Read Fulfulde Limle 19 Bible Online

Limle 19 - Fulfulde bible

Limle 19

¹Jawmiraawo wi'i Muusa e Haruna,

²ɓe anndina Isra'iila'en farilla ka o umri ɓe: “Ngadde nagge woɗeeye nge walaa aybe, nge meeɗaay kaɓɓirgal.

³Ndokke nge Eli'azaaru limanjo. Goɗɗo yahra nge yaasi saŋngeere, hirsa nge yeeso limanjo.

⁴Eli'azaaru hoo'a ƴiiƴam maage seɗɗa bee hoondu mum, wicca ɗam nde joweeɗiɗi heedi laymaaru fottirde.

⁵Nden goɗɗo go wula nagge man yeeso limanjo, laral e kusel e ƴiiƴam e teteki fuu.

⁶Limanjo hoo'a tayre leggal cemmbiɗŋgal e haako isop[15] e leppel boɗeeyel coy, sakkina ɗum nder yiite wulanŋge nagge.

⁷Ɓaawo man o loota limce maako, o yiiwo. Nden o loro haa saŋngeere, ammaa o laatoto coɓɗo haa kiikiiɗe.

⁸Gulɗo nagge go, kanyum boo loota limce mum, o yiiwo, ammaa o laatoto coɓɗo haa kiikiiɗe.

⁹Goɗɗo mo soɓaay, ɓofta ndoondi nagge man, yahra ndi haa nokkuure senaande yaasi saŋngeere. Jama'aare Isra'iila sigo ndi ton ngam taaskitinki ndiyam ittirɗam coɓki. Kanjum woni kirseteeŋga ngam ittuki hakke.

¹⁰Ɓoftuɗo ndoondi loota limce mum, ammaa o laatoto coɓɗo haa kiikiiɗe. Ɗum laatoto farilla nduumiika haa foroy caka Isra'iila'en e hoɗɓe wonɓe caka maɓɓe fuu.”

¹¹“Koo moy meemi maayɗo, soɓan nyalɗe joweeɗiɗi.

¹²Sey o laɓɓina hoore maako bee ndiyam ittirɗam coɓki, nyannde tataɓre e nyannde joweeɗiɗawre, nden o laaɓan. Ammaa to o laɓɓinaay hoore maako nyannde tataɓre e nyannde joweeɗiɗawre, o laaɓataa.

¹³Meemɗo maayɗo fuu, to laɓɓinaay hoore mum, ɗon soɓna jooɗorde Jawmiraawo. O gurtinteeɗo diga Isra'iila ngam o coɓɗo mo wiccaaka ndiyam ittirɗam coɓki, coɓki maako ɗon tabiti.

¹⁴Ndaa umroore to goɗɗo maayi nder laymaaru: Koo moy gonɗo ton saa'i man fuu malla nastuɗo ton, laatoto coɓɗo nyalɗe joweeɗiɗi.

¹⁵Fayannde koo ndeye nde walaa maɓɓoode haɓɓaande dow muuɗum, soɓan.

¹⁶Meemɗo mbaraaɗo bee kaafahi malla maayɗo malla i'e goɗɗo malla yenaande haa ladde fuu soɓan nyalɗe joweeɗiɗi.

¹⁷To goɗɗo soɓi, sey on koo'a ndoondi nagge wulaaŋge ngam ittuki hakkeeji go seɗɗa, on mbaɗa ndi haa fayannde, on ndufa ndiyam seeɓoore dow maari.

¹⁸Goɗɗo mo soɓaay, hoo'a lisal isop, suuwa ngal nder ndiyam, wicca ɗam dow suudu e kuuje gonɗe nder maaru e yimɓe wonɓe nder maaru fuu, non boo dow meemɗo i'e goɗɗo malla mbaraaɗo malla maayɗo malla yenaande.

¹⁹Mo soɓaay, wicca ɗam dow coɓɗo nyannde tataɓre e nyannde joweeɗiɗawre. Nyannde joweeɗiɗawre coɓnooɗo laɓɓinan hoore mum, loota limce mum, yiiwo, kiikiiɗe man o laaɓan.

²⁰Coɓɗo mo laɓɓinaay hoore mum, o gurtinteeɗo diga mooɓtorde Isra'iila'en ngam o soɓni suudu Jawmiraawo seniindu. O laati coɓɗo ngam ndiyam ittirɗam coɓki wiccaaka dow maako.

²¹Ɗum laatanto on farilla nduumiika haa foroy. Biccuɗo ndiyam ittirɗam coɓki, kaŋko boo o loota limce maako. Ngam koo moy meemi ndiyam man, soɓan haa kiikiiɗe.

²²Ko coɓɗo meemi fuu, soɓan. Koo moy meemi ɗum boo, soɓan haa kiikiiɗe.”