Read Fulfulde Daniyel 10 Bible Online

Daniyel 10 - Fulfulde bible

Daniyel 10

¹Nder nduuɓu Koores, laamiiɗo Persiya, tataɓu, Allah wolwani Daniyel bi'eteeɗo Beltesacar. Wolde nde'e ɗum gooŋga: Haɓre mawnde waɗan. Daniyel faami wolde man, o faami boo wahayu man.

²Saa'i man min Daniyel mi jooɗi nder suno asaweeje tati.

³Mi nyaamaay nyaamdu welndu, mi nyaamaay kusel, mi yaraay inaboojam boo. Mi wujaaki sam haa asaweeje tati man caali.

⁴Nyannde noogas e nayaɓre nder lewru aranndu hitaande man mi ɗonno haa fomoonde Tigiris, maayo maŋngo.

⁵Mi tijji dow, mi yi'i goɗɗo ɓorniiɗo limce daneeje, taadiiɗo taadorgol kaŋŋeeri Ufas.

⁶Ɓanndu maako ɗon ɗelka bana hayre kirisoliti. Yeeso maako ɗon yayna bana ma'ere, gite maako laati bana tostilamji. Juuɗe maako e kosɗe maako ɗon ɗelka bana njamndi mboɗeeri ɓolinaandi. Sawtu maako ɗon iida bana hoolo jama'aare ɗuuɗnde.

⁷Min Daniyel feere am yi'i wahayu man. Wonduɓe bee am ngi'aay koo ɗume, ammaa kulol maŋngol naŋngi ɓe, ɓe ndoggi haa ɓe nyukko.

⁸Mi lutti feere am, mi ɗon yi'a wahayu mawɗo oo. Semmbe am fuu jinni, yeeso am nyiɓɓi jamum, mi tampi.

⁹Mi nani bolle maako. Nde mi ɗon nana bolle ɗe'e, faɗɗere hoosi yam, mi hippi dow lesdi.

¹⁰Nden juŋngo goɗɗo meemi yam, darni yam dow juuɗe am e koppi am nde mi ɗonno diwna tawon.

¹¹Nden o wi'i yam: “Daniyel, a ɗuuɗa-samanjo. Umma, faamu ko mi wi'ete e dara haa nokkuure nde ngonɗa ngam Allah neli yam haa maaɗa.” Nde o wi'i ɗum, mi ummi mi dari, mi ɗon diwna.

¹²Nden o wi'i: “Taa hul, Daniyel! Allah ma nani do'a ma diga nyannde aranndeere nde tefɗa faamu e leesnuɗa hoore ma yeeso maako. Min mi wari ngam daliila do'a ma.

¹³Ammaa malaa'ikaajo aynoowo laamu Perezzi'en dartani yam nyalɗe noogas e go'o. Nden Mika'iilu[13], gooto nder hoore'en malaa'ika'en, wari, walli yam, mi jooɗi ton kommbi laamiiɓe Perezzi'en.

¹⁴Mi wari jonta ngam faamtingo ma ko heɓata ummaatoore ma yeeso ɗo ngam woodi boo wahayu ngam nyalɗe garanɗe ɗe'e.”

¹⁵Nde o ɗon wolwa bolle ɗe'e, mi turi hoore am les, mi waawaay wolwugo.

¹⁶Nden tagaaɗo nannduɗo bee neɗɗo meemi hunnduko am. Mi maɓɓiti hunnduko, mi waawi wolwugo fahin. Mi wi'i dariiɗo yeeso am: “Jawmam, cakle ukkanake yam e mi walaa semmbe fahin daliila wahayu man.

¹⁷Min mi maccuɗo dariiɗo yeeso ma, an jawmam. Noy mbolwiranmi bee maaɗa? Mi tampi masin, poofɗe am maa ɗon ta'a!”

¹⁸Fahin nannduɗo bee neɗɗo go meemi yam, semmbiɗini yam,

¹⁹wi'i yam: “Taa hul, an ɗuuɗa-samanjo! Salaaman wonda bee ma, tiɗɗin ɓernde!” Diga o ɗon wolwa tawon mi heɓti semmbe am. Nden mbi'mi: “Jawmam, wolwu ngam a semmbiɗini yam.”

²⁰Nden o wi'i: “A anndi ngam ɗume ngarmi haa ma na? Sey mi loro jonta, mi haɓa bee malaa'ikaajo aynoowo Persiya. Saa'i mi ɗon dilla, malaa'ikaajo aynoowo Yunaniya waran.

²¹Ammaa sey mi anndine ko winnda nder Deftere Gooŋga. Walaa mo wallatammi nder konu bee maɓɓe, sonaa Mika'iilu, malaa'ikaajo aynoowo on.”