Read Fulfulde Amos 7 Bible Online

Amos 7 - Fulfulde bible

Amos 7

¹Ndaa ko Allah Jawmiraawo yi'ni yam: O waɗi baɓɓatti ɗuuɗɗi, saa'i haako ɗon wilita, ngam ɓe aarti ɓe mba'ani ko laamiiɗo.

²Nde baɓɓatti timmini nyaamugo haako lesdi fuu, mi wi'i: “Yaa Jawmiraawo, Allah, yaafa! Noy Yaakubu darorto? O pamaro!”

³Jawmiraawo faasiti waɗugo sarru. O wi'i: “Ɗum laatataako!”

⁴Ndaa ko Jawmiraawo Allah yi'ni yam: O ewni yiite ngam o hiitoro bee maage. Nge nyaami ilamji gonɗi nder luggeeŋga lesdi. Nge nyaami gese boo.

⁵Nden mbi'mi: “Yaa Jawmiraawo Allah, accu! Noy Yaakubu dartorto? O pamaro!”

⁶Jawmiraawo Allah faasiti waɗugo sarru. O wi'i: “Kanjum boo ɗum laatataako!”

⁷Ndaa ko Jawmiraawo yi'ni yam: O ɗon dari dow mahol darnuŋgol. Njamndi poondirdi ɗon haa juŋngo maako.

⁸O ƴami yam: “Amos, ko ngi'ata?” Mi jaabi: “Njamndi poondirdi.” Jawmiraawo wi'i: “Ndaa, mi foondan yimɓe ummaatoore am bee njamndi man. Yeeso ɗo mi hiitoto ɓe, mi meetataa enɗugo ɓe.

⁹Nokkuuje Isiyaaku towɗe kalkan, cuuɗi Isra'iila cenaaɗi laatoto bille. Mi ummanto saare Yerobo'am bee kaafahi.”

¹⁰Amasiya, limanjo haa Baytila neldi habaru haa Yerobo'am, laamiiɗo Isra'iila, wi'ugo ni'i: “Amos ummini tuurtol dow maaɗa caka Isra'iila'en. Yimɓe lesdi mbaawataa munyango bolle maako fuu.

¹¹Ngam Amos ɗon wi'a: Yerobo'am maayran bee kaafahi. Isra'iila dahete daayiiɗum bee lesdi muuɗum.”

¹²Nden Amasiya wi'i Amos: “An gi'oowo, doggu! Dillu haa lesdi Yahuuda! Nyaamoy nyaamdu ma, waɗ annabaaku ma ton!

¹³Ammaa taa meetu waɗugo annabaaku haa Baytila, ngam suudu seniindu ndu'u laamiiɗo jeyi, ɗum haykaliiru yimɓe laamu ngu'u!”

¹⁴Amos jaabi Amasiya: “Naa mi annabiijo, naa mi pukaraajo annabi boo, mi gaynaako e bo'inoowo ibbe.

¹⁵Ammaa Jawmiraawo hoo'i yam saa'i mi ɗonno dura dammooji, o umri yam, o wi'i: Yah, waɗan ummaatoore am Isra'iila annabaaku.

¹⁶Kadi nan wolde Jawmiraawo jonta: A wi'i taa mi waɗa annabaaku dow Isra'iila, taa mi waazina danygol Isiyaaku!

¹⁷Ngam maajum, ndaa nii Jawmiraawo wi'i: Debbo ma laatoto daakaareejo nder berniwol, ɓiɓɓe ma worɓe e rewɓe maayran bee kaafahi. Konne'en cenndan gese ma bee ɓoggol poondirgol. An bee hoore ma a maayan haa lesdi coɓndi. Fakat, Isra'iila'en ɓe ndaheteeɓe daayiiɗum bee lesdi maɓɓe.”