Read Fulfulde Ezekiyel 1 Bible Online

Ezekiyel 1 - Fulfulde bible

Ezekiyel 1

¹Jawmiraawo wolwani Ezekiyel limanjo, ɓii Buji haa maayo Kebar nder lesdi Kaldiya. Ezekiyel wi'i: “Ndaa ko laati nder nduuɓu am cappanɗe tataɓu, lewru nayaɓru, nyannde jowaɓre maaru. Saa'i man mi ɗonno caka dahaaɓe haa maayo Kebar. Nyannde jowaɓre go nder nduuɓu njowaɓu ɓaawo daheeki laamiiɗo Yooyakin, asamanji maɓɓiti, Allah yi'ni yam wahayuuji. Ton haa maayo, juŋngo Jawmiraawo naŋngi yam.

⁴Mi laari, ndaa henndu saatundu ɗon wara diga woyla, non boo ruulde mawnde bee yiite huɓɓanŋge. Jayŋgol taari ruulde man. Haa caka yiite, woodi ɗelkoojum bana ɗelko njamndi.

⁵Haa caka cak woodi tagle geete nayi, ɗe nanndi bee neɗɗo.

⁶Tagdi fuu woodi geese nayi e bileeji nayi.

⁷Kosɗe maaje darnuɗe cir, jaaɓruɗe maaje laati bana ɗe nyalahol, ɗe ɗon ɗelka bana njamndi mboɗeeri.

⁸Ɗe ngoodi juuɗe bana ɗe yimɓe les bileeji maaje nayi haa buttuli maaje nayi. Tagle nayi fuu ngoodi geese e bileeji bana ni'i:

⁹Bileeji maaje meemindiri. To ɗe ɗon njaha, walaa haaje ɗe ngaylito, tagdi fuu ɗon tiiti cir gal yeeso muuɗum.

¹⁰Geese maaje nanndi bee yeeso neɗɗo. Haa wakeere nyaamre, tagle nayi fuu ngoodi geese bana yeeso mbarooga, haa wakeere nannde boo, bana yeeso ngaari kalhaldi, ɗe nayi fuu ɗe ngoodi yeeso bana ngo dutal.

¹¹Bileeji maaje ɗiɗi mbe'iti gal dow, ɗi meemindiri, ɗiɗi goɗɗi boo mbiirni ɓalli maaje.

¹²Tagdi fuu tiiti yeeso muuɗum. Haa Ruuhu yiɗi yahugo fuu, ton ɗe njahata. To ɗe ɗon njaha, ɗe ngaylitittaako.

¹³Caka tagle ɗe'e, mi yi'i goɗɗum bana ƴulɓe yiite, bana jame ɗe ɗon ndimmbo bana tostilamji ɗon ngaanca caka tagle geete ɗe'e. Yiite nge'e ɗon ɗelka, ma'e ɗon ngurto e maage boo.

¹⁴Tagle go ɗon njaha, ɗon lorto bee jaawal, ɗum ɗon bana ma'e.

¹⁵Mi ɗonno laara tagle ɗe'e. Ndaa, falloore murlere ɗon haa lesdi haa kommbi tagdi fuu, haa yeeso geese maari nayi.

¹⁶Pallooje ɗe'e ɗon ɗelka bana hayre kirisoliti, nayi fuu ɗon nanndi. Woodi falloore woɗnde nder falloore fuu.

¹⁷Ɗe ɗon njaha gal alkibilaaji nayi fuu, walaa haaje ɗe ngaylito nder yahdu maaje.

¹⁸Ɗe taaraama bee tallirɗe mawɗe masin. Mi yi'i tallirɗe man keewi gite haa fiilti.

¹⁹To tagle ɗe'e ɗon njaha, pallooje boo ɗon talla baŋnge maaje. To tagle ɗe'e ɗon eeŋga diga lesdi, pallooje boo ɗon eeŋga.

²⁰Haa Ruuhu yahata fuu, ton tagle ɗe'e njahata, pallooje boo eeŋgidan bee maaje, ngam Ruuhu tagle ɗe'e ɗon nder pallooje.

²¹To tagle ɗe'e ɗon ndilla, pallooje boo ɗon talla. To tagle ndarake, pallooje boo ɗon ndaro. To tagle ɗon eeŋga diga lesdi, pallooje boo eeŋgidan bee maaje, ngam Ruuhu tagle ɗon nder pallooje.

²²Haa dow ko'e tagle ɗe'e, woodi irin kippol kulniiŋgol, ngol ɗon ɗelka bana hayre jalbitannde, ngol ɗon we'iti dow ko'e tagle.

²³Bileeji maaje ɗon mbe'iti les kippol ngo'ol, meemindiri. Tagdi fuu woodi bileeji ɗiɗi ngam wiirnugo ɓanndu maari.

²⁴Saa'i ɗe njahata, mi ɗonno nana hoolo bileeji maaje bana iidaaŋgo ndiyamji mawɗi, bana sawtu Allah Baawɗo, bana hoolo mooɓre ɗuuɗnde malla nde saŋngeere konu. To ɗe ndarake, ɗe ɗon leestina bileeji maaje.

²⁵Hoolo iwi haa nokkuure dow kippol be'itiiŋgol dow ko'e maaje go, to ɗe ndarake, ɗe ɗon njippina bileeji maaje.

²⁶Dow kippol gonŋgol dow ko'e maaje go, ngi'mi huunde bana hayre safira, nde nanndi bee leeso laamu. Dow leeso ngo'o boo, nannduɗo bee neɗɗo ɗon jooɗi.

²⁷Diga haddorde maako yahugo dow, ngi'mi ɗelko bana njamndi, yiite taari ɗum. Diga haddorde maako yahugo les, ngi'mi ko nanndi bee yiite. Jayŋgol taari jaati maako fuu.

²⁸Jayŋgol man nanndi bee timotimooŋgal baŋganŋgal nder duule, saa'i iyeende ɗon toɓa. Bana non tedduŋgal Allah waŋgiri. Nde ngi'mi ɗum, mi sujidi, mi nani goɗɗo ɗon wolwa.”