Read Fulfulde Amos 2 Bible Online

Amos 2 - Fulfulde bible

Amos 2

¹Ndaa nii Jawmiraawo wi'i: “Yimɓe Mo'ab mbaɗi aybe dow aybe, fakat mi hiitoto ɓe ngam ɓe nguli i'e laamiiɗo Edoom haa ɗe kukki.

²Ngam maajum nelanmi yiite nder lesdi Mo'ab, nge nyaama cuuɗi Keriyot cemmbiɗɗi. Mo'ab waatan caka hoolo konu e dukoore e hoolo luwe.

³Mi nattinan laamiiɗo Mo'ab, mi halkidan mo bee ardiiɓe maako fuu.” Non Jawmiraawo wi'i.

⁴Ndaa nii Jawmiraawo wi'i: “Yimɓe Yahuuda mbaɗi aybe dow aybe, fakat mi hiitoto ɓe ngam ɓe njawi tawreeta am, ɓe ɗowtanaaki farillaaji am. Labbi maɓɓe majjini ɓe bee pewe maaji, ɗe kaakiraaɓe maɓɓe tokkino ɗum.

⁵Ngam maajum nelanmi yiite nder lesdi Yahuuda, nge nyaama cuuɗi Urusaliima cemmbiɗɗi.”

⁶Ndaa nii Jawmiraawo wi'i: “Yimɓe Isra'iila mbaɗi aybe dow aybe, fakat mi hiitoto ɓe ngam ɓe ɗon coorra adili'en ngam ɓe keɓa ceede. Ɓe ɗon coorra talaka'en boo, ngam ɓe keɓa paɗe.

⁷Ɓe ɗon ndamma hoore laafuɗo nder mbulwuldi, ɓe ɗon cottina gooŋga leesɓe haa kiita. Goɗɗo e baaba muuɗum ɗon mbaalda bee paanyo debbo gooto, bana nii ɓe coɓniri innde am seniinde.

⁸Ɓe mbaaloto kommbi kirsirɗe fuu dow limce ɗe ɓe njaɓi jeŋngina[2]. Nguykinoojam ɗam ɓe njaɓti haa yimɓe, ɓe njara ɗam nder suudu Allah maɓɓe.

⁹Ammaa ɗum min nattini Amoori'en yeeso mooɗon, kamɓe ɓe marno semmbe bana leɗɗe cemmbiɗɗe. Mi ta'i ɓiɓɓe leɗɗe ɗe'e haa dow e ɗaɗi maaje haa les.

¹⁰Ɗum min wurtini on Misra, mi ɗowi on nder ladde duuɓi cappanɗe nayi haa mi marna on lesdi Amoori'en.

¹¹Mi ummini annabi'en caka ɓiɓɓe mooɗon, Naziri'en boo caka suka'en mooɗon. Naa non naa, Isra'iila'en?” Non Jawmiraawo wi'i.

¹²Ammaa onon on njarni Naziri'en nguykinoojam, on umri annabi'en: Taa mbaɗe annabaaku!

¹³“Min mi ɗigginan on bana moota pucci keewŋga ƴommbe ɗigginirta.

¹⁴Nden jaawɗotooɗo daɗataa, semmbe cemmbiɗɗo nafataa mo, koo baawɗo konu boo hisnataa yoŋki mum.

¹⁵Piɗoowo kuri darataako, jaawɗotooɗo daɗataa bee kosɗe mum, ba'iiɗo puccu hisnataa yoŋki mum.

¹⁶Koo baawɗo konu cuusɗo, nyalaade man o wudinan balmi maako, o dogga o temmbo.” Non Jawmiraawo wi'i.