Read Fulfulde Daniyel 5 Bible Online

Daniyel 5 - Fulfulde bible

Daniyel 5

¹Laamiiɗo Belsaccar[6] ewni mawɓe muuɗum ujineere, waɗani ɓe nyaamduuji, o yardi inaboojam bee maɓɓe.

²Saa'i ɓe ɗon njara, o umri waddoygo njardukoy cardi e kaŋŋeeri koy baaba maako Nabukodonosor hoocuno nder haykaliiru haa Urusaliima haa o yara nder maakoy, kaŋko e mawɓe maako e rewɓe maako e sulaaɓe maako.

³Law ɓe ngaddi njardukoy kaŋŋeeri koy ɓe koocoyino diga haykaliiru Allah haa Urusaliima go, ɓe fuu ɓe njari nder maakoy.

⁴Ɓe njari inaboojam, ɓe maŋgti labbi kuuwraaɗi bee kaŋŋeeri e cardi e njamndi mboɗeeri e njamndi ɓaleeri e leggal e hayre.

⁵Ɗon nii juŋngo goɗɗo waŋgi, kooli maago puɗɗi winndugo dow mahol laamorde ndanwinaaŋgol tiitotirŋgol bee jo'inirɗum pittirlaaji. Laamiiɗo yi'i juŋngo man saa'i ngo ɗon winnda.

⁶Nden yeeso maako nyiɓɓi, hakkiilo maako jiiɓi, jokke maako tampi, koppi maako boo ndiwni.

⁷O hooli ɓe ngadda waɗooɓe hatti e Kaldiya'en e annduɓe haala koode. Nde ɓe nasti, o wi'i hikma'en Baabila: “Mo waawi jaŋngugo binndol ngo'ol e fassitirgo ngol, mi ɓornan mo limce boɗeeje ɗigguɗe, o heɓan koɗel kaŋŋeeri haa daande maako, o laatoto tataɓo nder laamu boo.”

⁸Hikma'en laamiiɗo fuu ɓaditi, ammaa walaa koo gooto waawi jaŋngugo binndol man sakkomaa fassitirgo ngol.

⁹Ngam maajum hakkiilo laamiiɗo Belsaccar jiiɓi masin, yeeso maako nyiɓɓi, mawɓe maako boo cakli.

¹⁰Daada laamiiɗo nani hoolo maako e hoolo mawɓe maako, nasti suudu haa ɓe nyaamata, wi'i: “A yeeɗa haa foroy, barkaama! Taa hul, taa mbar jokke bana nii.

¹¹Woodi goɗɗo nder lesdi ma, keewɗo ruuhu ɗowanteeɓe seniiɓe. Saa'i laamu baaba ma, o waŋgini anndal lugguŋgal e faamu e hikma bana ngal ɗowanteeɓe. Baaba ma Nabukodonosor waɗi mo hooreejo dow laarooɓe e waɗooɓe hatti e Kaldiya'en e annduɓe haala koode fuu.

¹²O woodi ruuhu kayɗiniiŋgu e faamu e baawal fassitirgo koyɗi, heɓtugo annditanamji, fiistugo haalaaji caɗɗi boo. Ngam maajum nel ɗaɓɓitoygo Daniyel mo laamiiɗo Nabukodonosor inndi ɗum Beltesacar. Kaŋko o fassitirante binndol ngo'ol.”

¹³Ɓe ngaddi Daniyel yeeso laamiiɗo. O ƴami mo: “An woni Daniyel, gooto Yahuudu'en dahaaɓe ɓe baaba am waddi diga Yahuuda na?

¹⁴Mi nani ruuhu ɗowanteeɓe ɗon nder maaɗa. Mi nani boo a woodi anndal lugguŋgal e faamu e hikma kayɗiniika.

¹⁵Ndaa, mi umri waddugo hikma'en e waɗooɓe hatti fuu yeeso am, haa ɓe njaŋnga binndol ngo'ol, ɓe passitiranammi ngol. Ammaa ɓe mbaawaay.

¹⁶Mi nani an a waawan fassitirgo e fiistugo haalaaji caɗɗi. To a waawi jaŋngugo binndol e fassitirgo ngol, mi ɓornete limce boɗeeje ɗigguɗe, a heɓan koɗel kaŋŋeeri haa daande ma, a laatoto tataɓo nder laamu boo.”

¹⁷Daniyel jaabi laamiiɗo: “Jogita dokke ma, mbarjaari ma boo hokku ndi goɗɗo feere. Ammaa mi jaŋngante binndol ngo'ol, barkaama, mi fassitirante ngol.

¹⁸Allah Ɓaŋiiɗo hokki baaba ma Nabukodonosor laamu e maŋngu e tedduŋgal e daraja.

¹⁹Yimɓe nder ummaatooje e asli e ɗemɗe fuu kuli mo, ndiwni yeeso maako ngam daliila maŋngu ngu o hokki mo. Mo o yiɗno mbarugo, o mbari. Mo o yiɗno hisnugo yoŋki mum, o hisni. Mo o yiɗno ɓaŋgtugo, o ɓaŋgti, mo o yiɗno leestingo boo, o leestini.

²⁰Ammaa ɓernde maako mawniti, saati haa o laati elewɗo. Ngam maajum Allah jippini mo diga leeso laamu maako, tedduŋgal maako ɓortaama.

²¹O riiwaama diga caka yimɓe, ɓernde maako warti bana nde ndabbaawa. O wuurdi bee bamɗe ladde, o nyaami huɗo bana na'i, saawawre soofni ɓanndu maako. Nden o annditi no Allah Ɓaŋiiɗo mari baawɗe dow laamu yimɓe, o laaminan mo o yiɗi fuu.

²²Ammaa an, Belsaccar ɓiyiiko, a leestinaay hoore ma, koo nde a anndi ɗum fuu boo.

²³A mawniti dow Jawmiraawo mo asama. Ɓe ngaddani ma njardukoy koy a hooci diga haykaliiru maako. An e mawɓe ma e rewɓe ma e sulaaɓe ma, on njardi inaboojam bee maakoy, on maŋgti labbi kuuwraaɗi bee kaŋŋeeri e cardi e njamndi mboɗeeri e njamndi ɓaleeri e leggal e hayre, ɗi ngi'ataa, ɗi nanataa, ɗi anndaa koo ɗume. Ammaa a teddinaay Allah jogiiɗo yoŋki ma e laabi ma fuu haa juŋngo muuɗum.

²⁴Ngam maajum o neli juŋngo ngo'o, ngo winnda bolle ɗe'e.

²⁵Ndaa ko winnda: Mene, mene, tekel e parsiin.

²⁶Ndaa boo fassaruuye man: Mene yiɗi wi'go limgal, waato Allah limi balɗe laamu ma, timmini ɗe.

²⁷Tekel yiɗi wi'go poondol, waato o foondi ma dow awnorɗum, o tawi teddeeŋga ma he'aay.

²⁸Parsiin[7] yiɗi wi'go cenndi, waato o senndi laamu ma, o hokki ngu Medi'en e Perezzi'en.”

²⁹Belsaccar umri ɓornugo Daniyel bee limce boɗeeje ɗigguɗe e koɗel kaŋŋeeri haa daande mum. Nden o neli wooynugo: “Daniyel laati tataɓo nder laamu.”

³⁰Jemmaare man Belsaccar, laamiiɗo Kaldiya'en mbaraama.