Read Fulfulde Hose'a 4 Bible Online

Hose'a 4 - Fulfulde bible

Hose'a 4

¹Hose'a wi'i: “Onon Isra'iila'en, nane wolde Jawmiraawo: Min Jawmiraawo mi woodi daliila wullaago on, onon jooɗiiɓe nder lesdi ndi'i, ngam walaa gooŋgaaku malla mbooɗeeŋga malla anndal Allah nder lesdi ndi,

²sey naalooje e pewe e mbar-hoore e nguyka e daakaareeku e toonyaare e dufki ƴiiƴam dow dufki ƴiiƴam.

³Ngam maajum lesdi sunoto, jooɗiiɓe ton fuu tampan, non boo dabbaaji ladde e colli asama. Koo liɗɗi nder mbeela boo mbaatan.

⁴Ammaa taa koo moy wullo, taa koo moy fela goɗɗo boo, ngam ummaatoore ma nanndi bee wullooɓe liman'en.

⁵Onon on pergoto nyalawma, annabiijo gonduɗo bee maaɗa fergoto jemma, mi halkan daada ma boo.

⁶Ummaatoore am ɗon halka ngam nde walaa anndal. An a wudini anndal, ngam maajum min boo mi wudinte diga kuugal limanku am. A faalaay tawreeta Allah maaɗa, ngam maajum min boo mi faalataa ɓiɓɓe maaɗa.

⁷Ɓe ɓesdi ɗuuɗugo, ɓe ɓesdi boo waɗugo hakke dow am. Mi laatinan tedduŋgal maɓɓe toskaare.

⁸Ɓe ɗon nyaama kirseteeɗi ɗi ummaatoore am lii'anto yam ngam ittugo hakke, ɓe ngiɗi boo nastingo ummaatoore nder hakke bana maɓɓe.

⁹Ngam maajum limanjo heɓan kiita kal-kal bana ummaatoore. Mi hiitoto mo ngam daliila gikku maako, mi yoɓan mo fodde kuuɗe maako kalluɗe.

¹⁰Ɓe nyaaman, ammaa ɓe kaarataa. Ɓe mbaɗan daakaareeku, ammaa ɓe ɗuuɗataa, ngam ɓe acci ɗowtanaago Jawmiraawo.

¹¹Daakaareeku e inaboojam kiɗɗam e inaboojam kesam ittan hakkiilo.

¹²Ummaatoore am ɗon ƴama labbi maare ɗi leggal, nde ɗon sarwo sawru hatti maare. Ngam ruuhu daakaareeku majjini nde, haa nde waɗi njeenu[6] dow Allah maare, nde tuurtani mo.

¹³Ɓe ɗon lii'o kirseteeɗi dow geereeje kooseeje, ɓe ɗon ngula dokke dow towndiije, les leɗɗe mawɗe bilititɗe ɗe ɗowdi maaje wooɗi. Ngam maajum ɓiɓɓe mon rewɓe mbaɗan daakaareeku, esiraaɓe mon rewɓe boo laatoto jeenooɓe.

¹⁴Ammaa mi hiitataako ɓiɓɓe mon rewɓe ngam daakaareeku muuɗum'en, koo rewɓe ɓiɓɓe mon ngam njeenu muuɗum'en. Ngam onon bee ko'e mooɗon on ɗon nyukko bee rewɓe daakaare'en, on ɗon lii'o kirseteeɗi hawtaade bee rewɓe waɗooɓe daakaareeku ngam rewugo labbi. Bana nii ummaatoore sooya anndal ɗon halka.

¹⁵To an Isra'iila, a laatake daakaareejo, walaa haaje Yahuuda boo nasta nder hakke. Taa njehe haa Gilgal, taa njehe haa Baytawiina[7], taa kune bee wi'go: Fakat bana Jawmiraawo o geeto!

¹⁶Isra'iila laati saata-hooreejo bana nagge. Jonta min Jawmiraawo mi duran ɗum bana bortel nder ngaynaaka njaaska na?

¹⁷Yimɓe Efrayim ɗakkotiri bee labbi. Acce ɓe!

¹⁸To wuykere maɓɓe jinni boo, ɓe accataa waɗugo daakaareeku. Mawɓe maɓɓe ɓuri yiɗugo toskaare.

¹⁹Henndu wiftoto ɓe bee bileeji muuɗum, ɓe cemtan ngam daliila kirseteeɗi maɓɓe.”