Read Fulfulde Daniyel 6 Bible Online

Daniyel 6 - Fulfulde bible

Daniyel 6

¹Dariyus Mediijo heɓi laamu. Duuɓi maako cappanɗe joweego e ɗiɗi, saa'i o laamo.

²Ɗum fottani Dariyus o jo'ina lawan'en teemerre e noogas (120) dow laamu maako fuu.

³Nden o suɓi ardiiɓe tato, Daniyel woni gooto maɓɓe. Lawan'en ɗon kuuwa les ardaaŋgal maɓɓe, ngam taa laamiiɗo waɗa asar.

⁴Nder kuugal man Daniyel ɓuri ardiiɓe e lawan'en woɗɓe, ngam o woodi ruuhu kayɗiniiŋgu. Ngam man laamiiɗo annini ardingo mo dow laamu muuɗum fuu.

⁵Ardiiɓe woɗɓe e lawan'en go ɗaɓɓiti daliila wullaago Daniyel ngam kuugal maako nder laamu. Ammaa ɓe tawaay aybe koo boofol haa maako, ngam o koolaaɗo, yeebaare e boofol walaa haa maako.

⁶Ngam maajum yimɓe man mbi'mbi'tiri: “En tawataa daliila wullaago Daniyel, sonaa nder haala diina maako.”

⁷Nden ardiiɓe e lawan'en go njahdi haa laamiiɗo, mbi'i mo: “Yaa laamiiɗo Dariyus, A yeeɗa haa foroy, barkaama!

⁸Minin ardiiɓe nder laamu maaɗa fuu, lawan'en e jawro'en e ngomna'en e sarwooɓe, min narri ƴamugo ma, barkaama, a waɗa dooka, a semmbiɗina ka, wi'ugo ni'i: Nder nyalɗe cappanɗe tati garanɗe, taa goɗɗo toro huunde haa ɗowanteeɗo malla neɗɗo feere, sey haa laamiiɗo tan. Mo ɗowtanaaki dooka ka'a, o sakkinteeɗo nder lowol barooɗe.

⁹Waɗ dooka ka'a, waɗ lammba ma dow maaka, barkaama, haa ka tabita fodde umrooje Medi'en e Perezzi'en, ɗe ngaylataake.”

¹⁰Nonnon laamiiɗo Dariyus waɗi dooka, tabitini ka bee lammba mum.

¹¹Nde Daniyel nani haala dooka ka'a waɗanaama lammba, o nasti suudu maako dowru, burɗe maaru ɗon gal Urusaliima. Ton o tuggi koppi bana no o woowri, nyalaade fuu nde tati, o waɗi do'a, o maŋgti Allah maako.

¹²Worɓe go njahdi, tawi Daniyel ɗon do'o, ɗon toro Allah mum.

¹³Nden ɓe njehi haa laamiiɗo ngam wolwango mo haala dooka go. Ɓe mbi'i: “Barkaama, naa a waɗani dooka ka'a lammba, nder nyalɗe cappanɗe tati taa goɗɗo toro huunde haa ɗowanteeɗo malla neɗɗo feere, sey haa maaɗa tan, to naa non, o sakkinteeɗo nder lowol barooɗe?” Laamiiɗo jaabi: “Nonnon, ka tabiti fodde umrooje Medi'en e Perezzi'en, ɗe ngaylataake.”

¹⁴Nden ɓe mbi'i laamiiɗo: “Daniyel, gooto nder dahaaɓe Yahuuda, teddinaay ma, barkaama. O ɗowtanaaki dooka ka a waɗani ka lammba, nyalaade fuu o ɗon waɗa do'a maako nde tati.”

¹⁵Nde laamiiɗo nani haala ka'a, ɓernde maako naawi masin. O yiɗi daɗnugo Daniyel. Haa naaŋge muti o ɗon tefa dabare hisnugo mo.

¹⁶Nden worɓe go njahdi haa maako, mbi'i: “A anndi, barkaama, fodde umrooje Medi'en e Perezzi'en, kala dooka e umroore, ko laamiiɗo tabitini fuu, ngaylataake.”

¹⁷Laamiiɗo umri waddugo Daniyel, ɓe cakkini mo nder lowol barooɗe. Laamiiɗo wi'i Daniyel: “Allah maaɗa mo a tiini teddingo ɗum, hisnete!”

¹⁸Ɓe ngaddi hayre mawnde, ɓe maɓɓi hunnduko lowol bee maare. Laamiiɗo waɗi lammba halagaare muuɗum non boo nga mawɓe muuɗum, ngam taa kiita Daniyel waylite koo seɗɗa.

¹⁹Nden o hooti laamorde maako. O nyaamaay, o ewnaaki boo sulaaɓe ɗakki maako, o ɗaanaaki sam.

²⁰Laamiiɗo dawi cub, yaawɗi yahugo haa lowol barooɗe.

²¹Nde o ɓaditi ngol, o ewni Daniyel bee daande yurumnde, o ƴami mo: “Daniyel, jaggiiɗo Allah geeto, Allah maaɗa mo a tiini jagganaago ɗum, waawi hisnugo ma diga barooɗe na?”

²²Daniyel jaabi mo: “A yeeɗa haa foroy, barkaama!

²³Allah am neli malaa'ikaajo muuɗum mo maɓɓi kunnduɗe barooɗe, ɗe naawnaay yam sam ngam mi laaɓɗo yeeso maako e mi waɗaay ma boo aybe, barkaama.”

²⁴Laamiiɗo seyi masin, umri wurtingo Daniyel diga lowol. Ɓe ngurtini mo, ɓe ngi'aay naawnere koo seɗɗa haa maako, ngam o hooli Allah maako.

²⁵Nden laamiiɗo umri waddugo wulliiɓe Daniyel fuu, ɓe cakkini ɓe nder lowol barooɗe, kamɓe e rewɓe maɓɓe e ɓikkoy maɓɓe. Diga ɓe ciwaa yottaago haa les lowol, barooɗe ndiwi dow maɓɓe, ƴakkidi ɓe fuu.

²⁶Ɓaawo man laamiiɗo Dariyus winndi bataakewol yahugo haa yimɓe nder ummaatooje e asli e ɗemɗe duniyaaru fuu, wi'ugo ni'i: “Salaaman ɗuuɗana on!

²⁷Mi ɗon umra nder laamu am fuu, koo moy hula, teddina Allah mo Daniyel teddinta ɗum. Ngam kaŋko woni Allah geeto, o ɗon yeeɗa haa foroy. Laamu maako wilataako sam, baawɗe maako njinnataa haa foroy.

²⁸O ɗon hisna, o ɗon rimɗina yimɓe, o ɗon waɗa alaamaaji e kaayeefiiji haa lesdi e haa asama. Kaŋko hisni Daniyel diga barooɗe!”

²⁹Daniyel heɓi hayru nder laamu Dariyus non boo nder laamu Koores Persiijo.