Read Fulfulde Hose'a 11 Bible Online

Hose'a 11 - Fulfulde bible

Hose'a 11

¹Jawmiraawo wi'i: “Nde Isra'iila derkeejono, mi yiɗi mo. Mi ewni ɓiɗɗo am, mi wurtini mo lesdi Misra.

²Ammaa koo mi ewni Isra'iila'en nde ɗuuɗɗum, kamɓe ɓe ɓesdi daaytaago. Ɓe kirsi ngam Ba'alji, ɓe nguli dokke ngam suuraaji labbi cehaaɗi.

³Asee boo min bee hoore am ekkitinno Efrayim yahugo, mi jogi mo. Ammaa kaŋko o annditaay nii mi hakkilani mo.

⁴Mi yahri mo bee kaɓɓorli koyɗi, mi ɗowi mo bee ɓoggi yiide. Mi laatani mo bana goɗɗo kuufanɗo musinanŋgel, mi turi mi hokki mo ko o nyaamata.

⁵Isra'iila'en lorataako haa lesdi Misra, jonta Assuura laamanto ɓe, ngam ɓe cali lortaago haa am.

⁶Konne'en ukkanto berniiji maɓɓe, ɓe ngewan palduɗe maɓɓe, nattinan ɓe ngam daliila nufayeeje maɓɓe.

⁷Ummaatoore am ɗon tabiti nder gudinki nuɗɗinki maare. Nde ewnaama ngam ummaago, ammaa nde daraaki.

⁸An Efrayim, noy mbaawranmi accugo ma? An Isra'iila, noy mbaawranmi yoofugo ma? Noy mbaawranmi waɗango ma ko mi waɗani wuro Adama? Noy mbaawranmi laatingo ma bana wuro Ceboyim? Ɓernde am saklake, yurmeende heewi ɓernde am.

⁹Mi waɗataa fodde tikkere am saatunde, mi halkataa Efrayim fahin. Ngam min mi Allah, naa mi neɗɗo, mi Ceniiɗo caka mooɗon. Ngam maajum mi warataa bee tikkere.”

¹⁰Hose'a wi'i: “Ɓe tokkoto Jawmiraawo. Kaŋko o ubban bana mbarooga. O ubban e ɓiɓɓe maako ngaran bee diwnugo diga hiirnaaŋge.

¹¹Ɓe ngaran bee diwnugo diga Misra bana colli, diga lesdi Assuura boo bana pooli.” “Min mi hooran ɓe haa cuuɗi maɓɓe”. Nii Jawmiraawo wi'i.