Read Fulfulde Ezekiyel 46 Bible Online

Ezekiyel 46 - Fulfulde bible

Ezekiyel 46

¹Ndaa nii Allah Jawmiraawo wi'i: “Sey ɓe maɓɓa nastirde fuunaaŋgeere haa daldal nderwal nder nyalɗe joweego ɗe kuugal. Ammaa ɓe maɓɓita nde nyannde siwtorde e nyannde juulde lewru hesru boo.

²Laamiiɗo waran diga daldal yaasiwal, saaloto zawleeru cakaaru. O daroto kommbi wa'orde dammugal, saa'i liman'en lii'oto nguleteeŋga maako e kirseteeŋga maako ngam kawtal yimɓe bee Allah. O turoto, o sujidanammi ton haa les dammugal, nden o lorto. Ammaa nastirde maɓɓataake haa yotto maŋngariba.

³Ngam nyannde siwtorde e nyannde juulde lewru hesru, yimɓe ummaatoore lesdi ngaran sujidango yam, min Jawmiraawo yeeso nastirde nde'e.

⁴Nyannde siwtorde, laamiiɗo lii'anto yam guleteeɗi ɗi ngalaa aybe, njawkoy joweego e njawdiri mbaalu.

⁵O ɓesda dow man dokkal nyaamdu kilo cappanɗe tati haa njawdiri mbaalu fuu. Dow njawkoy boo, o ɓesda dokkal nyaamdu bana o yiɗi. O ɓesda nebbam liitir nayi ngam dokkal nyaamdu kilo cappanɗe tati.

⁶Nyannde juulde lewru hesru, o lii'o ngaari kalhaldi e njawkoy njoweego ɗum ngalaa aybe, non boo njawdiri mbaalu.

⁷Haa ga'i e jawɗi, o ɓesda dokkal nyaamdu kilo cappanɗe tati dow ngoori fuu, dow njawkoy boo, o ɓesda dokkal nyaamdu bana o yiɗi. O ɓesda nebbam liitir nayi ngam dokkal nyaamdu kilo cappanɗe tati.

⁸Laamiiɗo nastan gal zawleeru cakaaru, o wurtorto boo bee laawol man.

⁹Ammaa, to yimɓe lesdi ngari sujidango yam, min Jawmiraawo nder nyalɗe juulɗe, nastanɓe gal nastirde woylaare haa daldal yaasiwal ngurtoto gal fombinaare. Nastanɓe gal fombinaare boo ngurtoto gal woylaare. Walaa goɗɗo wurtoto gal laawol ngol o nastiri, sey koo moy wurtoro haa wakeere gaɗaare.

¹⁰Sey laamiiɗo nasta saa'i yimɓe nastata, o wurto boo saa'i ɓe ngurtoto.

¹¹Nder nyalɗe juulɗe fuu, dokkal nyaamdu kilo cappanɗe tati haa ngaari fuu malla haa njawdiri mbaalu ngam kirseteeŋga fuu waɗete. Ngam njawkoy boo, ɗum waɗete fodde ko goɗɗo man yiɗi hokkugo. Nebbam liitir nayi ɓesda ngam dokkal nyaamdu kilo cappanɗe tati.

¹²To laamiiɗo yiɗi lii'anaago Jawmiraawo dokkal caahiiŋgal, koo ɗum nguleteeŋga koo ɗum kirseteeŋga ngam kawtal yimɓe bee am, sey ɓe maɓɓitana mo nastirde fuunaaŋgeere. O lii'o dokkal man bana nder nyalaade siwtorde. Ɓaawo wurtaago maako, ɓe maɓɓa nastirde man.”

¹³Jawmiraawo wi'i: “Nde weeti fuu, sey a lii'ano yam, min Jawmiraawo jawgel ngel nduuɓu, guleteeŋgel, ngel walaa aybe.

¹⁴Fajiri fuu, a lii'ano Jawmiraawo dokkal nyaamdu kilo jowi jiiɓaaŋgal bee nebbam liitir gootel. Ɗum farilla nduumiika haa foroy.

¹⁵Sey ɓe lii'ano Jawmiraawo jawgel guleteeŋgel e dokkal nyaamdu e nebbam fajiri fuu, haa foroy.”

¹⁶Ndaa nii Allah Jawmiraawo wi'i: “To laamiiɗo hokki gooto nder ɓiyum'en tayre lesdi maral muuɗum, tayre man laatoto maral ɓii laamiiɗo oo, nde laati geɗal ndonŋgu maako, ɗum laatoto ndonŋgu ɓiyiiko'en boo.

¹⁷Ammaa to laamiiɗo hokki gooto nder saraaki'en muuɗum tayre lesdi maral muuɗum, nden kam tayre man lortanto laamiiɗo nder hitaande dimɗineeki[43]. Nde maral maako, ndonŋgu ɓiyum'en.

¹⁸Ammaa taa laamiiɗo jaɓta maral ngal yimɓe lesdi man mari. Taa o riiwa yimɓe diga maral muuɗum'en. Sey o ronna ɓiyum'en maral maako tan.”

¹⁹Ɓaawo maajum, goɗɗo go yahri yam haa dammugal suudu baŋnge nastirde woylaare, taytaaji liman'en ceniiɗi ɗon nder suudu man. O sappini yam nokkuure haa nder, wakeere hiirnaaŋgeere,

²⁰o wi'i yam: “Ndaa haa to liman'en ndefata kusel dabbaaji kirsaaɗi ngam ittuki hakke e joɓki aybe, haa ɗo ɓe tamsata boo dokke nyaamdu, ngam taa ɓe ndoondo kuuje ceniiɗe haa daldal yaasiwal, taa yimɓe meema kuuje ceniiɗe ɗe'e.”

²¹Nden o yahri yam haa daldal yaasiwal, o saalini yam gal seɓattooji maagal nayi fuu. Woodi dalde pamare haa maaji. Njuutirka daldal fuu waɗi meetir noogas, njaajirka maagal boo meetir sappo e jowi.

²³Mahol kaa'e taari ngal, kaataneeji yiite ɗon ɗakkotiri bee mahol man.

²⁴Goɗɗo go wi'i yam: “Haa ɗo huuwooɓe nder haykaliiru ndefata kusel dabbaaji kirsaaɗi ɗi ummaatoore waddata.”