Read Fulfulde Limle 24 Bible Online

Limle 24 - Fulfulde bible

Limle 24

¹Balaama faami Jawmiraawo yerdi barkiɗingo Isra'iila'en. Ngam maajum o waɗaay hiilaaji bana naane. O huuciti gal ladde,

²o ɓaŋgti gite, o yi'i Isra'iila'en ɗon caŋngini fodde le'i muuɗum'en. Ruuhu Allah jippi dow maako,

³o waɗi annabaaku, o wi'i: “Ndaa koŋngol Balaama ɓii Be'or, gi'oowo,

⁴nananɗo ko Allah wi'ata, daaranɗo wahayu Allah Baawɗo, do'uɗo e mo gite mum cudditake:

⁵Cuuɗi laymaaji Yaakubu e jooɗorɗe Isra'iila mbooɗi masin.

⁶Ɗum ɗon we'iti bana waadiiji, bana jarne haa baŋnge maayo, bana leɗɗe uurooje ɗe Jawmiraawo jubi ɗum, bana leɗɗe cemmbiɗɗe dow pomoole maayo.

⁷Ndiyam ɗon ila diga nyeeruɗe maɓɓe, ɓe ɗon aawa haa nokkuuje marɗe ndiyam ɗuuɗɗam. Laamiiɗo maɓɓe ɓuran Agag mawnugo, laamu maako ɗon ɓesdo yeeso yeeso.

⁸Allah wurtini ɓe Misra. O ɗon haɓa ngam maɓɓe bana mbana marŋga luwe cemmbiɗɗe. Isra'iila'en moɗan konne'en muuɗum'en, waato ummaatooje, ngewan ɓe i'e, piɗan ɓe bee kuri muuɗum'en.

⁹Ummaatoore nde'e ɗon roŋgino, ɗon waalo bana mbarooga. Moy yiɗi haftingo nga? Barka laatanto koo moy barkiɗinanɗo Isra'iila, ammaa naaloore ukkanto koo moy naalanɗo Isra'iila!”

¹⁰Balak ɓerni, fiyi wiɓɓere mum, wi'i mo: “Mi ewni ma ngam a naala konne'en am. Ammaa an, a barkiɗini ɓe nde tati jonta!

¹¹Sottu law, hootu saare! Mi wi'i mi warjoto ma booɗɗum, ammaa Jawmiraawo haɗi ma jaɓugo mbarjaari man!”

¹²Balaama jaabi mo: “Mi wi'i nelaaɓe ma:

¹³Koo to Balak hokki yam cardi e kaŋŋeeri ngondi nder saare mum fuu, mi waawataa waɗugo koo ɗume ko luutata umroore Jawmiraawo bee anniya. Mi anndinte ko Jawmiraawo anndintammi fuu.”

¹⁴Balaama wi'i Balak: “Ndaa, mi hootan haa yimɓe am. Ammaa sey mi aarta mi anndine ko Isra'iila'en tammi waɗugo yimɓe ma nder zamanuuru waranndu.”

¹⁵Nden o waɗi annabaaku, o wi'i: “Ndaa koŋngol Balaama ɓii Be'or, koŋngol gi'oowo,

¹⁶koŋngol nananɗo ko Allah wi'ata, keɓɗo anndal haa Allah Ɓaŋiiɗo, daaranɗo wahayu Allah Baawɗo, do'uɗo e mo gite cudditake.

¹⁷Mi ɗon laara ko warata nder garanɗum, mi ɗon yi'a ko laataaki tawon. Laamiiɗo ummoto nder danygol Yaakubu bana horre, sawru laamu ɓaŋgoto nder Isra'iila. Kaŋko o fusan ko'e Mo'abi'en, o nattinan yimɓe danygol Setu fuu.

¹⁸O nyaaman lesdi Edoom, o nyaaman boo lesdi Se'ir, konne'en maako. Ammaa Isra'iila semmbiɗan,

¹⁹goɗɗo danygol Yaakubu laamoto. O nattinan hisɓe wonɓe nder berniwol.”

²⁰Nden Balaama yi'i Amaleki'en. O waɗi annabaaku, o wi'i: “Amaleki'en ɓuri ummaatooje fuu baawɗe, ammaa nder garanɗum halkere ukkanto ɓe.”

²¹Nden o yi'i Keni'en. O waɗi annabaaku, o wi'i: “Nokkuure joonde mon tabiti bana saɓɓo colli nder ceekgol tapaare,

²²ammaa on laatoto naŋngaaɓe Assuura'en. Onon danygol Kayinu, on nattan.”

²³Fahin Balaama waɗi annabaaku, wi'i: “Moy tammi yeeɗugo to Allah tabitini ɗum?[20]

²⁴Koommbooje[21] ɗon ngara diga duunde Kitti'en. Ɓe torran Assuura e Eber, ammaa kamɓe boo halkere ukkanto ɓe.”

²⁵Nden Balaama ummi, hooti saare. Balak boo tokkitini laawol mum.