Read Fulfulde Daniyel 2 Bible Online

Daniyel 2 - Fulfulde bible

Daniyel 2

¹Nder nduuɓu laamu maako ɗiɗaɓu, Nabukodonosor hoyɗi. Koyɗi ɗi'i cakli mo, o waawaay ɗaanaago.

²O umri ewnoyaago laarooɓe e waɗooɓe hatti e waɗooɓe hiila e Kaldiya'en[1] haa ɓe paamtina mo koyɗi ɗi o hoyɗi. Ɓe ngari, ɓe ndari yeeso laamiiɗo.

³O wi'i ɓe: “Mi hoyɗi e mi sakli, mi yiɗi faamugo ko mi hoyɗi.”

⁴Kaldiya'en njaabi mo bee Aramiyaare: “A yeeɗa haa foroy, barkaama! Yeccu maccuɓe ma koyɗol man, haa min passitirane ngol.”

⁵Laamiiɗo jaabi ɓe: “Ndaa ko ndarnumi: To on anndinaay yam koyɗol am e fassaruuye maagol, mi umran ta'ugo on geɓe geɓe, wartirgo cuuɗi mooɗon boo bana jiddere.

⁶Ammaa to on anndini yam ngol e fassaruuye maagol, nden kam mi hokkan on dokke e caahuuji e tedduŋgal ɗuuɗŋgal. Anndineeɗam koyɗol am e fassaruuye maagol kadi.”

⁷Fahin ɓe mbi'i: “Barkaama, yeccu maccuɓe ma koyɗol man tawon, nden min passitiran ngol.”

⁸Laamiiɗo wi'i: “Jonta mi anndi fakat, on ɗon paasita ngam on anndi ko ndarnumi.

⁹To on anndinaay yam koyɗol am, kiita ngoota laatanto on fuu. On narri yeccugo yam bolle pewooje e rikiciije, ngam on ɗon numa teema haala man sannjan. Anndineeɗam koyɗol man, nden kam mi anndan on mbaawan fassitirgo ngol boo.”

¹⁰Kaldiya'en njaabi laamiiɗo: “Walaa neɗɗo haa duniyaaru fuu waawata anndingo ma ɗum, barkaama. Walaa laamiiɗo, no o mawniri, no o mardi baawɗe fuu, meeɗi ƴamugo irin maajum haa laarooɓe e waɗooɓe hatti e Kaldiya'en.

¹¹Ko ƴamɗa, barkaama, saɗi masin. Walaa baawɗo anndingo ma ɗum, sonaa ɗowanteeɓe. Ammaa joonde maɓɓe wonaay caka yimɓe.”

¹²Nden laamiiɗo tikki masin, o umri mbarugo hikma'en Baabila fuu.

¹³Umroore mbarugo ɓe anndinaama. Ɓe tefi Daniyel e sooba'en muuɗum ngam mbarugo ɓe.

¹⁴Nden Daniyel wolwani Ariyok, hooreejo aynooɓe laamiiɗo, gurtiiɗo ngam mbarugo hikma'en Baabila. O wolwani mo bee hakkiilo e bee hikma,

¹⁵o wi'i: “Ngam ɗume umroore laamiiɗo saati bana nii?” Ariyok wi'i mo haala man.

¹⁶Daniyel yehi haa laamiiɗo, tori mo wakkati seɗɗa haa o fassitirana mo koyɗol maako.

¹⁷Nden Daniyel hooti, yecci ɗum sooba'en muuɗum Hananiya e Miisayel e Azariya,

¹⁸ngam haa ɓe toro Allah mo asama, o hinno ɓe, o waŋginana ɓe sirri maajum, ngam taa ɓe mbarda Daniyel e sooba'en muuɗum bee hikma'en Baabila woɗɓe.

¹⁹Nden Allah waŋginani Daniyel sirri man bee jemma nder wahayu. Ngam maajum Daniyel maŋgti Allah mo asama,

²⁰wi'i: “Yettoore laatano innde Allah foroy haa abada! Ngam o mari hikma e baawɗe.

²¹Kaŋko waylititta wakkatiiji e saa'iije, kaŋko ɓornata laamiiɓe laamu, kaŋko ɓortata ɓe, kaŋko hokkata hikma haa hikma'en e anndal haa annduɓe.

²²Kaŋko waŋginta lugguɗum e sirriijum, kaŋko woni annduɗo ko nyukki nder nyiɓre, annoora ɗon wondi bee maako.

²³Yaa Allah kaakiraaɓe am, mi maŋgti ma, mi yetti ma, ngam a hokki yam hikma e baawɗe. A waŋginani yam jonta ko min tori ma, a anndini min koyɗol laamiiɗo.”

²⁴Ɓaawo man Daniyel yehi haa Ariyok mo laamiiɗo umruno ɗum mbarugo hikma'en Baabila, wi'i mo: “Taa mbar hikma'en Baabila. Yahram haa laamiiɗo haa mi fassitirana mo koyɗol maako.”

²⁵Law Ariyok yahri Daniyel yeeso laamiiɗo, wi'i: “Barkaama, mi tawi goɗɗo caka dahaaɓe[2] iwɓe Yahuuda, o fassitirante koyɗol ma.”

²⁶Laamiiɗo ƴami Daniyel, bi'eteeɗo Beltesacar: “A waawan anndingo yam koyɗol ngol koyɗumi e maana maagol na?”

