Read Fulfulde Ezekiyel 24 Bible Online

Ezekiyel 24 - Fulfulde bible

Ezekiyel 24

¹Nder nduuɓu njoweenayaɓu, lewru sappooru, nyannde sappoore maaru, Jawmiraawo wolwani yam, wi'i:

²“Ɓii-Aadama, winndu nyalaade nde'e, ngam hannde nden laamiiɗo Baabila wari hippaago Urusaliima.

³Yeccu yimɓe tuurtooɓe ɓe'e balndol, wi' ɓe: Ndaa nii Allah Jawmiraawo wi'i: Wa'in fayannde dow yiite, hebbin nde ndiyam!

⁴Wallin ta'e kusel ɓurɗe wooɗugo fuu nder maare, waato kosɗe e balbe, hebbin nde i'e booɗɗe.

⁵Hoo'u kusel dammooji cuɓaaɗi, sakku i'e haa les fayannde. Dollu ɗum booɗɗum haa i'e boo ɓennda.”

⁶Ngam ndaa nii Allah Jawmiraawo wi'i: “Kayto bone laatanto berniwol keewŋgol ƴiiƴam! Ngol nanndi bee fayannde nde peewol nyaami. Tuundi maare ittataake. Wurtin ta'e kusel fuu! Taa waɗ kur'u ngam heɓtugo tayre ndeye aartata wurtaago.

⁷Ngam ƴiiƴam ɗam ngol rufi ɗon nder maagol. Ngam yimɓe ndufaay ƴiiƴam man haa lesdi haa mbulwuldi uwano ɗam. Ɓe ndufi ɗam dow tapaare.

⁸Mi acci ɗam ton, taa ɗam uwo, ammaa ɗam ummina tikkere am, haa mi waato ngol daliila aybe dufki ƴiiƴam ɗa'am.”

⁹Ngam maajum, ndaa nii Allah Jawmiraawo wi'i: “Kayto bone laatanto berniwol keewŋgol ƴiiƴam! Min bee hoore am mi waagan leɗɗe.

¹⁰Waagu leɗɗe ɗuuɗɗe, huɓɓu yiite, ndefe kusel man booɗɗum, mbaɗe citta, ngule i'e!

¹¹Jo'in fayannde sookre dow ƴulɓe yiite haa njamndi maare wooja. Nge wula tuundi maare fuu, haa nder maare ɓolwa.

¹²Dabareeji yimɓe mbaawataa ittugo ɗum. Koo bee yiite boo tuundi maare keewndi ittataako.

¹³Urusaliima, a soɓi bee kuuɗe ma cemtiniiɗe. Mi yiɗno laɓɓingo ma, ammaa a laaɓaay. A laaɓataa fahin, sonaa to mi rufi tikkere am fuu dow maaɗa.

¹⁴Min Jawmiraawo wi'i ɗum. Ɗum laatoto. Mi waɗan ɗum, mi faasitittaa, mi enɗataa, mi yurmintaa. Mi hiitete fodde gikku ma e fodde kuuɗe ma.” Nii Allah Jawmiraawo wi'i.

¹⁵Ndaa Jawmiraawo wolwani yam, wi'i:

¹⁶“Ɓii-Aadama, mi ittan ko seynata gite ma bee juhuki. Taa a yooyna, taa a woya, taa a rufa gonɗi.

¹⁷Taa goɗɗo nana uumaali ma, taa woy maayɗo. Taa ittu meetaleewol ma, taa faɗɗita paɗe ma bana woyanɓe mbaɗata. Taa wiirnu yeeso ma, taa nyaam nyaamdu jooɗotooɓe haa maayiti boo.”

¹⁸Nyannde man fajiri mi wolwani yimɓe. Kiikiiɗe boo debbo am maayi. Jaŋngo man fajiri, mi waɗi bana Jawmiraawo umruno yam.

¹⁹Yimɓe ƴami yam: “Ngam ɗume mbaɗɗa bana nii? Ɗume ɗum yiɗi wi'go ngam amin?”

²⁰Mi jaabi ɓe: “Ndaa Jawmiraawo wolwani yam, wi'i:

²¹Yeccu yimɓe Isra'iila ndaa nii Allah Jawmiraawo wi'i: On ɗon maŋgtoro semmbe suudu am, on ngiɗi laarugo ndu, on ngiɗi ndu masin boo. Ammaa mi tammi soɓnugo ndu. Ɓiɓɓe mon worɓe e rewɓe, luttuɓe nder Urusaliima, konne'en mbaran ɓe bee kaafahi.

²²Nden on mbaɗa bana mbaɗmi. Taa on mbiirna geese mon, taa on nyaama nyaamdu jooɗiiɓe haa mayiti.

²³Taa on itta meetaleeji mon, taa on paɗɗito. Taa on njooyna, taa on mboya. Ammaa on njinnan ngam daliila aybeeji mon, on uumoto, koo moy heedi keeddiɗɗum.

²⁴Ezekiyel laatanto on alaama. Ko o waɗi fuu, onon boo on mbaɗa ɗum. To ɗum laatake, on paaman min woni Allah Jawmiraawo.”

²⁵Jawmiraawo wi'i yam: “Ɓii-Aadama, mi ittanan ɓe hisrude maɓɓe woonde masin nde ɓe ceyori ɗum, nde ɓe ngiɗi laarugo, nde ɓe ngiɗi ndu masin boo. Mi hoocan ɓiɓɓe maɓɓe worɓe e rewɓe.

²⁶Nyalaade mbaɗanmi ɗum, goɗɗo daɗɗo halkere waran haa maaɗa ngam waddango ma habaru man.

²⁷Nyalaade man a waawan wolwugo fahin ngam a wolida bee daɗɗo oo. Bana nii a laatorto alaama ngam maɓɓe, kamɓe boo ɓe paaman min woni Jawmiraawo.”