Read Fulfulde Ezekiyel 26 Bible Online

Ezekiyel 26 - Fulfulde bible

Ezekiyel 26

¹Nder nduuɓu sappo e go'oowu, nyannde go'oore lewru, Jawmiraawo wolwani yam, wi'i:

²“Ɓii-Aadama, yimɓe Tirus mbolwi kalluka dow Urusaliima, ɓe mbi'i: Yowwa, Urusaliima laati bille! Naane ummaatooje ɗuuɗɗe mbaɗi filu ton. Jonta ɗe ngaylitake haa meeɗen, en keɓan risku.

³Ngam maajum min Allah Jawmiraawo mi wi'i: An berniwol Tirus, mi honete. Mi yahran ummaatooje ɗuuɗɗe dow maaɗa, ɗe ngaran bana ƴuuge mbeela.

⁴Ɗe pusan mahi taariiɗi ma, ɗe ngibbinan cuuɗi ma towɗi. Mi doonyan lesdi Tirus fuu, sey tapaaje tan mbaŋgata.

⁵Naŋngooɓe liɗɗi ndiiran zubaaji muuɗum'en dow maaje caka mbeela. Min Allah Jawmiraawo wi'i ɗum. Ummaatooje njaɓtan kuuje maagol,

⁶mbaran yimɓe gure maagol gonɗe haa fomoonde bee kaafahi. Nden kam Tirus faaman min woni Jawmiraawo.”

⁷Ngam ndaa nii Allah Jawmiraawo wi'i: “Mi waddan Nabukodonosor, laamiiɗo Baabila, ɓurduɗo laamiiɓe fuu maŋngu, o haɓa bee maaɗa, an Tirus. O waran diga woyla, hawtaade bee jama'aare konu ɗuuɗnde e mootaaji pucci e wa'iiɓe pucci.

⁸Honooɓe maako mbaran yimɓe gure maaɗa gonɗe haa fomoonde bee kaafahi. Ɓe taarnete bee kuuje kipporɗe, ɓe mbaagan lesdi ngam hippaago ma, ɓe ndarnan bawarɗe maɓɓe ngam dartanaago ma.

⁹Nden ɓe ɓadinan kuuje ceekruɗe haa mahol ma, ɓe ngibbinan cuuɗi ma towɗi bee cabbi njamndiiji.

¹⁰Pucci maɓɓe umminan collaaje ɗuuɗɗe, ɗe cuddete. Mahi ma ndiwnan ngam hoolo wa'iiɓe pucci e mootaaji pucci, ɓe nastan dammuɗe ma bana goɗɗo nastirta berniwol ceekaaŋgol.

¹¹Kororamje pucci maɓɓe ndamman buuwi ma, ɓe mbaran yimɓe ma fuu bee kaafahi, daŋraŋge ma cemmbiɗɗe ngibban.

¹²Ɓe njaɓtan riskuuji ma e kuuje filu ma. Ɓe ngibbinan mahi ma, ɓe pusan cuuɗi ma booɗɗi fuu. Ɓe ndufan kaa'e e leɗɗe e mbuuri ma nder mbeela.

¹³Mi je'inan gimi ma e hoolo moolooji ma.

¹⁴Mi laatinte tapaare sookre, nde laatoto nokkuure haa naŋngooɓe liɗɗi ndiirata zubaaji muuɗum'en. Berniwol Tirus meetataa nyiɓteego. Min Allah Jawmiraawo wi'i ɗum.”

¹⁵Ndaa nii Allah Jawmiraawo wi'i berniwol Tirus: “Saa'i do'ere ma, jooɗiiɓe haa duuɗe kultoran ngam gookaali mbareteeɓe nder maaɗa.

¹⁶Laamiiɓe ummaatooje haa mbeela fuu njippoto leese laamu muuɗum'en. Ɓe ɓortan ngapaleeji maɓɓe e alkibbaaje maɓɓe tuppitaaɗe, ɓe njooɗo haa lesdi ɓe ɗon ndiwna. Ɓe kultoran ngam masiibo ma, ɓe mbaawataa naŋgtugo diwŋgol maɓɓe.

¹⁷Ɓe ngiman gimol boyki ngo'ol dow maaɗa: Kayto! Berniwol maŋgtaaŋgol halki nder mbeela. Yimɓe maagol laamanino ndiyamji, kulnino jooɗiiɓe haa fomoonde mbeela fuu.

¹⁸Ammaa jonta, nyannde a do'i, duunde fuu ɗon diwna, jooɗiiɓe ton fuu kultori ngam halkere ma.”

¹⁹Ndaa nii Allah Jawmiraawo wi'i berniwol Tirus: “Mi sookɗinte bana bille berniiji ɗe ngalaa jooɗiiɓe ton. Mi suddete bee ndiyamji diga luggeeŋga mbeela.

²⁰Mi diirtinte haa diirtuɓe nder ngaska lugguka, haa yimɓe yeeɗunooɓe ɓooyma ngoni. Mi hokkete joonde hawtaade bee maayɓe caka bille duumiiɗe ton nder ngaska lugguka. A meetataa loraago haa nokkuure ma haa lesdi yeeɗɓe.

²¹Mi laatinte ciftinorɗum kulniiɗum, kanjum woni timmoode ma. Nden yimɓe ɗaɓɓititte, ammaa ɓe keɓtataa ma haa foroy.” Nii Allah Jawmiraawo wi'i.