Read Fulfulde Ezekiyel 22 Bible Online

Ezekiyel 22 - Fulfulde bible

Ezekiyel 22

¹Ndaa Jawmiraawo wolwani yam, wi'i:

²“An, ɓii-Aadama, a hiitoto berniwol keewŋgol ƴiiƴam na? Waŋginan ngol[15] kuuɗe maagol cemtiniiɗe fuu.

³Yeccu ngol: Ndaa nii Allah Jawmiraawo wi'i: Saa'i ma waɗi, ngam a rufi ƴiiƴam yimɓe ma, a soɓi ngam a waɗani hoore ma labbi.

⁴A aybuɗo ngam daliila ƴiiƴam ɗam a rufi, labbi ɗi a waɗi coɓni ma. Bana non a rammitiniri balɗe ma, a yotti kaakaadi duuɓi ma. Ngam maajum mi accan ummaatooje lesɗe fuu kuɗe, njance.

⁵Ɓadiiɓe e daayiiɓe fuu njancete, ngam a soɓni innde ma bee jiiɓre ma mawnde masin.

⁶Mawɓe Isra'iila fuu ɗon koolo baawɗe muuɗum'en, ɗon ndufa ƴiiƴam nder maaɗa.

⁷Yimɓe nder maaɗa ɗon njawo saaro'en muuɗum'en. Ɓe ɗon toonyo hoɗɓe, ɓe ɗon ɓilla atiime'en e rewɓe yurumɓe.

⁸A yawi nokkuuje am ceniiɗe, a soɓni nyalɗe ciwtorɗe ɗe ndarnumi boo.

⁹Yimɓe nder maaɗa ɗon mbaɗa tufle dow woɗɓe ngam mbarugo ɓe. Woɗɓe ɗon nyaama kirsanaaɗum labbi dow kooseeje. Woɗɓe ɗon mbaɗa cemtiniiɗum.

¹⁰Woɗɓe ɗon mbaalda bee rewɓe baabiraaɓe muuɗum'en. Woɗɓe ɗon ndoola haylooɓe ngam baaldal.

¹¹Woodi waɗooɓe kuuje nyidduɗe bee rewɓe heeddiɗɗiraaɓe muuɗum'en, non boo waaldooɓe bee rewɓe ɓiɓɓe muuɗum'en e waaldooɓe bee deerɗiraaɓe muuɗum'en rewɓe ɓe baaba gooto.

¹²Woɗɓe nder maaɗa ɗon njaɓa caahuuji ngam mbarugo yimɓe. Woɗɓe ɗon njowana heeddiɗɗiraaɓe muuɗum'en ndiyam nyamaande, ɓe ɗon ɓilla ɓe ngam heɓugo riba kalluka. Fakat, a yejjiti yam!” Non Allah Jawmiraawo wi'i.

¹³“Ndaa, mi hellan juuɗe[16] am ngam daliila riba ma kalluka e dufki ƴiiƴam nder maaɗa.

¹⁴Saa'i mbaɗanmi kiita bee ma, ɓernde ma e juuɗe ma maran semmbe na? Min Jawmiraawo wi'i ɗum, mi waɗan ɗum boo.

¹⁵Mi saŋkitan yimɓe ma nder ummaatooje e lesɗe fuu, haa mi wurtina kuuɗe ma coɓɗe nder maaɗa.

¹⁶A soɓnan hoore ma yeeso ummaatooje, bana non paamrata min woni Jawmiraawo.”

¹⁷Ndaa Jawmiraawo wolwani yam, wi'i:

¹⁸“Ɓii-Aadama, yimɓe Isra'iila nafataa yam. Ɓe nanndi bee jillindirɗum jamɗe mboɗeeri e ɓaleeri e jamɗe goɗɗe, nder ɓolinirde, ɓe laatanaaki yam bana cardi.

¹⁹Min Allah Jawmiraawo wi'i ɓe: Onon fuu on nafataa ngam on laati bana jamɗe jillindiraaɗe. Ngam maajum mooɓtanmi on nder Urusaliima,

²⁰bana goɗɗo hawtata cardi e jamɗe mboɗeeri e ɓaleeri e jamɗe goɗɗe nder ɓolinirde. Tikkere am saatunde ɓolinan on bana yiite ɓolinirta jamɗe.

²¹Mi mooɓtan on nder Urusaliima, mi huɓɓa yiite les mooɗon, mi ɓolina on bee tikkere am saatunde.

²²Bana goɗɗo ɓolinirta cardi nder ɓolinirde, bana non ɓoliniranmi on nder Urusaliima. Nden kam on paaman min Jawmiraawo rufi tikkere am dow mooɗon.”

²³Ndaa Jawmiraawo wolwani yam, wi'i:

²⁴“Ɓii-Aadama, yeccu Urusaliima: Nder nyalaade tikkere am, a nanndi bee lesdi ndi heɓaay iyeende, ndi soofaay.

²⁵Annabi'en ma nanndi bee mbarooga ubbanŋga, ceekanŋga ko nga faɗɗi. Ɓe ɗon mbara yimɓe, ɓe ɗon njaɓta riskuuji e kuuje marɗe saman, ɓe ɗon ɗuɗɗina rewɓe yurumɓe nder berniwol.

²⁶Liman'en ɗon luuta tawreeta am, ɓe ɗon coɓna kuuje cenaaɗe, ɓe cenndindirtaa ceniiɗum bee ko senaaki, ɓe ekkitintaa yimɓe haala laaɓɗum e coɓɗum, walaa ko yaali ɓe bee nyalɗe ciwtorɗe ɗe ndarnumi boo. Ngam daliila man yimɓe teddintaa yam.

²⁷Mawɓe caka maɓɓe nanndi bee caafaali ceekanɗi ko ɗi paɗɗi. Ɓe ɗon mbara yimɓe ngam ɓe keɓa riba kalluka.

²⁸Annabi'en cuddi hakkeeji ɗi'i fuu bana ranwinooɓe cuuɗi. Ɓe ɗon ngi'a wahayuuji meere, ɓe ɗon pewa bee waɗugo hatti. Ɓe ɗon mbi'a: Ndaa nii Allah Jawmiraawo wi'i. Ammaa min Jawmiraawo mi wolwanaay ɓe.

²⁹Yimɓe lesdi ɗon toonyo, ɗon njaɓta. Ɓe ɗon ɓilla laafuɓe e talaka'en, ɓe ɗon mbaɗa hoɗɓe rikici.

³⁰Caka maɓɓe, mi ɗaɓɓiti goɗɗo darnanɗo mahol ngam faddaago ɓe, darotooɗo nder ceekli maagol yeeso am ngam aynugo lesdi, ngam taa mi nattina ndi. Ammaa mi tawaay koo gooto.

³¹Ngam man ndufmi tikkere am dow maɓɓe, mi halki ɓe bee yiite. Mi lorni aybeeji maɓɓe dow ko'e maɓɓe.” Non Allah Jawmiraawo wi'i.