Read Fulfulde Ezekiyel 38 Bible Online

Ezekiyel 38 - Fulfulde bible

Ezekiyel 38

¹Ndaa Jawmiraawo wolwani yam, wi'i:

²“Ɓii-Aadama, laar heedi Gog haa lesdi Magog. Kaŋko woni laamiiɗo mawɗo dow ummaatooje Meesek e Tubal. Waɗ annabaaku dow maako,

³yeccu mo: Ndaa nii Allah Jawmiraawo wi'i: An Gog, laamiiɗo mawɗo dow Meesek e Tubal, mi honete.

⁴Mi nastinan ngoodu nder hunnduko ma ngam dasugo ma, mi wurtinte, an e jama'aare konu ma fuu, pucci e wa'iiɓe ɗi ɓorniiɓe limce booɗɗe, jama'aare ɗuuɗnde bee bawarɗe mawɗe e pamare e kaafaaje.

⁵Worɓe diga Persiya e Etiyopiya e Put ɗon ngondi bee maaɗa, koo moy bee wawarde e hufneere njamndi.

⁶Honooɓe fuu diga lesdi Gomer e lesdi Bayti-Togarma daayiiɗum haa woyla, ɗon ngondi bee maaɗa, non boo worɓe diga ummaatooje goɗɗe ɗuuɗɗe.

⁷Sey a taasko booɗɗum, a taaskitina mooɓe honooɓe hawtuɓe haa maaɗa fuu ngam tokkaago umroore ma.

⁸Ɓaawo duuɓi ɗuuɗɗi, mi nelete haɓoygo bee lesdi Isra'iila. Wakkati man, jooɗiiɓe haa lesdi man ndaɗi konu, ɓe acci lesɗe haa ɓe njooɗino. Ɓe kawtoyi dow kooseeje Isra'iila, luttunooɗe bilaa yimɓe duuɓi ɗuuɗɗi. Ɓe ngurti caka ummaatooje goɗɗe, ɓe fuu ɓe ɗon njooɗi ton nder jam.

⁹A waran bana henndu saatundu, bana ruulde ngam suddugo lesdi, an e jama'aare konu ma fuu e ummaatooje ɗuuɗɗe bee maaɗa.”

¹⁰Ndaa nii Allah Jawmiraawo wi'i: “Saa'i man, numooji ummoto nder ɓernde ma, a nufoto kalluɗum.

¹¹A waɗan anniya nastugo lesdi ndi walaa faddoode, a ukkano yimɓe hoolɗiniiɓe, jooɗiiɓe nder gure ɗe ngalaa mahi taariiɗi ɗe, walaa dammuɗe bee palduɗe boo.

¹²A jaɓtan kuuje, a waagan keɓal konu bee honugo yimɓe jooɗiiɓe nder bille nyiɓtaaɗe. Ɓe mooɓtaama diga ummaatooje goɗɗe, jonta ɓe mari tokke e jawdi, ɓe ɗon njooɗi haa caka duniyaaru.

¹³Yimɓe Seba e Dedan e filooɓe berniwol Tarsis e ɓe gure ɓadiiɗe ngol ƴamete: A wari jaɓtugo kuuje na? A mooɓti jama'aaje konu ma ngam waɗugo keɓal, ngam hoocugo cardi e kaŋŋeeri e dabbaaji e jawdi e kuuje ɗuuɗɗe na?

¹⁴Ngam maajum, ɓii-Aadama, waɗ annabaaku. Yeccu Gog: Ndaa nii Allah Jawmiraawo wi'i: Saa'i man, nde yimɓe am Isra'iila'en ɗon njooɗi nder jam, a ummoto,

¹⁵a waran diga nokkuure ma daayiinde haa woyla. A wardan bee jama'aare konu ɗuuɗnde semmbiɗnde nde honooɓe diga ummaatooje ɗuuɗɗe, ɓe fuu ɓe wa'iiɓe pucci.

¹⁶A waran dow Isra'iila ummaatoore am bana ruulde, ngam suddugo lesdi. Haa nyalɗe ragareeje njahranmaami dow lesdi am, haa ummaatooje anndammi, to mi huuwtiniri ma, yaa Gog, ngam mi waŋgina senaare am.

¹⁷Diga ɓooyma mbi'mi bee kunnduɗe jagganiiɓe yam, annabi'en Isra'iila, waɗɓe annabaakuuji duuɓi ɗuuɗɗi bee wi'ugo mi tammi waddugo goɗɗo ngam o ukkano Isra'iila. An woni kaŋko.” Non Allah Jawmiraawo wi'i.

¹⁸Allah Jawmiraawo wi'i: “Nyalaade nde Gog ukkanto Isra'iila, mi tikkan.

¹⁹Ngam daliila tikkere am haajunde, saatunde, mi ɗon huno: Nyalaade man dimmbaaki lesdi cemmbiɗki waɗan nder Isra'iila.

²⁰Liɗɗi e colli e dabbaaji ladde e ladooji fuu e yimɓe wonɓe dow lesdi fuu ndiwnan yeeso am, kooseeje e towndiije e mahi fuu ngibban.

²¹Mi honan Gog dow kooseeje am fuu, min Allah Jawmiraawo wi'i ɗum. Honooɓe maako losan kaafaaje muuɗum'en, mbarmbartiran.

²²Mi hiitoto mo bee nyawu kalluŋgu ndaaɓoowu e dufki ƴiiƴam. Mi toɓnan iyeele cemmbiɗɗe e mallimallooje e yiite e baruudu[33] dow maako e jama'aaje konu maako e ummaatooje ɗuuɗɗe gonduɗe bee maako.

²³Yeeso ummaatooje ɗuuɗɗe mbaŋginanmi mi mawɗo, ceniiɗo. Nden ɓe paaman min woni Jawmiraawo.”