Read Fulfulde Ezekiyel 4 Bible Online

Ezekiyel 4 - Fulfulde bible

Ezekiyel 4

¹Jawmiraawo tokki wi'ugo: “Ɓii-Aadama, hoo'u birikre, wallin nde yeeso maaɗa, diidu suura berniwol Urusaliima dow maare.

²Nden taarnu ngol bee kuuje kipporɗe, waagu lesdi ɗakki mahol maagol ngam hippaago ngol, waɗ caŋngeeje konu nder taarde maagol, ɓadin kuuje ceekruɗe mahol koo toy haa maagol.

³Nden hoo'u beɗol njamndi, darnu ngol bana mahol njamndi hakkunde maaɗa e berniwol. Tiita ngol, ngol kippaaŋgol. An hippoto ngol. Ɗum laatanto yimɓe Isra'iila alaama.

⁴An, waala dow wuttudu ma nanndu, yow aybe yimɓe Isra'iila dow maaɗa. Nyalɗe mbaalortoɗa bana non fuu, a roondoto aybe maɓɓe.

⁵Mi yowani ma nyalɗe deydey limgal duuɓi aybe maɓɓe, ngam maajum a roondoto aybe maɓɓe nyalɗe teemeɗɗe tati e cappanɗe joweenayi (390).

⁶To a timmini nyalɗe ɗe'e, waala fahin dow wuttudu ma nyaamru. A roondoto aybe yimɓe Yahuuda nyalɗe cappanɗe nayi (40), ngam mi yowani ma nyalaade woore haa nduuɓu fuu.

⁷Nden tiita yeeso ma, laar berniwol Urusaliima kippaaŋgol, nyobbu juŋngo limce, fortu juŋngo ma, waɗ annabaaku dow maagol.

⁸Ndaa, mi haɓɓete bee ɓoggi, ngam taa keɓa waylitaago haa wuttudu feere, sey to a timmini nyalɗe ɗe kippotoɗa Urusaliima.

⁹Hoo'u alkamaari e sa'iiruuri e nyebbe e irin nyebbe feere e gawri e irin alkamaari feere, hawtu ɗum haa fayannde, waɗ tamseere bee maajum, nyaam ɗum wakkati mbaalotoɗa dow wuttudu ma nyalɗe teemeɗɗe tati e cappanɗe joweenayi fuu (390).

¹⁰A foonda nyaamdu ma nyalaade fuu reetita kilo, non a nyaamata nder nyalɗe ɗe'e fuu.

¹¹Ndiyam boo, yar liitir gootel nyalaade fuu. Bana non tokkata yarugo nder nyalɗe ɗe'e fuu.

¹²Tamsu tamseere nde'e dow yiite huɓɓiraaŋge bee bu'e yimɓe, waɗ ɗum gite maɓɓe. Nyaam nde bana goɗɗo nyaamrata tamseeje sa'iiruuri.”

¹³Nden Jawmiraawo wi'i: “Bana non Isra'iila'en nyaamrata nyaamdu muuɗum'en soɓndu caka ummaatooje haa ndiiwanmi ɓe.”

¹⁴Mi wi'i: “Kayya, yaa Allah Jawmiraawo, mi meeɗaay soɓnugo hoore am, diga nderkaaku am haa wargo hannde mi meeɗaay nyaamugo dabbaaji baatɗi koo paɗɗaaɗi, kusel nyidduŋgel meeɗaay nastugo hunnduko am.”

¹⁵Jawmiraawo wi'i: “Booɗɗum, mi duŋani ma dubbuɗe na'i mbattudi bu'e yimɓe, ngam tamsugo nyaamdu ma.”

¹⁶Fahin o wi'i yam: “Ɓii-Aadama, mi timminan ndesa nyaamdu nder Urusaliima, haa yimɓe poonda nyaamdu muuɗum'en bee kulol, ɓe poonda ɗuuɗeeŋga ndiyam maɓɓe, ɓe ngonan boo nder kultoreeŋgol.

¹⁷Ɓe cooyan nyaamdu e ndiyam, haa ɓe caklo, ɓe njinna nder aybe maɓɓe.”