Read Fulfulde Ezekiyel 21 Bible Online

Ezekiyel 21 - Fulfulde bible

Ezekiyel 21

¹Ndaa Jawmiraawo wolwani yam, wi'i:

²“Ɓii-Aadama, laar gal fombina, telɓan fombina, waɗ annabaaku dow laynde Lesdi Fombina.

³Yeccu nde: Nan wolde Allah Jawmiraawo! Ndaa ko o wi'i: Mi jamnan yiite nder maaɗa, nge nyaama leɗɗe joorɗe e kecce fuu. Walaa ko nyifata ɗemɗe maage. Nge wulan geese yimɓe fuu, diga fombina haa woyla.

⁴Koo moy yi'an min Jawmiraawo jamni nge, walaa nyifanɗo nge.”

⁵Mi wi'i: “Kayya, yaa Allah Jawmiraawo, yimɓe ɓe'e ɗon mbi'a: Tum gorko oo ɗon wolwa bee balndi.”

⁶Fahin Jawmiraawo wolwani yam, wi'i:

⁷“Ɓii-Aadama, laar gal Urusaliima, telɓan nokkuuje cenaaɗe ton, waɗ annabaaku dow lesdi Isra'iila.

⁸Yeccu yimɓe ton: Ndaa nii Jawmiraawo wi'i: Mi ɗon hona on. Mi losan kaafahi am, mi nattina adili'en e halluɓe.

⁹Nde nii mi nattinan adili'en e halluɓe, kaafahi am losoto dow koo moy fuu, diga fombina haa woyla.

¹⁰Koo moy faaman min Jawmiraawo losi kaafahi am, ki lorataako nder suudu maaki.

¹¹Ɓii-Aadama, sey a uuma bana mo walaa tammunde, mo ɗon nder mettamɓeram. Uuma bee sawtu yeeso maɓɓe fuu.

¹²To ɓe ƴami ma ngam ɗume a uumata, jaaba ɓe: Ngam daliila kuuje ɗe tammi wargo. Nden ɓerɗe fuu ɓolwan, juuɗe fuu tampan, hakkiilooji fuu cakloto, koppi fuu tampan. Saa'i waɗi, jonta ɗum laatoto.” Non Allah Jawmiraawo wi'i.

¹³Fahin Jawmiraawo wolwani yam, wi'i:

¹⁴“Ɓii-Aadama, waɗ annabaaku. Yeccu yimɓe: Ndaa nii Jawmiraawo wi'i: Ndaa kaafahi, kaafahi belki ɗelkanki!

¹⁵Ki welnaama ngam mbarugo, ki ɗelkinaama ngam yaynugo bana ma'ere.

¹⁶Goɗɗo welni kaafahi hiddeko juŋngo naŋnga ki. O welni ki, o ɗelkini ki, o hokki ki haa juŋngo mbaroowo.

¹⁷Sey a hoola, ɓii-Aadama, sey a woya, ngam kaafahi man waran dow yimɓe am! Ki waran dow mawɓe Isra'iila fuu, ɓe mbareteeɓe hawtaade bee yimɓe am. Fiy wiɓɓere ma daliila suno ngo'o.

¹⁸On nasti laarndeego. To on tokki on cali wo'itineego, kuuje ɗe'e fuu laatataako na?”[12] Non Allah Jawmiraawo wi'i.

¹⁹“Ɓii-Aadama, waɗ annabaaku. Hellu juuɗe! Nden kam kaafahi fe'an nde ɗiɗi, nde tati boo. Ɗum kaafahi mbaroohi ɗuuɗɓe, ki taaroto ɓe.

²⁰Mi ɗon hulna ɓe haa dammuɗe berniwol maɓɓe fuu bee kaafahi man, haa ɓerɗe maɓɓe ɓolwa, ɗuuɗɓe ndo'o. Kaafahi ɗon ɗelka bana ma'ere, ki taaski mbarugo.

