Read Fulfulde Daniyel 8 Bible Online

Daniyel 8 - Fulfulde bible

Daniyel 8

¹Nder nduuɓu laamiiɗo Belsaccar tataɓu, min Daniyel, mi heɓi wahayu ɗiɗaɓu.

²Nder wahayu man, mi ɗonno haa laamorde Suuza nder lesdi Elam. Nde mi ɗon laara wahayu man, mi ɗon dari haa maayo Ulay.

³Mi tijji, nden ngi'mi njawdiri mbaalu ɗon dari haa fomoonde maayo. Ndi woodi luwe ɗiɗi juutɗe. Luwal gurtiiŋgal ɓaawo ɓuri aranal juutugo.

⁴Mi yi'i njawdiri man ɗon hawa gal hiirnaaŋge e woyla e fombina. Walaa ndabbaawa waawi dartanaago ndi, walaa baawɗo hisnugo diga baawɗe maari. Ndi waɗi ko ndi yiɗi, baawɗe maari ɓurti ɓesdugo.

⁵Saa'i mi ɗon numta ɗum, njawdiri mbeewa wari diga hiirnaaŋge, taaroyi duniyaaru fuu bilaa meemugo lesdi. Ndi woodi luwal kayɗiniiŋgal gootal caka gite maari.

⁶Ndi ɓaditi njawdiri mbaalu marndi luwe ɗiɗi ndi ngi'mi haa fomoonde maayo go, ndi ukkani njawdiri mbaalu bee semmbe maari fuu.

⁷Mi yi'i ndi ɓaditi ndi. Ndi hawi ndi bee tikkere, ndi yewi luwe maari ɗiɗi fuu. Njawdiri mbaalu go waawaay dartaago. Njawdiri mbeewa dofli ndi, dammi ndi, walaa kisnuɗo njawdiri mbaalu diga baawɗe maari.

⁸Baawɗe njawdiri mbeewa man ɓurti ɓesdaago. Ammaa nde baawɗe maari ɓurti ɓesdaago, luwal maari juutŋgal yewi. Haa pellel maagal luwe nayi kayɗiniiɗe ngurti, tiiti alkibilaaji nayi fuu.

⁹Kadiboo luwal pamaral goɗŋgal wurti haa gootal nder luwe nayi man. Nden ngal mawni masin gal fombina e fuunaaŋge e lesdi ɓurndi wooɗugo[9].

¹⁰Ngal mawni haa yotti jama'aare konu asama, ngal sakkini haa lesdi yeɓre nder maare, non boo koode goɗɗe, ngal dammi ɗe.

¹¹Ngal mawni haa yotti mawɗo mooɓre konu asama, ngal ittani mo kirseteeɗi nyalaade nyalaade, ngal yibbini nokkuure maako seniinde.

¹²Daliila tuurtol, mooɓre konu asama hokkaama haa juŋngo luwal go, non boo kirseteeɗi nyalaade nyalaade fuu. Ngal do'an gooŋga, ko ngal waɗata fuu timman jam.

¹³Nden nanmi malaa'ikaajo ɗon wolwa. Malaa'ikaajo feere ƴami mo: “Haa ndey kuuje gi'aaɗe nder wahayu timmata? Haa ndey tuurtol nattinoowol duurata e kirseteeɗi nyalaade nyalaade mbilete? Ndey ɓe accata dammugo mooɓre konu asama e nokkuure seniinde?”

¹⁴O jaabi: “Sey to kiikiiɗe e fajiri ujine ɗiɗi e teemeɗɗe tati (2.300) caalake. Nden ɓe puɗɗitan kuugal haa nokkuure seniinde.”

¹⁵Min Daniyel mi ɗon numta wahayu man haa mi faama ko ngi'mi. Nden tagaaɗo bana neɗɗo dari yeeso am.

¹⁶Nden nanmi sawtu neɗɗo ɗon hoola haa maayo Ulay, o wi'i: “Jibirilla, faamtin mo ko o yi'i.”

¹⁷Jibirilla ɓaditi nokkuure nde mi ɗonno dari. Nde o wari, mi hultori masin, mi do'i, mi hippi haa lesdi. O wi'i yam: “Ɓii-Aadama, faamu ko ngi'ɗa ngam wahayu man laarani wakkati timmoode.”

¹⁸Nde o wi'i yam ɗum, faɗɗere hoosi yam, mi do'i, mi hippi haa lesdi. Ammaa o meemi yam, o darni yam haa nokkuure nde ngonnoomi.

¹⁹Nden o wi'i: “Haa mi anndine no tikkere Allah timmirta ngam wakkati timmoode darnaama.

²⁰Njawdiri mbaalu bee luwe ɗiɗi ndi ngi'ɗa, ɗum laamiiɓe Mediya e Persiya.

²¹Njawdiri mbeewa boo, ɗum laamiiɗo Yunaniya.[10] Luwal maŋngal caka gite maari, ɗum laamiiɗo arano.

²²Luwe nayi gurtiiɗe haa pellel luwal aranal yaake ngal yewa, ɗum laamuuji nayi gurtotooɗi ummaatoore man, ammaa ɗi marataa baawɗe laamu aranu.

²³Haa timmoode laamuuji ɗi'i, to hakkeeji hakke'en ɓe'e keewi, laamiiɗo feere, elewɗo, ƴoyɗo ummoto.

²⁴O semmbiɗan, ammaa naa bee baawɗe hoore maako. O huuwan halkere hayɗinannde, o heɓan jaalorgal nder kuuɗe maako. O nattinan semmbiɗɓe, non boo ummaatoore senaaɓe.

²⁵Daliila baawal rikici maako, o heɓan estugo yimɓe, o hafan, o halkan ɗuuɗɓe saa'i ɓe ɗon nder salaaman. O tuurtanan koo Laamiiɗo laamlaamɓe boo, ammaa o nattan — naa bee juŋngo neɗɗo.

²⁶Wahayu kirseteeɗi kiikiiɗe e fajiri laaɓi. Ammaa an, jeeɗa, ngam ɗum laarani nyalɗe daayiiɗe.”

²⁷Min Daniyel mi somi masin, mi nyawi nyalɗe ɗuuɗɗe. Nden mi ummi, mi huuwi kuugal am ngam laamiiɗo. Wahayu ngu sakli yam, mi faamaay ɗum.