Read Fulfulde Limle 30 Bible Online

Limle 30 - Fulfulde bible

Limle 30

¹Muusa yecci Isra'iila'en ko Jawmiraawo umri mo fuu.

²Muusa wi'i hoore'en le'i Isra'iila: “Ndaa umrooje ɗe Jawmiraawo umri ɗum:

³To goɗɗo waɗani Jawmiraawo togayeere malla to o hunake dow anniya ka o hoo'i, nden kam taa o diwta wolde maako. Sey o hebbitina ko hunnduko maako wolwi fuu.

⁴To paanyo debbo gonɗo nder saare baaba mum waɗani Jawmiraawo togayeere malla hunayeere,

⁵baaba maako boo nani ɗum, ammaa wi'aay koo ɗume, nden kam togayeere malla hunayeere man ɗon tabiti, sey paanyo debbo oo hebbina ko o wi'i fuu.

⁶Ammaa to baaba maako nani ɗum, haɗi mo nyannde man nden, nden kam togayeere maako malla hunayeere maako laati meere. Jawmiraawo yaafanto mo, ngam baaba maako haɗi mo.

⁷To paanyo debbo waɗani Jawmiraawo togayeere malla hunayeere, nden o te'aama bilaa hebbitingo nde,

⁸to goriiko nani ɗum, wi'aay koo ɗume, nden kam sey debbo oo hebbina togayeere mum malla hunayeere mum.

⁹Ammaa nyannde nde goriiko nani haala ka'a, yerdaaki ka, o wila togayeere malla hunayeere debbo maako. Nden kam Jawmiraawo yaafoto debbo oo.

¹⁰To debbo jurumɗo malla ceeraaɗo waɗi togayeere malla hunayeere, sey o hebbitina nde.

¹¹To debbo te'aaɗo gonɗo nder saare gorum waɗi togayeere malla hunayeere,

¹²to goriiko nani ɗum, wi'aay koo ɗume, nden kam sey debbo oo hebbitina nde.

¹³Ammaa nyannde nde goriiko nani haala ka'a, yerdaaki ka, o wila togayeere malla hunayeere debbo maako. Nden kam Jawmiraawo yaafoto debbo oo.

¹⁴Gorko waawan tabitingo malla wilugo togayeere malla hunayeere debbo mum koo ndey.

¹⁵Ammaa to goriiko nani haala man, jeeɗake haa jaŋngo man, nden kam o tabitini togayeere malla hunayeere nde debbo waɗi. Sey debbo oo hebbitina nde.

¹⁶Ammaa to o wilaay ɗum nyannde nde o nani, nden kam kiita aybe debbo do'oto dow hoore goriiko.”

¹⁷Kanji ngoni farillaaji ɗi Jawmiraawo umri Muusa dow haala gorko bee debbo mum e baaba bee ɓiyum debbo gonɗo nder saare mum tawon.