Read Fulfulde Daniyel 11 Bible Online

Daniyel 11 - Fulfulde bible

Daniyel 11

¹Nder nduuɓu laamiiɗo Dariyus, Mediijo, aranu, min Daniyel, mi ɗonno kommbi maako ngam wallugo e semmbiɗingo mo.

²Jonta, haa mi anndine gooŋga: “Laamiiɓe tato laamanto Persiya. Nden nayaɓo waran, o ɓurdan ɓeya go fuu risku. Nde baawɗe maako ɓesdi daliila risku maako, o umminan yimɓe fuu ngam haɓugo bee laamu Yunaniya.

³Ammaa laamiiɗo cemmbiɗɗo waran. Kaŋko o laamoto bee baawɗe mawɗe, o waɗan ko o yiɗi fuu.

⁴To o tabiti, laamu maako do'oto, senndoto haa alkibilaaji nayi fuu. Yimɓe danygol maako keɓataa ngu, baawɗe maagu boo ustan, ngu wilete, woɗɓe laamoto pellel maɓɓe.

⁵Nden laamiiɗo fombina semmbiɗan. Ammaa gooto caka mawɓe honooɓe maako ɓuran mo semmbe, o laamoto bee baawɗe mawɗe.

⁶Ɓaawo duuɓi seɗɗa, laamiiɗo fombina hokkan ɓiyum debbo haa laamiiɗo woyla ngam soobrugo bee maako, laamiiɓe ɓe'e kaɓɓan alkawal. Ammaa ɓiɗɗo debbo oo waawataa jogitaago baawɗe muuɗum, danygol maako boo dartataako. Wakkati man, ɓiɗɗo debbo oo e ɗoftooɓe ɗum e baaba muuɗum[14] e balluɗo ɗum, ɓe mbareteeɓe.

⁷Banndiraawo maako gooto ummoto haa pellel maako, o nastan hisrude laamiiɗo woyla, o haɓan bee mooɓre konu muuɗum, o jaaloto ɓe.

⁸O hoocan labbi maɓɓe e suuraaji maɓɓe ɓolinaaɗi e kuuje maɓɓe ɗuuɗa-samanje ɗe cardi e kaŋŋeeri, o yahran ɗi haa Misra. Nden o daayoto laamiiɗo woyla duuɓi seɗɗa.

⁹Ɓaawo man laamiiɗo oo ukkanto laamiiɗo fombina, nden o loroto haa lesdi maako.

¹⁰Nden ɓiɓɓe laamiiɗo woyla taaskanto konu, ɓe mooɓtan honooɓe ɗuuɗɓe. Mooɓgal nga'al ummoto, suddan lesdi bana maayo teelanŋgo[15], ngal saaloto e ngal ummoto fahin ngam haɓugo haa yotto hisrude laamiiɗo.

¹¹Laamiiɗo fombina tikkan, yahan haɓugo bee laamiiɗo woyla. Jama'aare konu woyla yanan haa juŋngo maako.

¹²Laamiiɗo fombina dahan jama'aare haɓɓaande nde'e. Ɓernde maako mawnititto, o mbaran ujineeje ɗuuɗɗe caka maɓɓe ammaa o jaalaataako.

¹³Laamiiɗo woyla loroto, mooɓtan jama'aare konu ɓurannde nde naane ɗuuɗugo. Ɓaawo duuɓi seɗɗa o wardan fahin bee jama'aare konu mawnde e kuuje konu ɗuuɗɗe.

¹⁴Wakkati man ɗuuɗɓe ummanto laamiiɗo fombina. Woɗɓe toonyooɓe nder ummaatoore maaɗa mbaɗan tuurtol ngam hiɓɓingo wahayu go, ammaa ɓe pergoto.

¹⁵Laamiiɗo woyla waran hippugo berniwol cemmbiɗŋgol, ɓe mbaagan lesdi ɗakki mahol, ɓe nyaaman ngol. Honooɓe fombina waawɓe konu, koo suɓaaɓe maɓɓe ndartataako, ɓe keɓataa semmbe ngam dartaago.

¹⁶Konneejo nastuɗo lesdi maɓɓe waɗan ko o yiɗi fuu, walaa mo waawata dartango mo. O daroto haa lesdi ɓurndi wooɗugo[16] o nattinan ko o yiɗi fuu.

¹⁷Laamiiɗo woyla anninto wargo bee baawɗe laamu mum fuu ngam soobrugo bee laamiiɗo fombina, o hokkan mo ɓiyiiko debbo. Bana nii o ɗaɓɓirta halkugo mo, ammaa dabare maako nafataa, ɗum waɗataako.

¹⁸Ɓaawo man o waylititto gal ummaatooje haa fomoonde mbeela, o jaaloto ɗuuɗɗe maaje. Ammaa ardiiɗo konu timminan mawnitaare maako, laamiiɗo oo waatataako koo ɗume

¹⁹Nden o lortoto haa berniiji cemmbiɗɗi nder lesdi maako, ammaa o fergoto, o do'oto. Bana non o halkirta.

²⁰Goɗɗo feere laamoto haa pellel maako. Kaŋko o nelan toonyoowo nder nokkuure teddunde nder laamu. Ammaa ɓaawo duuɓi seɗɗa, o mbareteeɗo, naa bee konu, naa daliila tikkere boo.”

²¹“Ɓaawo man goɗɗo jawaaɗo, mo he'aay teddineego, waɗan rikici, jaɓtan laamu saa'i ummaatoore ɗon nder de'itaare.

²²O halkan jama'aaje konu teelanɗe yeeso maako, o halkan koo hooreejo ummaatoore Alkawal boo.

²³O haɓɓan alkawal bee woɗɓe, ammaa o zammboto ɓe. Koo to yimɓe maako ɗuuɗaay, o ɓesdan baawɗe.