²¹An kaafahi belki, ta'u haa nyaamo e nano fuu, ta'u koo toy njahɗa![13]

²²Min boo mi hellan juuɗe am[14], haa ɓernde am feewta. Min Jawmiraawo wi'i ɗum.”

²³Fahin Jawmiraawo wolwani yam, wi'i:

²⁴“Ɓii-Aadama, diidu misaalu laabi ɗiɗi ɗi laamiiɗo Baabila wardata bee kaafahi mum. Ɗiɗi fuu ngurto lesdi ngoori, waɗ maandorde, darnu nde dow laawol jahranŋgol haa berniwol.

²⁵Laawol gootol ngam yahugo berniwol Rabba nder lesdi Ammooni'en, laawol ɗiɗaɓol boo ngam yahugo Yahuuda, haa Urusaliima, berniwol cemmbiɗŋgol.

²⁶Jonta laamiiɗo Baabila ɗon dari haa maandorde man haa seldude laabi. Ngam heɓtugo laawol maako, o dimmbi kuri, o ƴami labbi, o laari heŋre ndabbaawa kirsaaŋga boo.

²⁷Ndaa, kurol bee innde Urusaliima ɗon haa juŋngo maako nyaamo. Ngol wi'i mo o yaha, o jo'ina kuuje ceekruɗe mahol, o umra mbareeki yimɓe, o wooka wookaandu konu, o nelda kuuje goɗɗe ngam fusugo dammuɗe, o waaga lesdi ɗakki mahol ngam hippaago berniwol ngo'ol.

²⁸Jooɗiiɓe nder Urusaliima ndaaran haala ka'a bana fewre, ngam daliila alkawalji ɗi ɓe kaɓɓi. Ammaa laamiiɗo Baabila siftinoran ɓe aybe maɓɓe, ngam daliila maaji ɓe njanan haa juŋngo maako.

²⁹Ngam maajum min Allah Jawmiraawo wi'i: On ciftinori yimɓe aybe mon, koo moy anndi tuurtolji mon. On ɗon mbaŋgina hakkeeji mon nder kuuɗe mon fuu. Nde nii on ciftinori yimɓe haala mon, mi hokkan on haa juuɗe konne'en mon.

³⁰An boo, ardiiɗo Isra'iila, kalluɗo, baɗoowo zunuuba, nyalaade ma ɗon wara haa keɓa kiita ma ragareeha.

³¹Min Allah Jawmiraawo wi'i ɗum. Ittu meetaleewol ma e fawnere taariinde hoore ma. Kuuje fuu ngayloto! Leesɓe ɓaŋgoto, ɓaŋgiiɓe boo leestan.

³²Bille dow bille, fakat mi wartiran berniwol bille! Ɗum fuu ɗum laatoto nder saa'iire nde goɗɗo mo kalfitinanmi kiita dow maagol warata.”

³³“Ɓii-Aadama, waɗ annabaaku, wi': Ndaa nii Allah Jawmiraawo wi'i dow Ammooni'en huɗooɓe Isra'iila: Ndaa kaafahi, ki losaama ngam hirsugo, ki ɗelkinaama ngam nattingo, ngam faɗɗugo bana ma'ere!

³⁴On ɗon ngi'a wahayuuji fewre, on ɗon pewa bee waɗugo hatti. Onon halluɓe, waɗooɓe zunuuba, nyalaade ɗon wara nde keɓoton kiita mon ragareeha. Kaafahi jippoto dow daaɗe mooɗon!”

³⁵“Lornu kaafahi nder suudu maaki! Mi hiitoto on haa nokkuure nde tagaaɗon, haa lesdi ndi ndanyaaɗon.

³⁶Mi rufan tikkere am dow mooɗon bana yiite jammitiiŋge. Mi hokkan on haa juuɗe saatuɓe, waawɓe halkugo.

³⁷Yiite nyaaman on, ƴiiƴam mooɗon ilan nder lesdi mon, walaa mo siftorta on. Min Jawmiraawo wi'i ɗum.”