Read Fulfulde Limle 3 Bible Online

Limle 3 - Fulfulde bible

Limle 3

¹Ndaa danygol Haruna e ngol Muusa wakkati Jawmiraawo wolwani Muusa dow hooseere Sina.

²Ndaa inɗe ɓiɓɓe Haruna: Nadab, afo maako e Abihu e Eli'azaaru e Itamar.

³Ɓe moytaaɓe e ɓe halfitinaaɓe kuugal limanku.

⁴Ammaa Nadab e Abihu maayi yeeso Jawmiraawo nder ladde Sina nde ɓe ngaddi yiite nge senaaka yeeso maako. Ɓe ngalaa ɓikkoy. Eli'azaaru e Itamar kuuwi kuugal limanku dow ardaaŋgal baaba muuɗum'en Haruna.

⁵Jawmiraawo wi'i Muusa:

⁶“Umru yimɓe lenyol Lewi ɓadito. Darnu ɓe yeeso Haruna limanjo haa ɓe mballa mo.

⁷Ɓe kuuwanan mo e ɓe kuuwanan boo jama'aare fuu haa laymaaru fottirde. Ɓe kuuwan nder jooɗorde.

⁸Ɓe aynan kuuwruɗe gonɗe nder laymaaru fottirde, ɓe kuuwanan Isra'iila'en fuu. Ɓe kuuwan nder jooɗorde.

⁹Hokku Lewi'en haa Haruna e ɓiɓɓe mum, ɓe laatano ɓe dokkal caka Isra'iila'en.

¹⁰Ammaa Haruna e ɓiɓɓe mum, darnu ɓe haa ɓe kuuwa kuugal limanku. To goɗɗo feere ɓaditake ngam huuwa kuugal maɓɓe, o mbareteeɗo.”

¹¹Jawmiraawo wi'i Muusa:

¹²“Ndaa, min mi hoo'i Lewi'en caka Isra'iila'en mbattudi afɓe fuu, mbattudi afɓe Isra'iila'en. Lewi'en min jeyi,

¹³ngam afɓe fuu min jeyi. Wakkati mi mbari afɓe fuu nder lesdi Misra, mi seni afɓe e afi fuu nder Isra'iila. Afɓe yimɓe malla afi dabbaaji, min jeyi. Min woni Jawmiraawo.”

¹⁴Jawmiraawo wolwani Muusa nder ladde Sina, wi'i:

¹⁵“Lime Lewi'en fodde asli e ci'e[2] muuɗum'en. Lime worɓe fuu, diga mo lewru e ko ɓuri.”

¹⁶Muusa limi ɓe bana Jawmiraawo umri mo.

¹⁷Ndaa inɗe ɓiɓɓe Lewi: Gerson e Kehat e Meraari.

¹⁸Ndaa inɗe ɓiɓɓe Gerson fodde ci'e muuɗum'en: Libni e Sim'i.

¹⁹Ndaa inɗe ɓiɓɓe Kehat fodde ci'e muuɗum'en: Amram e Yicehar e Heburuun e Uzziyel.

²⁰Ndaa inɗe ɓiɓɓe Meraari fodde ci'e muuɗum'en: Mahali e Musi. Kamɓe ngoni ci'e Lewi'en.

²¹Woodi ci'e Gersoni'en ɗiɗi: Saare Libni e nde Sim'i.

²²Limgal winndaaɓe maɓɓe fuu waɗi ujine njoweeɗiɗo e teemeɗɗe njowo (7.500), worɓe ɓe lewru e ko ɓuri.

²³Ci'e Gersoni'en caŋngini ɓaawo jooɗorde, haa hiirnaaŋge.

²⁴Eliyasaf ɓii Layel woni baaba-saare maɓɓe.

²⁵Nder laymaaru fottirde, Gersoni'en halfitinaaɓe jooɗorde bee laymaaru maare e suddaare maare e wiirndallo wonŋgo haa nastirde laymaaru man,

²⁶non boo wiirndallooji daldal e wiirndallo haa nastirde daldal taariinde jooɗorde e gulduɗum uurle e ɓoggi maare e kuugal man fuu.

²⁷Woodi ci'e Kehati'en nayi: Saare Amram, saare Yicehar, saare Heburuun e saare Uzziyel.

