Read Fulfulde Limle 28 Bible Online

Limle 28 - Fulfulde bible

Limle 28

¹Jawmiraawo wi'i Muusa,

²o anndina Isra'iila'en umrooje ɗe'e: “Kakkilane saa'iiji darnaaɗi haa on lii'ano Jawmiraawo dokke nyaamdu guleteeɗe marɗe uureeŋgol belŋgol pottananŋgol mo.

³Yeccu ɓe boo: Ndaa ko on lii'anto Jawmiraawo dow yiite: Nyalaaɗe fuu njawkoy ɗiɗoy koy nduuɓu, koy ngalaa aybe. Nguleteeŋga nga'a tokkite nyalaade fuu.

⁴Lii'anam jawgel gootel fajiri, gootel boo hakkunde maŋngariba bee esaa'i.

⁵Ɓesdu dokkal nyaamdu kuroori ɗiggundi jiiɓaandi kilo tati bee nebbam jaytunje arɓaaɗe liitir gootel.

⁶Kanjum woni nguleteeŋga nyalaade nyalaade, bana ko aartuɗon lii'aago haa hooseere Sina. Uureeŋgol man belŋgol fottanan Jawmiraawo.

⁷Ɓesde dokkal dufeteeŋgal haa jawgel guleteeŋgel fuu, on ndufa inaboojam liitir gootel nder suudu seniindu ngam Jawmiraawo.

⁸Lii'anam jawgel ɗiɗaɓel hakkunde maŋngariba bee esaa'i, kal-kal bana jawgel fajiri bee dokkal nyaamdu e dokkal dufeteeŋgal. Ɗum laatoto nyaamdu wuleteendu ngam Jawmiraawo, uureeŋgol man belŋgol fottanan mo.”

⁹“Nyannde siwtorde lii'ane Jawmiraawo njawkoy ɗiɗoy koy nduuɓu, koy ngalaa aybe, hawtaade bee dokkal nyaamdu: Kuroori kilo joweego njiiɓaandi bee nebbam e dokkal dufeteeŋgal.

¹⁰Lii'e nguleteeŋga nyalaade siwtorde. Ɓesde boo guleteeɗi e dokke dufeteeɗe nyalaade nyalaade.”

¹¹“Nyannde go'oore lewru koo nduye, lii'ane Jawmiraawo ga'i kalhali ɗiɗi e njawdiri mbaalu e njawkoy njoweeɗiɗoy koy nduuɓu, ɗum fuu ɗum walaa aybe,

¹²hawtaade bee dokkal nyaamdu, kuroori njiiɓaandi bee nebbam kilo joweenayi ngam ngaari fuu, kilo joweego ngam njawdiri fuu

¹³e ngam jawgel fuu kilo tati tati. Ɗum fuu ɗum nyaamdu wuleteendu ngam Jawmiraawo, uureeŋgol man belŋgol fottanan mo.

¹⁴Ndaa dokke dufeteeɗe ɗe ɓesdoton: Ngam ngaari fuu liitir ɗiɗi, ngam njawdiri fuu boo liitir gootel bee reetita, liitir gootel ngam jawgel fuu. Kanjum woni umroore dow guleteeɗi nyannde go'oore lewru koo nduyeeru nder hitaande fuu.

¹⁵Lii'ane Jawmiraawo njawdiri mbeewa kirseteendi ngam ittuki hakkeeji boo. Ɓesde ɗum haa guleteeɗi e dokke dufeteeɗe nyalaade nyalaade.”

¹⁶“Nyannde sappo e nayaɓre nder lewru aranndu, mbaɗane Jawmiraawo juulde Paska.

¹⁷Nyannde sappo e jowaɓre laatoto nyannde juulde, on nyaaman tamseeje ɗe ufnaaka nyalɗe joweeɗiɗi.

¹⁸Nyannde arannde on mooɓto mooɓtorde senaande ngam sujidango Jawmiraawo. Taa kuuwe kuugal naawŋgal sam.

¹⁹Lii'ane Jawmiraawo nyaamdu wuleteendu: Ga'i kalhali ɗiɗi e njawdiri mbaalu e njawkoy njoweeɗiɗoy koy nduuɓu, ɗum fuu ɗum walaa aybe. Ɗum laatanto on.

²⁰Ngadde boo dokkal nyaamdu: Kuroori njiiɓaandi bee nebbam, kilo joweenayi ngam ngaari fuu, kilo joweego ngam njawdiri fuu,

²¹ngam njawkoy boo, kilo tati tati.

²²Lii'e boo njawdiri mbeewa kirseteendi ngam ittuki hakkeeji mon.

²³Ɓesde ɗum haa nguleteeŋga fajiri fajiri.

²⁴Sey mbaɗon bana non nyalɗe joweeɗiɗi fuu, on lii'ano Jawmiraawo nyaamdu wuleteendu haa uureeŋgol man belŋgol fottana mo. Ɓesde ɗum haa guleteeɗi e dokke dufeteeɗe nyalaade nyalaade.

²⁵Nyannde joweeɗiɗawre mooɓte mooɓtorde senaande ngam sujidango Jawmiraawo. Taa kuuwe kuugal naawŋgal sam.”

²⁶“Haa fuɗɗam juulde asaweeje nde lii'antooɗon Jawmiraawo dokkal ƴaamnde mon aartunde, on mooɓto mooɓtorde senaande. Taa kuuwe kuugal naawŋgal sam.

²⁷Lii'ane Jawmiraawo guleteeɗi, haa uureeŋgol maaji belŋgol fottana mo. Ndaa ko lii'otooɗon: Ga'i kalhali ɗiɗi e njawdiri mbaalu e njawkoy njoweeɗiɗoy koy nduuɓu,

²⁸hawtaade bee dokke nyaamdu: Kuroori njiiɓaandi bee nebbam kilo joweenayi ngam ngaari fuu, kilo joweego ngam njawdiri fuu,

²⁹ngam njawkoy boo, kilo tati tati,

³⁰non boo njawdiri mbeewa kirseteendi ngam ittuki hakkeeji mon.

³¹Ɓesde ɗum haa guleteeɗi e dokke nyaamdu nyalaade nyalaade. Lii'ane Jawmiraawo guleteeɗi ɗi ngalaa aybe. Ɓesde boo dokke dufeteeɗe maaji.”