Read Fulfulde Ezekiyel 3 Bible Online

Ezekiyel 3 - Fulfulde bible

Ezekiyel 3

¹O wi'i yam: “Ɓii-Aadama, nyaam ko woni yeeso ma, nyaam deftere taggaande nde'e. Nden yah, wolwan yimɓe Isra'iila!”

²Mi maɓɓiti hunnduko, o nyaamni yam deftere taggaande nde'e.

³O wi'i yam: “Ɓii-Aadama, nyaam nde, hebbin reedu ma bee deftere taggaande nde'e!” Mi nyaami nde, nde weli haa hunnduko am bana njumri.

⁴Nden o wi'i yam: “Ɓii-Aadama, yah haa yimɓe Isra'iila jonta, yeccu ɓe bolle am.

⁵Mi nelaay ma haa ummaatoore wolwannde ɗemŋgal janannal malla bolle caɗɗe, ammaa haa yimɓe Isra'iila.

⁶Naa haa ummaatooje ɗuuɗɗe bolwanɗe ɗemŋgal janannal malla bolle caɗɗe ɗe a faamataa. To mi nelno ma haa maɓɓe kam maa, ɓe nananno ma.

⁷Ammaa yimɓe Isra'iila nanantaa ma, ngam ɓe cali nanango yam min, ko'e maɓɓe caati.

⁸Ndaa, mi yoornan gite ma bana ɗe maɓɓe, mi saatinan hoore ma boo bana maɓɓe.

⁹Mi saatinan hoore ma bana hayre ɓurnde saatugo. Taa hul ɓe, taa gite maɓɓe kulne, ngam ɓe tuurtooɓe.”

¹⁰Nden o wi'i yam: “Ɓii-Aadama, bolle ɗe mi wi'ete fuu, nan ɗe bee noppi ma, jaɓ ɗe haa ɓernde ma!

¹¹Yah haa dahaaɓe, haa yimɓe ummaatoore ma, koo ɓe nanan koo ɓe caloto nanugo, yeccu ɓe: Ndaa nii Allah Jawmiraawo wi'i.”

¹²Nden Ruuhu Allah eeŋgini yam. Mi nani hoolo semmbiɗŋgo haa ɓaawo am ɗon wi'a: Tedduŋgal laatano Jawmiraawo haa nokkuure mum!

¹³Mi nani hoolo bileeji tagle geete go, ɗi ɗon meemindira e hoolo pallooje go baŋnge maaje e hoolo semmbiɗnde.

¹⁴Ruuhu eeŋgini yam, dilliri yam, mi hooti bee tikkere saatunde nder ɓernde am, ngam juŋngo Jawmiraawo teddani yam.

¹⁵Bana non njottoriimi dahaaɓe jooɗiiɓe haa Tel-Abiba, haa fomoonde maayo Kebar. Mi jooɗi ton caka maɓɓe nyalɗe joweeɗiɗi, mi cakliiɗo.

¹⁶Haa timmoode nyalɗe joweeɗiɗi, Jawmiraawo wolwani yam bolle ɗe'e:

¹⁷“Ɓii-Aadama, mi darni ma a aynoowo yimɓe Isra'iila. A nana wolde wurtotoonde hunnduko am, a reentina[1] ɓe bee innde am.

¹⁸To mi wi'i goɗɗo kalluɗo: Fakat a maayan, an boo a reentinaay mo, a wolwaay, a reentinaay kalluɗo haa o acca laawol maako kalluŋgol, o hisna yoŋki maako, nden kam kalluɗo oo maayan ngam aybe mum, ammaa mi ƴaman ƴiiƴam maako haa maaɗa.

¹⁹Ammaa to a reentini kalluɗo, kaŋko boo o accaay halleende maako, o accaay laawol maako kalluŋgol, nden kam o maayan nder aybe maako, an kam a hisni yoŋki ma.

²⁰To adiliijo acci adilaaku mum, waɗi kalluɗum, to an a reentinaay mo, min boo mi do'i mo, o maayi, nden kam o maayi nder hakke maako, walaa mo siftorta kuuɗe maako adiliije ɗe o huuwi. Ammaa mi ƴaman ƴiiƴam maako haa maaɗa.

²¹To a reentini adiliijo ngam taa o waɗa hakke, to o waɗaay hakke, nden kam o yeeɗan fakat ngam o jaɓi reentineego, an boo a hisni yoŋki ma.”

²²Kadiboo, juŋngo Jawmiraawo naŋngi yam haa Tel-Abiba. O wi'i yam: “Umma, wurta, yah haa waadiwol, haa mi wolwane ton.”

²³Mi ummi, mi wurti, mi yehi haa waadiwol. Ndaa, tedduŋgal Jawmiraawo ɗon dari ton, bana ko ngi'mi haa maayo Kebar. Nden mi sujidi.

²⁴Ruuhu nasti nder am, darni yam dow kosɗe am. Jawmiraawo wolwani yam, wi'i: “Nastu suudu ma, maɓɓu dammugal.

²⁵Ɓii-Aadama, ton yimɓe kaɓɓete bee ɓoggi, ngam taa a wurto, a wonda bee maɓɓe.

²⁶Min boo mi takkan ɗemŋgal ma nder hunnduko ma ngam muukɗingo ma, nden a waawataa felugo ɓe, ngam ɓe tuurtooɓe.

²⁷Ammaa saa'i mi wolwante, mi maɓɓitan hunnduko ma, ngam a yecca ɓe: Ndaa nii Allah Jawmiraawo wi'i. Mo yiɗi nanugo, nanan. Mo saloto boo, nanataa. Ngam ɓe tuurtooɓe fakat.”