Read Fulfulde Ezekiyel 5 Bible Online

Ezekiyel 5 - Fulfulde bible

Ezekiyel 5

¹“Ɓii-Aadama, hoo'u kaafahi belki, huuwtinir ki bana beluhi, laɓ hoore ma e wakkude ma. Nden hoo'u awnorɗum ngam senndugo gaasa hoore e wakkude geɓe geɓe.

²Wul yeɓre woore bee yiite haa caka berniwol to nyalɗe kippol maagol timmi. Hoo'u yeɓre woore, ta'u nde bee kaafahi nder taarde berniwol fuu. Saŋkitit yeɓre tataɓre haa henndu. Min boo mi taasnan ɗum bee kaafahi losaaki.

³Nden hoo'u seɗɗa diga yeɓre gaasaaji go, haɓɓu ɗi haa gawargal limce ma.

⁴Hoo'u goɗɗi maaji, ruf ɗi nder yiite, wul ɗi. Yiite wurtoto diga maaji, nyaaman yimɓe Isra'iila fuu.”

⁵Ndaa nii Allah Jawmiraawo wi'i: “Mi jo'ini berniwol Urusaliima ngo'ol haa caka ummaatooje, mi taarni ngol bee lesɗe goɗɗe.

⁶Ammaa ngol tuurtani kiitaaji am e farillaaji am bee halleende ɓurnde nde ummaatooje e lesɗe taariiɗe ngol. Ngam yimɓe maagol ngudini kiitaaji am, ɓe ngeeɗaay fodde farillaaji am.

⁷Ngam maajum, ndaa nii Allah Jawmiraawo wi'i: Onon on tuurtani yam ko ɓuri ummaatooje taariiɗe on, on ngeeɗaay fodde farillaaji am e kiitaaji am, on ngeeɗaay koo fodde kiitaaji ummaatooje taariiɗe on.

⁸Ngam maajum, ndaa nii Allah Jawmiraawo wi'i: Jonta min bee hoore am mi honan on! Mi waɗan kiitaaji caka mooɗon gite ummaatooje ɗe'e.

⁹Mi waɗan on ko mi meeɗaay waɗugo, mi meetataa waɗugo irin maajum boo, ngam daliila kuuɗe mon nyidduɗe fuu.

¹⁰Ngam maajum baabiraaɓe nyaaman ɓikkoy muuɗum'en nder berniwol mooɗon, ɓikkoy nyaaman baabiraaɓe muuɗum'en. Mi waɗan kiitaaji am caka mooɗon, mi saŋkitan luttuɓe mooɗon haa alkibilaaji fuu.

¹¹Fakat min Allah Jawmiraawo, mi geeto! On coɓni suudu am seniindu bee labbi mon e kuuɗe mon nyidduɗe fuu. Ngam maajum mi daaytoto on, mi laarataa on bee enɗam, mi yurmintaa on sam.

¹²Yeɓre mon woore nder tati maayan bee nyawu kalluŋgu ndaaɓoowu e weelo, yeɓre mon woore nder tati boo kaafahi do'an nde haa ko taari on, yeɓre luttunde boo, mi saŋkitan nde haa alkibilaaji fuu, mi losan kaafahi, mi taasnan nde.

¹³Mi rufdan tikkere am fuu dow maɓɓe, mi de'itinan ɓernuki am, mi feewnan ɓernde am. Nden, ɓe paaman min Jawmiraawo wolwi ɗum nder kaajal am to mi rufdi tikkere am fuu dow maɓɓe.

¹⁴Mi laatinan berniwol mon winnde. Ummaatooje taariiɗe on njancan ngol, non boo saalotooɓe yi'anɓe ngol fuu.

¹⁵Ummaatooje taariiɗe on fuu njancan ngol, kuɗan bee innde maagol. Ngol laatoto kulniiŋgol ngam reentingo koo moy, saa'i mi hiitoto on bee tikkere e ɓernuki e ɓocci caatuɗi. Min Jawmiraawo wi'i ɗum.

¹⁶Mi neldan weelo dow mooɗon ngam nattingo on, ngo naawnan on bana naawne kuri. Mi saatinan weelo dow mooɗon, ngam mi halkan nyaamduuji ɗi on cigi fuu.

¹⁷Mi neldan weelo e dabbaaji mbarooji haa ɗi mbara ɓikkoy mooɗon. Nyawu kalluŋgu ndaaɓoowu e dufki ƴiiƴam laatoto caka mooɗon, mi ukkan kaafahi dow mooɗon boo. Min Jawmiraawo wi'i ɗum.”