Read Fulfulde Ezekiyel 45 Bible Online

Ezekiyel 45 - Fulfulde bible

Ezekiyel 45

¹To on mbaɗi kur'u yeɗango lenyol fuu geɗal mum haa lesdi, sey on ngurtina geɗal gootal, on cena ngal ngam Jawmiraawo. Njuutirka maagal laato kilomeetir sappo e ɗiɗi bee reeta, njaajirka maagal boo kilomeetir sappo. Ngal laato ceniiŋgal nder keeri maagal fuu.

²Tayre woore nder maagal laato ngam saare haykaliiru, meetir teemeɗɗe ɗiɗi bee cappanɗe jowi, non boo babal taarotooŋgal nde, meetir noogas e jowi.

³Haa geɗal lesdi nga'al, sey on poonda tayre woore, njuutirka maare kilomeetir sappo e ɗiɗi bee reeta, njaajirka maare boo kilomeetir jowi. Haykaliiru daroto dow tayre man, kayru woni nokkuure ɓurnde senaago.

⁴Tayre lesdi man woni seniinde, ta'aande ngam liman'en jagganooɓe Jawmiraawo nder haykaliiru. Nde laato nokkuure ngam cuuɗi maɓɓe e nokkuure seniinde ngam haykaliiru.

⁵Tayre ɗiɗawre laato maral Lewi'en huuwooɓe nder haykaliiru. Ɓe nyiɓa gure, ɓe njooɗo ton. Njuutirka tayre man kilomeetir sappo e ɗiɗi bee reeta, njaajirka maare boo kilomeetir jowi.

⁶Sey on ta'a babal ngam berniwol boo. Njuutirka tayre man laato kilomeetir sappo e ɗiɗi bee reeta, njaajirka maare boo kilomeetir ɗiɗi bee reeta, haa keerol geɗal lesdi ceniiŋgal. Tayre man laatanto yimɓe Isra'iila fuu.

⁷Sey on ta'ana laamiiɗo boo lesdi. Diga tayre seniinde e tayre berniwol, gal hiirnaaŋge haa yotto mbeela, gal fuunaaŋge boo haa yotto keerol lesdi. Njuutirka tayre laamiiɗo diga fuunaaŋge haa hiirnaaŋge fotan kal-kal bee njuutirka geɗe le'i Isra'iila.

⁸Tayre man laatoto geɗal laamiiɗo haa lesdi Isra'iila. Bana nii laamiiɓe ɓe'e mbaɗataa yimɓe am rikici, ammaa ɓe accan Isra'iila'en mara lesdi fodde le'i muuɗum'en.

⁹Ndaa nii Allah Jawmiraawo wi'i: “Halleende mon duuri, he'i, onon laamiiɓe Isra'iila! Acce toonyaago e ɓillugo, kuuwe kuuɗe darnuɗe, adiliije! Taa meete riiwugo yimɓe ummaatoore am diga lesdi maɓɓe! Min Allah Jawmiraawo wi'i on ɗum.

¹⁰Koo moy huuwtinira awnorɗum e etirɗum gooŋɗuɗum.

¹¹Etirgal alkamaari e ko nanndi fuu fota kal-kal bee etirgal njaramji e nebbam. Etirgal maŋngal[41] gootal waɗa etirɗe ɗe'e sappo.

¹²Awnorɗi ɓurɗi famɗugo noogas ngaɗa awnorɗum pamarum gootum. Awnorɗi pamari cappanɗe joweego ngaɗa awnorɗum mawɗum gootum[42].

¹³Ndaa no ndokkirton dokkal mooɗon: Haa codol alkamaari, yeɓre woore nder cappanɗe joweego. Haa codol sa'iiruuri, yeɓre woore nder cappanɗe joweego.

¹⁴Haa nebbam, yeɓre woore nder teemerre. Sey on poonda ɗum bee etirgal pamaral. Etirɗe pamare sappo potan bee etirgal maŋngal gootal.

¹⁵On ndokka boo ndammoowa ngoota nder teemeɗɗe ɗiɗi haa durduɗe Isra'iila. Sey on ngadda dokke nyaamdu ɗe'e e dabbaaji guleteeɗi e kirseteeɗi ngam kawtal mooɗon bee am, ngam heɓugo yaafuye hakkeeji mon. Min Allah Jawmiraawo umri ɗum.

¹⁶Ummaatoore lesdi ndi'i fuu yahra dokke ɗe'e haa laamiiɗo Isra'iila.

¹⁷Kaŋko woni kalfitinaaɗo hokkugo dabbaaji guleteeɗi e dokke nyaamdu e dokke inaboojam ngam yimɓe Isra'iila fuu, ngam nyalɗe juulɗe koo ɗeye, ngam juulɗe lewru hesru, ngam nyalɗe ciwtorɗe boo. Kaŋko o hokkan kirseteeɗi ngam ittuki hakke e dokke nyaamdu e guleteeɗi e kirseteeɗi ngam kawtal yimɓe bee am, ngam o heɓna yimɓe Isra'iila yaafuye hakkeeji maɓɓe.”

¹⁸Ndaa nii Allah Jawmiraawo wi'i: “Nyannde go'oore nder lewru aranndu, sey a hoo'a ngaari kalhaldi ndi walaa aybe, ngam senugo haykaliiru.

¹⁹Limanjo hoo'a ƴiiƴam kirseteeŋga ngam ittuki hakke, waɗa ɗam haa darduɗe dammugal haykaliiru koo ngale, non boo haa seɓattooji hirsirde nayi e darduɗe dammugal koo ngale nder nastirɗe haa daldal nderwal.

²⁰Nyannde joweeɗiɗawre nder lewru man, sey a waɗa kal-kal ngam koo moy baɗɗo hakke bilaa anniya malla nder sooynde faamu. Bana nii cenirton haykaliiru.

²¹Nyannde sappo e nayaɓre nder lewru aranndu, on puɗɗa waɗugo juulde Paska. Nyalɗe joweeɗiɗi, sey koo moy nyaama tamseeje ɗe ufnaaka.

²²Nyannde juulde man arannde, sey laamiiɗo lii'ano yam ngaari kalhaldi kirseteendi ngam ittugo hakkeeji maako e hakkeeji yimɓe nder lesdi fuu.

²³Nder nyalɗe juulde joweeɗiɗi ɗe'e, nde weeti fuu, o lii'ano yam ga'i kalhali ɗi ngalaa aybe joweeɗiɗi e jawɗi baali ɗi ngalaa aybe joweeɗiɗi, ɗi guleteeɗi fuu. Non boo njawdiri mbeewa, ndi kirseteendi ngam ittuki hakke. O waɗa ɗum nyalɗe joweeɗiɗi.

²⁴Ɓaawoɗon, o lii'o dokkal nyaamdu alkamaari kilo cappanɗe tati, o ɓesda nebbam liitir nayi dow ngaari e njawdiri mbeewa fuu.”

²⁵“Ngam juulde fuɗɗannde nyannde sappo e jowaɓre nder lewru joweeɗiɗaɓru, laamiiɗo waɗa bana nder juulde bukkaaji. Nyalɗe juulde man joweeɗiɗi fuu, o lii'ano yam, kirseteeŋga ngam heɓugo yaafuye hakkeeji e guleteeɗi e dokke nyaamdu e nebbam go nyalaade fuu.”