, taa mantoro hikma mum. Cemmbiɗɗo, taa mantoro semmbe mum. Diskuɗo boo, taa mantoro risku mum!

²³To goɗɗo yiɗi mantaago, sey o manto ngam o woodi hikma, o anndi yam boo. Ngam min Jawmiraawo mi ɗon waɗa haa duniyaaru fodde mbooɗeeŋga e kiita ndarnuka e adilaaku. Kanjum mi yerdoto.” Non Jawmiraawo wi'i.

²⁴Jawmiraawo wi'i: “Saa'i ɗon wara haa mi hiito koo ɓeye juulnaaɓe fuu haa ɓalli muuɗum'en,

²⁵waato yimɓe Misra e Yahuuda e Edoom e Ammoon e Mo'ab e yimɓe ladde laɓa-taarna'en fuu. Yimɓe ɓe'e fuu njuulnaay e yimɓe Isra'iila boo ɓerɗe muuɗum'en njuulnaaka.”