Read Fulfulde Amos 8 Bible Online

Amos 8 - Fulfulde bible

Amos 8

¹Ndaa ko Jawmiraawo Allah yi'ni yam: Silaawo heewŋgo ɓiɓɓe leɗɗe ɓennduɓe.

²O ƴami: “Amos, ko ngi'ata?” Mi jaabi: “Silaawo heewŋgo ɓiɓɓe leɗɗe ɓennduɗe.” Jawmiraawo wi'i yam: “Ragare yimɓe ummaatoore am Isra'iila yottake! Yeeso ɗo mi hiitoto ɓe, mi meetataa enɗugo ɓe.

³Nyalaade ɗon wara haa gimi nder laamorde laato bojji. Nyawmanɗe ɗuuɗan, yimɓe ngudinan ɗe koo toy, jeende mawnde laatoto!” Non Jawmiraawo Allah wi'i.

⁴Nane ɗu'um, onon toonyooɓe talaka'en, nattinooɓe leesɓe nder lesdi.

⁵On ɗon mbi'a: “Ndey juulde lewru hesru timmata, nyannde siwtorde boo saaloto, haa en maɓɓita beembe, en coorra alkamaari? Haa en pamɗitina etirgal, en mawnina kaa'e awnorɗe, en mbaɗa soodooɓe rikici bee awnorɗum pewoojum?

⁶Haa en coorra hooreeri, en cooda laafuɓe, en cooda talaka'en boo bee paɗe?”

⁷Jawmiraawo huni bee mawnitaare Yaakubu, o wi'i: “Mi yejjitittaa kuuɗe maɓɓe haa foroy!

⁸Ngam daliila man lesdi dimmboto, koo moy jooɗiiɗo nder maari wonan nder suno. Ndi towtan, nden ndi leestan bana maayo Niil haa Misra.”

⁹Jawmiraawo wi'i: “Nyalaade man mi mutinan naaŋge haa caka nyalawma, mi waɗan nyiɓre dow lesdi saa'i jayŋgol nyalawma.

¹⁰Mi waylan juulɗe mooɗon ɗe laatoto suno, gimi mooɗon boo laatoto bojji. Mi waɗan on fuu on kadda limce buhuuje, on laɓda ko'e mon. Mi laatinan bojji bana to ɓiɗɗo bajjo maayi. Ragare man haaɗan bana nyalaade mettamɓeram.”

¹¹Jawmiraawo wi'i: “Ndaa, nyalɗe ɗon ngara haa mi nelda weelo nder lesdi, naa weelo nyiiri, naa ɗomka ndiyam boo, ammaa ngam nanugo bolle Jawmiraawo.

¹²Yimɓe ndimmboto diga mbeela nga'a haa ngaya, ɓe ngiilo diga woyla haa fuunaaŋge ngam ɗaɓɓititgo wolde Jawmiraawo, ammaa ɓe tawataa nde!

¹³Nyalaade man faanyɓe wooɗɓe e suka'en njanan ngam ɗomka.

¹⁴Kamɓe ɓe ɗon kunoro jonta bee aybe Samariya[6], ɓe ɗon mbi'a: Mi ɗon hunoro bee ɗowanteeɗo maaɗa geeto, yaa Dan! Malla boo: Mi hunoro bee laawol cenaaŋgol jahranŋgol Biirsaba! Ammaa ɓe njanan, ɓe ummitittaako.”