²⁷Daniyel jaabi laamiiɗo: “Barkaama, sirri ko ƴamɗa maana muuɗum, hikma'en e laarooɓe e waɗooɓe hatti e annduɓe haala koode mbaawataa waŋginango ma ɗum.

²⁸Ammaa woodi Allah mo asama, kaŋko waŋginta sirriiji. O holli ma, yaa laamiiɗo Nabukodonosor, ko laatoto yeeso ɗo. Koyɗol ngol koyɗuɗa e wahayuuji ɗi ngi'ɗa dow be'itte ma, ndaa ɗum:

²⁹Saa'i a ɗon waali, barkaama, a numi ko tammi laataago. Baŋginoowo sirriiji anndini ma ɗum.

³⁰O waŋginani yam sirri man, naa ngam mi ɓurdi yimɓe woɗɓe fuu hikma, ammaa ngam mi fassitirane, barkaama, haa a faama numooji ɓernde ma.

³¹Nder koyɗol ma, barkaama, a yi'i suura makka. Ka maapinndiiha, ɗelko maaka ɓuri semmbe. Ka dari yeeso ma, jaati maaka kulniika.

³²Hoore suura ka'a waɗaama bee kaŋŋeeri laaɓndi, wiɓɓere maaka e juuɗe maaka bee cardi, reedu maaka e dawɗe maaka bee njamndi mboɗeeri,

³³korle maaka bee njamndi ɓaleeri, yeɓre teppe maaka njamndi e yeɓre boo loope.

³⁴Saa'i a ɗon laara, hayre hoɓɓiti feere maare — walaa juŋngo yerɓi nde. Nde tappi teppe suura ɗe njamndi bee loope go, nde nami ɗe.

³⁵Bana non koo ɗume fuu fusi: Njamndi e loope e njamndi mboɗeeri e cardi e kaŋŋeeri. Ɗum fuu ɗum laati bana nyaande dow laarre[3] wakkati codol, henndu saŋkiti ɗum, walaa ko lutti. Ammaa hayre fusnde suura go, mawni, laati hooseere mawnde, nde heewi duniyaaru fuu.

³⁶Kanjum woni koyɗol ma, barkaama, jonta haa min passitirane ngol.

³⁷An, barkaama, a laamiiɗo laamlaamɓe. Allah mo asama hokki ma laamu e baawɗe e semmbe e tedduŋgal.

³⁸Koo toy fuu o marni ma yimɓe e dabbaaji ladde e colli asama. O laamini ma dow tagle ɗe'e fuu. An woni hoore kaŋŋeeri go.

³⁹Ɓaawo maaɗa laamu feere waran, ngu mawnataa bana ngu maaɗa. Nden laamu tataɓu, ngu njamndi mboɗeeri, laamanto duniyaaru fuu.

⁴⁰Laamu nayaɓu maran semmbe bana njamndi ɓaleeri. Bana no njamndi ɓaleeri namirta e fusirta koo ɗume fuu, laamu ngu'u boo naman e nattinan laamuuji goɗɗi fuu.

⁴¹A yi'i teppe, kooli maaje, yeɓre ɗi njamndi yeɓre boo ɗi loope. Laamu man senndoto geɓe geɓe. Ngu maran semmbe bana njamndi ɓaleeri, ngam a yi'i njamndi jillindiri bee loope.

⁴²Kooli teppe yeɓre njamndi, yeɓre boo loope, bana wi'ugo: Yeɓre woore maran semmbe, ammaa yeɓre woɗnde marataa semmbe.

⁴³A yi'i no njamndi jillindiri bee loope ngam laamiiɓe geɓe fuu te'indiran, ammaa ɓe kawtataa, kal-kal bana njamndi hawtataa bee loope.

⁴⁴Saa'i laamiiɓe ɓe'e, Allah mo asama darnan laamu feere ngu halkataa haa foroy. Walaa ummaatoore woɗnde hoosata laamu man. Ngu nattinan laamuuji goɗɗi fuu, ammaa kaŋgu ngu duumoto.

⁴⁵Ngam maajum ngi'ɗa no hayre hoɓɓitiri — walaa juŋngo yerɓi nde— nami njamndi ɓaleeri e mboɗeeri e loope e cardi e kaŋŋeeri. Allah mawɗo waŋginani ma ko tammi laataago, barkaama. Koyɗol man tabiti, maana maagol boo laaɓi.”

⁴⁶Nden laamiiɗo Nabukodonosor hippi haa yeeso Daniyel, sujidani mo. Nden o umri waddango mo dokke nyaamdu e uurle.

⁴⁷Laamiiɗo wi'i Daniyel: “Fakat, Allah mooɗon woni ɗowanteeɗo ɓurɗo ɗowanteeɓe fuu, o jawmiraawo laamiiɓe, o baŋginoowo sirriiji, ngam a heɓi baawɗe waŋgingo sirri koyɗol ngo'ol.”

⁴⁸Nden o teddini Daniyel, o saahi mo dokke mawɗe ɗuuɗɗe. O waɗi mo ngomna dow taƴre Baabila e ardiiɗo mawɗo dow hikma'en Baabila fuu.

⁴⁹Dow ƴamol Daniyel, laamiiɗo waɗi Sadarak e Meesak e Abed-Nego ardiiɓe mawɓe dow taƴre Baabila. Ammaa Daniyel bee hoore muuɗum jooɗi haa laamorde.