Read Fulfulde Daniyel 12 Bible Online

Daniyel 12 - Fulfulde bible

Daniyel 12

¹“Saa'i man Mika'iilu, malaa'ikaajo mawɗo, aynoowo ummaatoore ma waŋgan. Saa'iire ɓillaare naawnde laatoto, irin maare meeɗaay laataago diga ummaatooje njooɗi. Saa'i man yimɓe ummaatoore ma, ɓe inɗe muuɗum'en ɗon mbinndi nder deftere kisan.

²Waaliiɓe ɗuuɗɓe nder mbulwuldi pinan, woɗɓe ngam ngeendam nduumiiɗam, woɗɓe boo ngam semteende e mbustu nduumiiŋgu.

³Marɓe faamu njaynan bana jayŋgol asama, ekkitinɓe laawol adilaaku haa ɗuuɗɓe njaynan haa foroy bana koode asama.

⁴Daniyel, taa yeccu koo moy bolle ɗe'e, takku deftere nde'e haa wakkati timmoode wara. Ɗuuɗɓe ɗaɓɓan faamugo ko laatoto e faamu ɓesdoto.”

⁵Nden min Daniyel mi yi'i worɓe woɗɓe ɗiɗo ɗon ndari: Gooto haa fomoonde maayo nde'e, gooto boo haa ndeya.

⁶Gooto maɓɓe wolwani ɓorniiɗo limce daneeje go dariiɗo haa dow maayo go, ƴami mo: “Ndey kuuje kayɗiniiɗe ɗe'e timmata?”

⁷Kaŋko o ɓaŋgti juuɗe maako ɗiɗi fuu heedi asama, mi nani o hunori bee innde Allah duumiiɗo: “Lutti duuɓi tati bee reeta. Kuuje ɗe'e fuu kiɓɓoto, saa'i baawɗe ummaatoore seniinde nattinte fuu.”

⁸Mi nani ko o wi'i, ammaa mi faamaay. Ngam maajum ƴammi: “Jawmam, noy kuuje ɗe'e timmirta?”

⁹O jaabi: “Yah, Daniyel! Sey wahayuuji ɗi'i cuuɗe, ɗi takke haa timmoode wara.

¹⁰Ɗuuɗɓe laaɓan, cenoto. Ammaa halluɓe tokkoto waɗugo kalluɗum, kamɓe fuu ɓe paamataa, sey marɓe faamu tan paamata.

¹¹Ɓaawo ɓe kaɗi lii'anaago Allah kirseteeɗi nyalaade nyalaade, ɓe njo'ini nyidduɗum nattinoojum boo, nyalɗe ujineere e teemeɗɗe ɗiɗi e cappanɗe joweenayi (1.290) caaloto.

¹²Barka laatanto munyanɓe, reenanɓe haa nyalɗe ujineere e teemeɗɗe tati e cappanɗe tati e jowi (1.335) caalo.

¹³An boo Daniyel, munyu haa timmoode. A maayan, ammaa a ummititto ngam keɓa geɗal ma haa timmoode zamanu.”