Read Fulfulde Amos 4 Bible Online

Amos 4 - Fulfulde bible

Amos 4

¹Nane wolde nde'e, onon rewɓe fayɓe bana na'i Baasan[4], wonɓe dow hooseere Samariya: On ɗon toonya laafuɓe, on ɗon torra talaka'en, on ɗon mbi'a worɓe mooɗon: “Ngadde njaram, min njara!”

²Allah Jawmiraawo hunori bee senaare muuɗum: “Fakat, nyalɗe ngaran dow mooɗon, haa konne'en ngurtina on bee ngoodi e luttuɓe mooɗon bee kunayel bana liɗɗi.

³Nden on ngurtorto ceekli mahol, koo moy fuu tiitoto yeeso muuɗum, ɓe ndiiwan on gal hooseere Hermoon.” Non Jawmiraawo wi'i.

⁴Jawmiraawo wi'i: “Njehe haa Baytila, mbaɗe aybe! Njehe haa Gilgal, ɗuɗɗine aybeeji! Nde weeti fuu, ngadde kirseteeɗi mon e nyalaade tataɓre fuu, ngadde zakka mon!

⁵Ngule tamseeje ufnaaɗe ngam dokkal yettoore. Ngooyne umroore haa koo moy wadda dokkal caahiiŋgal. Ngam irin ɗu'um ngiɗɗon waɗugo, naa bana nii na, onon Isra'iila'en?”

⁶Jawmiraawo wi'i: “Min ukkani on weelo nder gure mon fuu, on keɓaay ko on nyaama nder nokkuuje mon fuu. Bee non fuu, on lortaaki haa am.

⁷Min mi salani on iyeende, saa'i nde lutti lebbi tati haa ƴaamnde waɗa. Mi toɓni iyeende dow wuro wooto, ammaa dow wuro wooɗŋgo mi toɓnaay iyeende. Ngesa ngoota soofi bee maare, ammaa ngesa ngoɗka heɓaay nde, ka yoori.

⁸Ngam maajum yimɓe gure ɗiɗi koo tati njehi haa wuro wooto ngam yarugo ndiyam, ɓe ɗomɗitaaki boo. Bee non fuu, on lortaaki haa am.” Non Jawmiraawo wi'i.

⁹“Mi yoorni e mi nyolni demetirle mon. Baɓɓatti nyaami jarne mon e gese inabooje mon e ibbe mon e jaytunje mon. Bee non fuu, on lortaaki haa am.” Non Jawmiraawo wi'i.

¹⁰“Mi neli nyawu kalluŋgu ndaaɓoowu caka mooɗon, bana ɓooyma haa Misra. Mi mbardi suka'en mooɗon bee kaafahi, mi dahi pucci mon. Mi ummini kacceeŋga caŋngeeje mon haa nga nasta kine mon. Bee non fuu, on lortaaki haa am.” Non Jawmiraawo wi'i.

¹¹“Mi halki woɗɓe mooɗon bana mi halkiri Sodoma e Gomorra. On laati bana leggel jamnaaŋgel ngel goɗɗo wurtini diga yiite. Bee non fuu, on lortaaki haa am.” Non Jawmiraawo wi'i.

¹²“Ngam maajum, onon Isra'iila'en, on ndaaran ko mi waɗata on. Ngam man taaskane fottugo bee Allah mooɗon!”

¹³Ndaa, kaŋko o waɗi kooseeje, o tagi henndu. O ɗon anndina neɗɗo ko o annini. O ɗon wartira jayŋgol fajiri nyiɓre. O ɗon yaaɓa dow towɗe duniyaaru. Innde maako Jawmiraawo, Allah honooɓe asama.