Read Fulfulde Limle 14 Bible Online

Limle 14 - Fulfulde bible

Limle 14

¹Jama'aare Isra'iila fuu wooki, woyi jemmaare man fuu.

²Isra'iila'en fuu ngurŋgurti dow Muusa e Haruna, mbi'i: “Ndikkana min maayugo haa Misra, koo haa ɗo nder ladde nde'e!

³Koni Jawmiraawo yahrata min haa lesdi ndi'i to nii min maayra bee kaafahi, rewɓe amin e ɓikkoy amin boo laato keɓal konu? Naa ndikka min loro haa Misra?”

⁴Nden ɓe mbi'mbi'tiri: “En cuɓa ardiiɗo, en lorto haa Misra!”

⁵Ammaa Muusa e Haruna cujidani Jawmiraawo yeeso jama'aare Isra'iila fuu.

⁶Yosuwa ɓii Nuuna e Kaaleb ɓii Yefunna, horunooɓe lesdi go, ceeki limce muuɗum'en ngam daliila metteeŋga.

⁷Ɓe mbi'i jama'aare Isra'iila fuu: “Lesdi ndi min kori ɗum, ndi mboondi masin!

⁸To Jawmiraawo yerdake en, o yahran en ton, o hokka en ndi. Lesdi ndi'i heewi kosam e njumri!

⁹Tan nii, taa on tuurtana Jawmiraawo! Taa kule boo ummaatoore wonnde ton ngam en njaaloto nde bee koyɗum. Nde walaa fadduye fahin, ammaa enen kam Jawmiraawo ɗon wondi bee meeɗen. Taa kule nde!”

¹⁰Jama'aare fuu wolwi haala fiɗugo ɓe bee kaa'e. Ammaa ndaa, tedduŋgal Jawmiraawo waŋgani Isra'iila'en fuu haa laymaaru fottirde.

¹¹Jawmiraawo wi'i Muusa: “Haa ndey yimɓe ɓe'e tokkoto yawaago yam? Bee alaamaaji ɗuuɗɗi ɗi mbaɗmi caka maɓɓe, haa ndey ɓe caloto hoolaago yam?

¹²Mi ukkanan ɓe nyawu kalluŋgu ndaaɓoowu, mi nattinan ɓe! Ammaa an, mi laatinte ummaatoore mawnde, semmbiɗnde, ɓurannde nde maɓɓe.”

¹³Ammaa Muusa wi'i Jawmiraawo: “Misra'en nani no a wurtiniri ummaatoore nde'e caka maɓɓe bee baawɗe ma,

¹⁴ɓe ngecci ɗum jooɗiiɓe lesdi ndi'i. Ɓe nani, an, yaa Jawmiraawo, a ɗon caka ummaatoore nde'e, a waŋgani nde bee baŋguɗum, ruuldere maaɗa ɗon dow maare ngam faddugo nde, bee naaŋge a ardi nde bee ruuldere nanndunde bee daŋraŋgal e bee jemma boo bee yiite nannduŋge daŋraŋgal.

¹⁵To a mbari ummaatoore nde'e fuu jonta, ummaatooje nanɗe haala kuuɗe maaɗa mbi'an:

¹⁶Jawmiraawo huni o hokkan ummaatoore nde'e lesdi ndi'i, ammaa o waawaay nastingo nde nder maari, o mbari nde nder ladde!

¹⁷Mi ɗon toro ma, yaa Jawmiraawo, waŋginan min baawɗe ma, ngam a wi'i:

¹⁸Min Jawmiraawo, mi tikkataa law, mbooɗeeŋga am ɗuuɗi, mi munyanan tuurtol, mi yaafoto tuurtol e hakke. Ammaa mi laarataa aybuɗo bana laaɓɗo sam. Mi hiitoto aybe baabiraaɓe haa ɓiɓɓe e taaniraaɓe haa yidere tataɓre e nayaɓre.

¹⁹Mi ɗon toro ma, yaafa aybe ummaatoore nde'e fodde mbooɗeeŋga ma ɗuuɗŋga, bana no a yaafori nde diga nde ɗonno haa Misra haa wargo hannde.”

²⁰Jawmiraawo jaabi: “Mi yaafake nde fodde wolde maaɗa.