²⁸Limgal worɓe ɓe lewru e ko ɓuri fuu waɗi ujine njoweetato e teemeɗɗe njoweego (8.600), ɓe kuuwan haa nokkuure seniinde.

²⁹Ci'e Kehati'en caŋngini haa wakeere jooɗorde fombinaare.

³⁰Elicafan ɓii Uzziyel woni baaba-saare maɓɓe.

³¹Ɓe halfitinaaɓe sundukru alkawal e taabal e jo'inirɗum pittirlaaji e gulduɗum uurle e kirsirɗe e kuuwruɗe ɗe liman'en kuuwtinirta haa nokkuure seniinde, non boo wiirndallo e kuugal man fuu.

³²Eli'azaaru ɓii Haruna limanjo woni hooreejo Lewi'en mawɗo, o aynoowo huuwooɓe haa nokkuure seniinde.

³³Woodi ci'e Meraari'en ɗiɗi: Saare Mahali e saare Musi.

³⁴Limgal winndaaɓe fuu waɗi ujine njoweego e teemeɗɗe ɗiɗo (6.200), worɓe ɓe lewru e ko ɓuri.

³⁵Curiyel ɓii Abihayil woni baaba-saare Meraari'en. Ɓe caŋngini haa wakeere jooɗorde woylaare.

³⁶Ɓe halfitinaaɓe kaataakooje jooɗorde, leɗɗe gaafotooɗe, daŋraŋge bee kosɗe maaje, kuuwruɗe e kuugal man fuu.

³⁷Non boo daŋraŋge daldal bee kosɗe maaje, tiggirɗe e ɓoggi.

³⁸Muusa e Haruna bee ɓiɓɓe muuɗum'en caŋngini yeeso laymaaru fottirde, haa fuunaaŋge. Ɓe halfitinaaɓe kuugal haa nokkuure seniinde ngam Isra'iila'en. To goɗɗo feere ɓaditake ngam huuwa kuugal maɓɓe, o mbareteeɗo.

³⁹Limgal Lewi'en worɓe, ɓe lewru e ko ɓuri ɓe Muusa e Haruna limi fodde ci'e muuɗum'en e fodde umroore Jawmiraawo waɗi ujine noogas e ɗiɗo (22.000).

⁴⁰Jawmiraawo wi'i Muusa: “Lim afɓe worɓe fuu nder Isra'iila, winndu ɓe innde innde, diga mo lewru e ko ɓuri.

⁴¹Min woni Jawmiraawo. Hoo'anam Lewi'en mbattudi afɓe Isra'iila'en fuu, non boo dabbaaji Lewi'en mbattudi afi dabbaaji Isra'iila'en fuu.”

⁴²Muusa limi afɓe worɓe fuu nder Isra'iila, bana Jawmiraawo umruno mo.

⁴³Limgal limaaɓe, diga ɓiŋngel ngel lewru e ko ɓuri waɗi ujine noogas e ɗiɗo e teemeɗɗe ɗiɗo e cappanɗe njoweeɗiɗo e tato (22.273).

⁴⁴Nden Jawmiraawo wi'i Muusa:

⁴⁵“Hoo'u jonta Lewi'en mbattudi afɓe worɓe fuu nder Isra'iila e dabbaaji Lewi'en mbattudi afi dabbaaji Isra'iila'en. Lewi'en min jeyi. Min woni Jawmiraawo.

⁴⁶Ammaa sey a sootta afɓe Isra'iila'en teemeɗɗe ɗiɗo e cappanɗe njoweeɗiɗo e tato (273), yowaaɓe dow limgal Lewi'en.

⁴⁷A hoo'a ngam koo moy maɓɓe ceede cardi jowi, fodde etirgal suudu seniindu: Teddeeŋga suleyje teemerre fuu waɗan baakin kilo gootel.

⁴⁸Hokku Haruna e ɓiɓɓe mum ceede coottaari ngam yowaaɓe dow limgal Lewi'en go.” Muusa jaɓi ceede man.

⁴⁹

⁵⁰Coottaari afɓe Isra'iila man waɗi ceede cardi ujineere e teemeɗɗe tati e cappanɗe joweego e jowi (1.365) fodde etirgal suudu seniindu.

⁵¹O hokki ɗe Haruna e ɓiɓɓe mum, bana Jawmiraawo umruno mo.