²⁴Nder de'itaare, o nastan nder geɓe lesdi ɓurɗe semmbe. O waɗan ton kuuɗe ɗe baabiraaɓe e kaakiraaɓe maako meeɗaay sam. Keɓal konu fuu boo o yeɗanan yimɓe maako. O numan boo dabareeji dow cuuɗi cemmbiɗɗi, ammaa ɗum neeɓan wakkati seɗɗa non.

²⁵Nden o tiɗɗinan semmbe e ɓernde maako, o darnan mooɓre konu ɗuuɗnde ngam honugo laamiiɗo fombina. Kaŋko boo o taaskitinan mooɓre ɗuuɗnde, semmbiɗnde masin ngam haɓre bee oya. Ammaa o tabitittaako ngam ɓe kaɓɓan dabareeji dow maako.

²⁶Nyaamdanɓe bee maako ndo'an mo. Mooɓre konu maako jaalete, honooɓe maako ɗuuɗɓe maayan.

²⁷Nden laamiiɓe ɗiɗo ɓe nufoto kalluɗum, ɓe pewpewtiran koo to ɓe nyaamdan pellel gootel boo. Ammaa nufaye maɓɓe hiɓɓataa, ngam wakkati timmoode siwaa.

²⁸Laamiiɗo woyla hootan lesdi muuɗum bee jawdi ɗuuɗndi. O hoocan anniya dartanaago ummaatoore nde Allah haɓɓi alkawal bee maare. O waɗan ko fottani mo, nden o hootan.

²⁹To wakkati waɗi, o ummanto Lesdi Fombina fahin. Ammaa ɗum timmataa bana naane.

³⁰Kitti'en ummoto dow maako bee koommbooje, o tampan nden o loroto. O ukkan tikkere maako dow ummaatoore nde Allah haɓɓi alkawal bee maare. Nden o lortan, o yerdoto numo accuɓe alkawal nga'al.

³¹Honooɓe ɓe o neli ummoto, ɓe coɓnan nokkuure seniinde laatiinde hisrude. Ɓe kaɗan lii'anaago Allah kirseteeɗi nyalaade nyalaade, ɓe njo'inan ko wi'ete nyidduɗum nattinoojum.

³²Fiistuɓe alkawal Allah, laamiiɗo estan ɓe bee pewe mum. Ammaa ummaatoore anndunde Allah muuɗum dartoto bee semmbe.

³³Marɓe faamu, wonɓe caka ummaatoore paamtinan ɗuuɗɓe. Wakkati seɗɗa woɗɓe maɓɓe ɓe mbareteeɓe bee kaafahi malla bee yiite, woɗɓe ɓe ndaheteeɓe, woɗɓe boo ɓe njaɓtan kuuje maɓɓe.

³⁴Saa'i torra ka'a, ɓe keɓan ballal seɗɗa, woɗɓe boo kawtanan ɓe nder rikici.

³⁵Marɓe faamu woɗɓe ɓe mbareteeɓe. Ɗum laatoto ngam laɓɓingo e senugo yimɓe, haa to timmoode wari, ngam wakkati maare siwaa.

³⁶Laamiiɗo waɗan ko fottani mo. O mawnititto, o laaran hoore maako bana o ɓuri ɗowanteeɓe fuu mawnugo, o wolwan bolle elewɗe dow Allah Ɓaŋiiɗo. O heɓan hayru haa to tikkere Allah hiɓɓi ngam Allah waɗan ko o taynori.

³⁷Laamiiɗo oo hakkilantaa ɗowanteeɓe kaakiraaɓe muuɗum. O hakkilantaa ɗowanteeɗo mo rewɓe ngiɗi, koo ɗowanteeɗo feere, ngam o mawninan hoore maako dow koo ɗume fuu.

³⁸Ammaa o teddinan ɗowanteeɗo aynoowo berniiji cemmbiɗɗi. O lii'oto kaŋŋeeri e cardi e kaa'e marɗe saman e dokke goɗɗe haa ɗowanteeɗo mo kaakiraaɓe maako anndaano.

³⁹O hippan kisruɗe cemmbiɗɗe bee ballal ɗowanteeɗo jananno. Jaɓɓe mo bana laamiiɗo fuu, o teddinan ɓe, o hokkan ɓe baawɗe dow yimɓe ɗuuɗɓe, o warjoto ɓe babe boo.

⁴⁰To wakkati timmoode yottake, laamiiɗo fombina ukkanto mo. Laamiiɗo woyla jippoto dow maako bee mootaaji pucci e wa'iiɓe pucci e koommbooje ɗuuɗɗe. O nastan lesɗe goɗɗe, o suddan ɗe bana maayo teelanŋgo, o saaloto.

⁴¹O nastan boo lesdi ɓurndi wooɗugo, o mbaran ton yimɓe ɗuuɗɗe. Ammaa lesɗe Edoom e Mo'ab e mawɓe Ammoon ndaɗan.

⁴²O yowan baawɗe maako dow lesɗe ɗuuɗɗe, koo Misra boo daɗataa mo.

⁴³O jaɓtan ndesaaji Misra: kaŋŋeeri e cardi e kuuje ɗuuɗa-samanje goɗɗe fuu. Yimɓe Libiya e Etiyopiya[17] leestanan mo.

⁴⁴Ammaa ɓaawo man kubaruuji garanɗi diga fuunaaŋge e woyla kulnan mo. Ngam maajum o tikkan masin, o wurtoto ngam halkugo e nattingo yimɓe ɗuuɗɓe.

⁴⁵O darnan laymaaji laamorde maako hakkunde beeli gal hooseere ɓurnde wooɗugo waato hooseere seniinde. Nden balɗe maako timman, walaa ballanɗo mo.”