Read Fulfulde Ezekiyel 7 Bible Online

Ezekiyel 7 - Fulfulde bible

Ezekiyel 7

¹Ndaa Jawmiraawo wolwani yam, wi'i:

²“Ɓii-Aadama, ndaa nii Allah Jawmiraawo wolwani jooɗiiɓe haa lesdi Isra'iila: Ɗum timmoode! Timmoode ɗon wara dow keeri lesdi nayi fuu.

³Jonta timmoode ɗon wara dow mooɗon. Mi neldan tikkere am dow mooɗon, mi hiitoto on fodde kuuɗe mooɗon, mi ƴamtan on kuuɗe mooɗon nyidduɗe fuu.

⁴Mi laarataa on bee enɗam sam, mi yurmintaa on. Ammaa mi ƴamtan on daliila gikku mon, kuuɗe mon nyidduɗe mbaŋgan caka mooɗon. Nden kam on paaman min woni Jawmiraawo.”

⁵Ndaa nii Allah Jawmiraawo wi'i: “Sarru dow sarru! Ndaa ngu ɗon wara!

⁶Timmoode ɗon wara, timmoode ɗon wara! Nde ukkanto on.

⁷Onon yimɓe lesdi, wakkati yottake, nyalaade ɗon ɓadito, ɗum nyalaade saklere, walaa hoolo seyo dow kooseeje fahin.

⁸Jonta mi ɓadi rufugo ɓernuki am dow mooɗon, haa mi rufda tikkere am fuu dow mooɗon, mi hiito on fodde kuuɗe mon, mi ƴamtan on kuuɗe mon nyidduɗe.

⁹Mi laarataa on bee enɗam, mi yurmintaa on sam. Ammaa mi ƴamtan on daliila gikku mon, kuuɗe mon nyidduɗe mbaŋgan caka mooɗon. Nden on paaman min Jawmiraawo fiyi on.

¹⁰Ndaa nyalaade go! Ndaa, nde yottake! Wakkati halkere waɗi! Toonyaare ɗon ɓesdo, mawnitaare ɗon mawna,

¹¹toonyaare ɗon ummo ngam laataago ɓoccol halleende. Ɓe majji, walaa risku, walaa mooɓre yimɓe, walaa maŋngu luttani ɓe!

¹²Wakkati yottake, nyalaade go yottake! Taa coodoowo seyo, taa coorroowo boo suno! Ngam mi ɗon tikkana mooɓgal yimɓe lesdi fuu.

¹³Coorroowo heɓtataa ko soorri, koo to o ɗon bee yoŋki, ngam mi waylataa tikkere am dow mooɓre yimɓe. Walaa mo hisnata yoŋki mum daliila zunuuba mum.

¹⁴Ɓe puufan luwal, ɓe taaskanto konu. Ammaa walaa mo wurtoto ngam yahugo haɓre, ngam mi ɗon tikkana mooɓgal lesdi fuu.

¹⁵Haa yaasi, kaafahi ɗon, haa nder boo nyawu kalluŋgu ndaaɓoowu e weelo. Mo ɗon haa ladde, maayran bee kaafahi. Mo ɗon nder berniwol, nyawu kalluŋgu ndaaɓoowu e weelo mbaran ɗum.

¹⁶Daɗɓe maɓɓe kisan dow kooseeje bana pooli boyooji, fuu maɓɓe ɓe uumoto, koo moy ngam zunuuba mum.

¹⁷Juuɗe maɓɓe tampan, koppi fuu ndiwnan.

¹⁸Ɓe ɓornoto limce buhuuje, kultoreeŋgol suddan ɓe, geese maɓɓe fuu keewan semteende, ɓe fuu ɓe pemmban gaasa ko'e maɓɓe daliila toskaare maɓɓe.

¹⁹Ɓe ngudinan cardi maɓɓe haa laabi, kaŋŋeeri maɓɓe laatoto huunde soɓnde. Cardi maɓɓe e kaŋŋeeri maɓɓe mbaawataa hisnugo ɓe nyalaade nde tikkere Jawmiraawo waŋgata. Ɓe kaarataa fahin, ɓe kebbintaa deeɗi maɓɓe, ngam cardi e kaŋŋeeri man nastini ɓe nder zunuuba.

²⁰Ɓe mantori kuuje maɓɓe marɗe saman, ɓe mbaɗi labbi e kuuɗe nyidduɗe bee maaje. Ngam maajum ngartiranmi ɗum fuu coɓɗum ngam maɓɓe.

²¹Mi hokkan ɗum haa juuɗe jananɓe, ɓe njaɓta ɗum, ɗum laatoto keɓal halluɓe wonɓe haa lesdi man, ngam ɓe coɓna ɗum.

²²Mi wiirnan ɓe gite am, ɓe coɓnan ndesaari am, jaɓtooɓe nastan haa maari, coɓnan ndi.

²³Waɗ callallu[3]! Ngam lesdi heewi aybeeji dufki ƴiiƴam, berniwol boo heewi toonyaare.

²⁴Mi waddan ummaatooje ɓurɗe hallugo, honooɓe maaje njaɓta ci'e maɓɓe. Mi halkan mawnitaare semmbiɗɓe, nokkuuje maɓɓe ceniiɗe coɓan.

²⁵Kultoreeŋgol waran. Saa'i man ɓe ɗaɓɓitan salaaman, ammaa ɗum walaa.

²⁶Sarru dow sarru, habaruuji kalluɗi tokkindiran. Ɓe ƴaman wahayuuji haa annabiijo, ɓe keɓataa ekkitinol haa liman'en, koo sawari haa ndotti'en.

²⁷Laamiiɗo sunoto, ardiiɗo ɓornoto kultoreeŋgol, juuɗe yimɓe lesdi fuu ndiwnan. Mi waɗan ɓe fodde kuuɗe maɓɓe, mi hiitoto ɓe bana no kamɓe ɓe kiitori. Nden ɓe paaman min mi Jawmiraawo.”