Read Fulfulde Gimi Boyki 1 Bible Online

Gimi Boyki 1 - Fulfulde bible

Gimi Boyki 1

¹Kayto! Berniwol Urusaliima yeewaama, naane ngol heewi yimɓe! Naane ummaatooje teddini ngol, jonta ngol laati bana debbo jurumɗo. Ngol laamanino lesɗe, jonta ngol nasti njeyaaŋgu.

²Jemma fuu ngol ɗon woya, gonɗi ɗon dow galaŋge maagol. Yiɗɓe ngol fuu, walaa koo gooto maɓɓe de'itinta ngol. Sooba'en maagol fuu zammbi ngol, laati konne'en maagol.

³Yimɓe Yahuuda fuu ndahaama, laati maccuɓe, torraaɓe. Ɓe ɗon njooɗi nder lesɗe jananne, ɓe ngalaa siwtaare. Konne'en ɗon taaro ɓe, laawol daɗugo woodaa.

⁴Laabi Siyona perwi, ngam walaa garanɗo haa juulɗe. Walaa koo goɗɗo haa dammuɗe berniwol, liman'en ɗon uuma, faanyɓe rewɓe ɗon cuno, Siyona ɗon nder mettamɓeram.

⁵Ɓillooɓe ngol njaali ngol, konne'en maagol ɗon bee jam. Jawmiraawo yarni ngol bone ngam hakkeeji maagol ɗuuɗɗi. Konne'en naŋngi ɓikkoy maagol, dahi koy[1].

⁶Daraja Urusaliima ittake. Mawɓe maagol nanndi bee lelji dogganɗi yeeso loohoowo, ɗi tampuɗi ngam ɗi tawaay durduɗe.

⁷Nder nyalɗe ɓillaare e gaanci maagol, ngol ɗon siftora daraja maagol naane. Nde konne'en nyaami ngol, walaa balluɗo ngol. Ɓillooɓe ngol ceyori do'ere maagol, njaanci ngol.

⁸Berniwol Urusaliima waɗi hakkeeji naawɗi, ngol laati bana jiddere. Teddinɓe ngol naane ngi'i temmbuki maagol, ɗon njawo ngol. Ngol ɗon uuma, ngol wayliti ɓaawo.

⁹Coɓki maagol ɗon takko gawarle limce maagol, ngol numaay timmoode maagol. Ngol do'i do'ere naawnde, walaa mo de'itinta ngol. Ngol ɗon toro Jawmiraawo enɗa ngol, ngam konne'en njaali ngol.

¹⁰Ɓillooɓe ngol njaɓti ndesaaje maagol fuu. Ngol yi'i no saadooni'en nastiri suudu seniindu koo nde Jawmiraawo haɗno ɓe nastugo nder mooɓre yimɓe mum.

¹¹Yimɓe ummaatoore maagol fuu ɗon uuma, ɗon ɗaɓɓita nyaamdu. Ɓe ɗon ndokka jawdi maɓɓe ngam ɓe keɓa nyaamdu, ɓe ngeeɗa. Berniwol ɗon toro Jawmiraawo: “Laar no ɓe njawori yam!”

¹²“Onon saalotooɓe fuu, taa sarru ngu'u heɓa on! Woodi naaworla bana naaworla am na, ka Jawmiraawo yarnatammi nder wakkati tikkere mum?

¹³O jippini yiite, nge wuli nder am. O tuufani yam tuuforgol, o lorni yam ɓaawo. O laatini yam geewaaɗo, mi nyawɗo foroy.

¹⁴O laari hakkeeji am fuu, o haɓɓi ɗi kaɓɓol, o yowi ɗi dow daande am, teddeeŋga maaji tampini yam. Jawmiraawo hokki yam haa juuɗe ɓurdanɓe yam semmbe.

¹⁵Jawmiraawo wudini honooɓe semmbiɗɓe wonɓe nder am fuu. O neli jama'aare konu dow am, nde nama suka'en am. O ɓiɗɗi yam bana inabooje nder ɓiɗɗirde.

¹⁶Ngam maajum mboyanmi, gite am ɗon ilna gonɗi. De'itinoowo yam, geeɗitinɗo yoŋki am daayake. Ɓikkoy am ɗon caklo, ngam konne'en ɓurdi koy semmbe.

¹⁷Mi ɗon weeɗa juuɗe am, ammaa balloowo yam woodaa. Jawmiraawo mooɓti dow am ɓillooɓe taariiɓe yam. Ɓe ɗon ndaarammi bana huunde nyiddunde.

¹⁸Ammaa Jawmiraawo o adiliijo, koo to mi tuurtani umrooje maako. Naneeɗam, onon ummaatooje fuu, ndaare bone am. Faanyɓe rewɓe am e suka'en am ndahaama.

¹⁹Mi ewni yiɗɓe yam, ammaa ɓe zammbi yam. Liman'en e ndotti'en maayi dow laabi am, saa'i ɓe ɗon ɗaɓɓita nyaamdu haa ɓe ngeeɗa.

²⁰Yaa Jawmiraawo, laar ɓillaare am, teteki am ɗon ngula, ɓernde am ta'i ngam daliila tuurtol am. Kaafahi mbari ɓikkoy am haa yaasi, waade nasti cuuɗi fuu.

²¹Yimɓe nani uumaali am, ammaa walaa mo de'itini yam. Konne'en am ɗon ceyoro sarru ngu ukkanɗaami. Waddu nyalaade nde ngooynuɗa, haa ɓe laato bana am.

²²Halleende maɓɓe fuu wara yeeso ma. Hiita ɓe bana kiitoriiɗa mi ngam daliila hakkeeji am. Ngam uumaali am ɗuuɗi, ɓernde am nyawi.”