²¹Ammaa fakat bana mi geeto, bana tedduŋgal am ɗon hebbina duniyaaru boo,

²²ummaatoore nde'e fuu nastataa lesdi man. Ngam nde yi'i tedduŋgal am e alaamaaji ɗi mbaŋginmi nder lesdi Misra e nder ladde boo, ammaa nde foondi yam bana nii nde sappo jonta, nde nananaay yam. Ngam maajum nde yi'ataa lesdi ndi kunaniimi kaakiraaɓe maare. Yawiiɓe yam fuu boo ngi'ataa ndi sam.

²⁴Ammaa jaggiiɗo am Kaaleb marɗo ruuhu feere, kaŋko o tokki yam bee ɓernde woore. Ngam maajum mi yahran mo nder lesdi ndi o hori, danygol maako maran ndi.

²⁵Amaleki'en e Kanaani'en ɗon njooɗi nder waadiwol. Onon kam, lorte jaŋngo haa ladde gal wakeere maayo Maaliya.”

²⁶Jawmiraawo wi'i Muusa e Haruna:

²⁷“Haa ndey ummaatoore hallunde nde'e tokkoto ngurŋgurtugo dow am? Mi nani Isra'iila'en ngurŋgurtiri dow am.

²⁸Wi' ɓe: Ndaa nii Jawmiraawo wi'i: Fakat bana mi geeto, mi waɗanan on fodde bolle ɗe on mbolwi yeeso am.

²⁹On maayan, ɓalli mon mbaaloto nder ladde nde'e! Limaaɓe mon fuu, mo duuɓi noogas e ko ɓuri, ngurŋgurtooɓe dow am

³⁰nastataa lesdi ndi mi hunino jo'ingo on ton, sonaa Kaaleb ɓii Yefunna e Yosuwa ɓii Nuuna!

³¹On mbi'i, konne'en njaɓtan ɓikkoy mon. Fakat mi yahran koy nder lesdi ndi on njawi, koy anndan ndi.

³²Ammaa onon, on mbaaloto nder ladde nde'e!

³³Ɓikkoy mon laatoto waynaaɓe nder ladde duuɓi cappanɗe nayi, ɓe njaran bone daliila zunuubaaji mon haa to on fuu on mbaalake nder ladde.

³⁴On kori lesdi ndi'i nyalɗe cappanɗe nayi. On ndoondoto kiita aybeeji mon duuɓi cappanɗe nayi, waato nduuɓu ngootu ngam nyalaade woore. Nden on anndan ko waɗata to mi waylitake, mi acci on.

³⁵Min Jawmiraawo wi'i ɗum, bana non mi waɗanta jama'aare hallunde nde'e, ngam nde hawti ngam honugo yam. Yimɓe maare maayan, ɓe nattan haa ɗo nder ladde.”

³⁶Nde worɓe ɓe Muusa nelno horugo lesdi go ngarti, kallini lesdi man, ɓe ummini ɓernde ummaatoore fuu haa nde ngurŋgurti dow maako.

³⁷Worɓe hallinɓe lesdi maayri bee masiibo yeeso Jawmiraawo,

³⁸sey Yosuwa ɓii Nuuna e Kaaleb ɓii Yefunna tan lutti bee yoŋki caka yahnooɓe horoygo lesdi.

³⁹Muusa yecci Isra'iila'en fuu bolle ɗe'e. Nden ɓe mboyi masin.

⁴⁰Jaŋngo man ɓe ndawi cub, ɓe mba'i yeereere hooseere, nden ɓe ɗon mbi'a: “Gooŋga min mbaɗi hakke. Min njahan haa nokkuure nde Jawmiraawo yecci min.”

⁴¹Ammaa Muusa wi'i: “Koni on ɗowtantaako umroore Jawmiraawo jonta? On kumtataa.

⁴²Jawmiraawo wondataa bee mooɗon. Taa njehe, ngam taa konne'en mon njaalo on.

⁴³Amaleki'en e Kanaani'en boo ɗon yeeso mooɗon ton! On maayran bee kaafahi ngam on acci tokkaago Jawmiraawo, kaŋko boo o wondataa bee mooɗon!”

⁴⁴Bee non fuu ɓe caatini ko'e maɓɓe, ɓe mba'i yeereere hooseere. Ammaa sundukru alkawal Jawmiraawo e Muusa ngurtaaki saŋngeere.

⁴⁵Amaleki'en e Kanaani'en jooɗiiɓe dow hooseere man njippi, njaali ɓe, njaaɓi ɓe haa yotti Horma.