Read Fulfulde Limle 20 Bible Online

Limle 20 - Fulfulde bible

Limle 20

¹Nder lewru aranndu, yimɓe jama'aare Isra'iila fuu njotti ladde Ciin. Ɓe caŋngini haa Kaades. Miriyam maayi, ɓe uwi mo ton.

²Yimɓe jama'aare heɓaay ndiyam. Ngam maajum ɓe mooɓotiri dow Muusa e Haruna.

³Ɓe njokkiri bee Muusa, ɓe mbi'i: “To min kalkino saa'i banndiraaɓe amin kalka yeeso Jawmiraawo ɓuri!

⁴Koni ngadduɗon mooɓtorde Jawmiraawo nder ladde nde'e? Haa min maaya e dabbaaji amin boo mbaata!

⁵Koni ngurtinɗon min lesdi Misra, ngadduɗon min haa nokkuure hallunde nde'e? Min keɓataa aawugo haa ɗo, walaa ibbe, walaa inabooje, walaa rummaanooje. Koo ndiyam haa min njara boo walaa.”

⁶Muusa e Haruna acci jama'aare, njehi haa dammugal laymaaru fottirde, cujidi ton. Tedduŋgal Jawmiraawo waŋgani ɓe.

⁷Jawmiraawo wi'i Muusa:

⁸“Hoo'u sawru ma. An e deerɗa Haruna, mooɓte jama'aare. Mbolwane tapaare nde'e yeeso yimɓe fuu, haa nde ilna ndiyam. Bana non ngurtinirton ndiyam haa tapaare haa yimɓe njara, on njarna dabbaaji boo.”

⁹Muusa yehi, hoo'i sawru wonndu yeeso Jawmiraawo bana o umruno mo.

¹⁰Muusa e Haruna mooɓti yimɓe yeeso tapaare man. Muusa wi'i ɓe: “Nane, onon tuurtooɓe! Min ngurtinanan on ndiyam diga tapaare nde'e na?”

¹¹Nden o ɓaŋgti juŋngo maako, o fiyi tapaare bee sawru maako nde ɗiɗi. Ndiyam ɗuuɗɗam wurti, ummaatoore e dabbaaji fuu njari.

¹²Ammaa Jawmiraawo feli Muusa e Haruna, wi'i ɓe: “On nuɗɗinaay yam, on ceedaay senaare am yeeso Isra'iila'en. Ngam maajum on nastintaa ɓe nder lesdi ndi ndokkanmi ɓe.”

¹³Kanjum woni ndiyam Meriba[16] haa Isra'iila'en njokkiri bee Jawmiraawo, kaŋko boo o waŋginani ɓe senaare maako.

¹⁴Muusa neli nelaaɓe diga Kaades haa laamiiɗo Edoom, ɓe mbi'a mo: “Ndaa ko deerɗiraawo maaɗa Isra'iila wi'i: A anndi torra ka heɓi min fuu.

¹⁵Kaakiraaɓe amin njehi Misra, min njooɗi ton duuɓi ɗuuɗɗi. Misra'en torri min e kaakiraaɓe amin.

¹⁶Min tori Jawmiraawo. O jaɓi tornde amin, o neli malaa'ikaajo gurtinɗo min Misra. Jonta min ɗon haa wuro Kaades, haa keerol maral ma.

¹⁷Min ngiɗi saalaago lesdi ma, to a jaɓi, min nastataa gese alkamaari malla gese inabooje, min njarataa ndiyam haa ɓulli mon boo. Min tokkoto buuwol maŋngol, min celataa ngol koo haa nyaamo malla haa nano, haa to min caalake maral ma.”

¹⁸Ammaa laamiiɗo Edoom jaabi: “On caalataako lesdi am. To on ngari, min kippoto on bee kaafaaje!”

¹⁹Isra'iila'en mbi'i: “Min tokkoto buuwol kadi. To dabbaaji amin malla minin bee ko'e amin min njari ndiyam mon, min njoɓan ɗam. Walaa ko min ngiɗi, sey saalaago tan.”

²⁰Ammaa o jaabi: “On caalataako sam!” Nden jama'aare konu Edoomi'en ɗuuɗnde, semmbiɗnde wurti ngam fottugo bee Isra'iila'en.

²¹Bana non Edoomi'en kaɗiri ɓe saalaago maral muuɗum'en. Isra'iila'en celi, tokki laawol goɗŋgol.

²²Jama'aare Isra'iila fuu ummi Kaades, wari les hooseere Hor,

²³haa keerol lesdi Edoom. Ton Jawmiraawo wi'i Muusa e Haruna:

²⁴“Haruna nastataa lesdi ndi ndokkumi Isra'iila'en ngam on tuurtani umroore am haa ndiyamji Meriba. O hawtoyan bee yimɓe le'i maako.

²⁵An Muusa, wa'oda bee Haruna e ɓiyiiko Eli'azaaru dow hooseere Hor.

²⁶Ɓortu Haruna limce mum, ɓornu ɗe ɓiyiiko Eli'azaaru, ngam Haruna maayan ton, o hawtoyan bee yimɓe maako.”

²⁷Muusa waɗi bana Jawmiraawo umri mo. Ɓe mba'i dow hooseere Hor gite jama'aare fuu.

²⁸Muusa ɓorti Haruna limce limanku, ɓorni ɗe Eli'azaaru. Haruna maayi ton dow yeereere hooseere. Nden Muusa e Eli'azaaru njippi.

²⁹Nde jama'aare faami Haruna maayi, Isra'iila'en fuu mboyi mo nyalɗe cappanɗe tati.