Read Fulfulde Ezekiyel 9 Bible Online

Ezekiyel 9 - Fulfulde bible

Ezekiyel 9

¹Nden nanmi Jawmiraawo towni sawtu, wi'i: “Ɓadite, onon hiitooɓe berniwol, koo moy bee kuuwruɗum nattinoojum haa juŋngo mum!”

²Ndaa worɓe njoweego ɗon ngara dow laawol iwŋgol dammugal ɓaŋgiiŋgal tiitanŋgal woyla, koo moy maɓɓe ɗon jogi kuuwruɗum nattinoojum. Haa caka maɓɓe woodi goɗɗo ɓorniiɗo limce leŋ[5] e o ɗon bee dawaaru e binndirgol haa taadorgol mum. Ɓe ngari, ɓe ndari haa hirsirde nde njamndi mboɗeeri.

³Tedduŋgal Allah Isra'iila ummi diga keruba'en, wari haa les dammugal haykaliiru. Nden Jawmiraawo ewni ɓorniiɗo limce daneeje, bee kuuje binndirɗe go,

⁴Jawmiraawo wi'i mo: “Saala caka berniwol Urusaliima, waɗ maandorde dow tiinde siŋkanɓe e uumanɓe ngam daliila kuuɗe nyidduɗe kuuweteeɗe haa ɗo fuu.”

⁵Nden mi nani o wi'i woɗɓe: “Tokke mo nder berniwol, piye, taa ndaare goɗɗo bee enɗam, taa njurmine koo moye!

⁶Mbare nayeeɓe e sukaaɓe e faanyɓe rewɓe e ɓikkoy e rewɓe. Ammaa marɗo maandorde fuu taa meeme mo. Puɗɗe haa suudu am seniindu!” Ɓe puɗɗi bee ndotti'en wonɓe yeeso haykaliiru.

⁷O wi'i ɓe: “Coɓne haykaliiru, kebbine dalde maaru bee maayɓe! Nden ngurte!” Ɓe ngurti ɓe mbari yimɓe nder berniwol.

⁸Saa'i ɓe ɗon mbara, mi lutti feere am, mi sujidi, mi wooki, mi wi'i: “Kayya! Yaa Allah Jawmiraawo, a timminan luttuɓe Isra'iila bee rufugo tikkere ma dow Urusaliima na?”

⁹O jaabi yam: “Aybe yimɓe Isra'iila e Yahuuda mawni masin. Lesdi heewi mbar-hoore, berniwol boo heewi toonyaare, ngam ɓe ɗon mbi'a: Jawmiraawo wudini lesdi, yi'ataa ɓe.

¹⁰Ngam maajum min boo mi enɗataa, mi yurmintaa. Mi lornan kuuɗe maɓɓe dow ko'e maɓɓe.”

¹¹Ndaa, ɓorniiɗo limce leŋ bee dawaaru e binndirgol haa taadorgol mum go warti, wi'i: “Mi waɗi ko umruɗaami go.”