Read Fulfulde Ezekiyel 17 Bible Online

Ezekiyel 17 - Fulfulde bible

Ezekiyel 17

¹Ndaa Jawmiraawo wolwani yam, wi'i:

²“Ɓii-Aadama, waɗan yimɓe Isra'iila annditanamwol, yeccu ɓe balndol.

³Wi' ɓe: Ndaa nii Allah Jawmiraawo wi'i: Dutal maŋngal bee bileeji juutɗi, marŋgal liiliiji juutɗi booɗɗi marɗi noone feere feere wari haa kooseeje Libanon, yewi lisal ɓurŋgal towugo haa lekki cemmbiɗki,

⁴yahri lisal keccal nga'al haa lesdi filooɓe, jo'ini ngal nder berniwol filu.

⁵Nden dutal hoo'i leggel keccel haa lesdi, jubi ngel nder ngesa marka ndiyam ɗuuɗɗam haa ngel naŋgta booɗɗum.

⁶Ngel naŋgti, ngel laati inabohi dammuki jaaski. Lice maaki ngayliti gal dutal go, ɗaɗi maaki ndilli nder lesdi. Ki heewi lice e haakooji.

⁷Woodi dutal feere maŋngal, marŋgal bileeji juutɗi e liiliiji cukkuɗi. Inabohi go waylitani ngal ɗaɗi mum e lice mum, haa ngal yarna ki ko ɓuri haa ki wonno naane,

⁸asee boo ki dari nder ngesa mbooɗka bee ndiyam ɗuuɗɗam, haa ki waɗa lice, ki rima ɓiɓɓe, ki laato inabohi booɗki masin.

⁹Ngam maajum min Allah Jawmiraawo mi ɗon ƴama: Inabohi bana maaki waɗan ɓenndalooje ɗuuɗɗe na? Dutal aranal ɗoofataa ɗaɗi maaki na? Ngal sammintaa ɓiɓɓe maaki, haa ki yoora na? Ɗoofugo ki, koyɗum. Walaa haaje waɗugo ɗum bee semmbe malla bee yimɓe ɗuuɗɓe.

¹⁰Ki naŋgti. Ammaa ki waɗan ɓenndalooje ɗuuɗɗe na? To henndu fuunaaŋge faɗɗi ki, naa ki yooran? Haa nokkuure ki dari, ton ki ɗaylata.”

¹¹Ndaa Jawmiraawo wolwani yam, wi'i:

¹²“Yeccu tuurtooɓe ɓe'e: On anndaa ko ɗum saawi na? Yeccu ɓe: Ndaa, laamiiɗo Baabila wari haa Urusaliima, dahi laamiiɗo e saraaki'en mum haa Baabila.

¹³Nden o hoo'i goɗɗo mo danygol laamiiɗo, o haɓɓi alkawal bee maako, o hunni mo hunayeere. O dahi mawɓe lesdi,

¹⁴ngam o famɗitina laamu, taa ngu semmbiɗa fahin, ngu tokko alkawal boo.

¹⁵Ammaa laamiiɗo Yahuuda tuurtani mo, neli nelaaɓe haa Misra ngam heɓa pucci e jama'aare konu ɗuuɗnde. O heɓan jaalorgal na? Kuuwɗo irin ɗu'um daɗan na? Ayye, o fiisti alkawal nii, o hisa kiita!”

¹⁶Allah Jawmiraawo wi'i: “Fakat bana mi geeto, haa Baabila laamiiɗo oo maayan, ngam o yawi hunayeere laamiiɗo Baabila dokkuɗo mo laamu, o fiisti alkawal bee maako.

¹⁷Koo Firawna bee jama'aare konu mum ɗuuɗnde boo waawataa wallugo mo, saa'i honooɓe Baabila mbaagata lesdi ɗakki mahol ngam hippaago, saa'i ɓe ndarnata kuuje kipporɗe berniwol ngam mbarugo yimɓe ɗuuɗɓe.

¹⁸O yawi hunayeere, o fiisti alkawal ngal ɓe kaɓɓuno bee dokkindirki juuɗe. O huuwi kuuɗe ɗe'e fuu. Ngam maajum o hisataa.”

¹⁹Allah Jawmiraawo wi'i: “Fakat bana mi geeto, mi lornan aybe maako dow hoore maako. Ngam o yawi hunayeere nde o huni yeeso am, o fiisti alkawal ngal o haɓɓi bee am.

²⁰Mi we'itan zubaawol am dow maako, mi naŋngan mo bee tuuforgol am. Mi yahran mo haa Baabila. Ton mi hiitoto mo, ngam o yewi umrooje am.

²¹Honooɓe maako suɓaaɓe maayran bee kaafahi, daɗanɓe boo caŋkititto haa alkibilaaji fuu. Nden kam on paaman min Jawmiraawo wi'i ɗum.”

²²Ndaa nii Allah Jawmiraawo wi'i: “Min boo mi hoo'an lisel keccel ɓurŋgel towugo haa lekki cemmbiɗki, mi yewan ngel, mi jubo ngel dow hooseere townde,

²³dow hooseere ɓurnde towugo nder lesdi Isra'iila. Ngel wilitan, waɗan lice, ngel riman ɓiɓɓe, ngel laatoto lekki cemmbiɗki booɗki masin. Asli colli fuu ngaran dow maaki, njooɗoto les ɗowdi maaki.

²⁴Nden leɗɗe fuu nder lesdi paaman min woni Jawmiraawo. Mi fe'an leɗɗe towɗe, ammaa mi mawninan leɗɗe pamare. Mi yoornan leɗɗe kecce, ammaa mi wilitinan leɗɗe joorɗe. Min Jawmiraawo wi'i ɗum, mi waɗan ɗum boo.”