Read Fulfulde Ezekiyel 30 Bible Online

Ezekiyel 30 - Fulfulde bible

Ezekiyel 30

¹Ndaa Jawmiraawo wolwani yam, wi'i:

²“Ɓii-Aadama, waɗ annabaaku! A wi'a: Ndaa nii Allah Jawmiraawo wi'i: Mboye! Kayto nyalaade nde'e!

³Nde ɓaditi! Nyalaade Jawmiraawo ɓaditi. Ɗum nyalaade duule nyiɓɓuɗe, nyalaade kiita dow ummaatooje.

⁴Kaafahi waran dow Misra, diwŋgol ukkanto lesdi Etiyopiya. Konne'en mbaran yimɓe nder Misra, njaɓtan jawdi maari, ngartiran ndi bille.

⁵Kaafahi mbaran honooɓe haya iwɓe haa Etiyopiya e Lidiya e Put e Arabiya e Kubu, koo yimɓe iwɓe lesdi alkawal am boo.”

⁶Ndaa nii Jawmiraawo wi'i: “Wallooɓe lesdi Misra njanan, mawnitaare semmbe maari leestan, ɓe ndo'oto dow kaafahi diga Migdol haa Siyene. Min Allah Jawmiraawo wi'i ɗum.

⁷Mi wartiran lesdi Misra ladde meere ko ɓuri lesɗe goɗɗe fuu, mi wilan berniiji maari ko ɓuri berniiji goɗɗi.

⁸To mi jamni yiite nder Misra, to wallooɓe ndi fuu kalki, saa'i man ɓe paaman min woni Jawmiraawo.

⁹To nyalaade man waɗi, Misra boo halki, mi nelan nelaaɓe bee koommbooje haa Etiyopiya'en tabitinɓe jam, kamɓe boo ɓe kultoran. Nyalaade man ɗon wara!”

¹⁰Ndaa nii Allah Jawmiraawo wi'i: “Mi huuwtiniran Nabukodonosor, laamiiɗo Baabila, ngam halkugo risku Misra.

¹¹Kaŋko e yimɓe maako ɓuranɓe woɗɓe fuu saatugo, ɓe ngaran wilugo lesdi. Ɓe losan kaafaaje maɓɓe dow Misra, ɓe kebbina ndi mbaraaɓe.

¹²Mi yoorinan maayo Niil, mi hokkan lesdi haa juuɗe halluɓe. Mi accan jananɓe mbila lesdi ndi'i e ko woni nder maari fuu. Min Jawmiraawo wi'i ɗum.”

¹³Ndaa nii Allah Jawmiraawo wi'i: “Mi nattinan labbi e ɗowanteeɓe fewooɓe nder berniwol Memfis. Laamantooɗo Misra walaa, ammaa mi waɗan kulol nder Misra.

¹⁴Mi wartiran lesdi Paturus ladde meere, mi jamnan yiite nder berniwol Co'an, mi waɗan kiitaaji am haa No[26].

¹⁵Mi rufan tikkere am dow Siin, berniwol Misra'en cemmbiɗŋgol. Mi halkan risku lesdi No.

¹⁶Mi jamnan yiite nder Misra, Siin diwnan ngam kulol. Konne'en ceekan mahi taariiɗi No, ndiyam ilnan berniwol boo.[27]

¹⁷Sukaaɓe berniiji Oon e Pi-Beset maayran bee kaafahi, yimɓe luttuɓe ɓe ndaheteeɓe.

¹⁸Nyiɓre ukkanto berniwol Tahapanes caka nyalawma, saa'i ngewanmi baawɗe Misra, nattinanmi semmbe maɓɓe ɗi ɓe mantori. Duule cuddan Misra, yimɓe berniiji maari ɓe ndaheteeɓe.

¹⁹Bana nii kiitortoomi Misra, Misra'en boo paaman min woni Jawmiraawo.”

²⁰Nder nduuɓu sappo e go'oowu, lewru aranndu, nyannde joweeɗiɗawre maaru, Jawmiraawo wolwani yam, wi'i:

²¹“Ɓii-Aadama, mi yewi juŋngo Firawna, laamiiɗo Misra. Walaa mo haɓɓi ngo ngam nyawndugo ngo, haa ngo heɓta semmbe jogaago kaafahi.

²²Ngam maajum, ndaa nii Allah Jawmiraawo wi'i: Mi honan Firawna, laamiiɗo Misra. Mi yewan juuɗe maako ɗiɗi, yamo e yewaaŋgo fuu, haa kaafahi yana e juŋngo maako.

²³Mi saŋkitan Misra'en nder ummaatooje e lesɗe feere feere fuu.

²⁴Ɓaawo maajum mi semmbiɗinan juuɗe laamiiɗo Baabila, mi hokka mo kaafahi am. Ammaa mi yewan juuɗe Firawna, haa o uuma yeeso laamiiɗo Baabila ngam o juwaaɗo.

²⁵Mi tampinan mo juuɗe, mi semmbiɗinan laamiiɗo Baabila. To mi hokki mo kaafahi am, kaŋko boo o forti ki dow Misra, nden kam koo moy faaman min woni Jawmiraawo.

²⁶Mi saŋkitan Misra'en nder ummaatooje e lesɗe feere feere fuu. Nden ɓe paaman min woni Jawmiraawo.”