Read Fulfulde Limle 33 Bible Online

Limle 33 - Fulfulde bible

Limle 33

¹Ndaa baalanɗe ɗe Isra'iila mbaɗi ɓaawo gurtaaki maɓɓe diga lesdi Misra, fodde mooɓe konu maɓɓe, dow ardaaŋgal Muusa e Haruna.

²Muusa winndi baalanɗe ɗe'e fuu fodde umroore Jawmiraawo. Ndaa baalanɗe man:

³Isra'iila'en ngurti Misra nyannde sappo e jowaɓre nder lewru aranndu, nyannde tokkiinde juulde Paska arannde. Bee baawɗe Jawmiraawo, ɓe ngurti berniwol Ra'meses dow gite Misra'en.

⁴Saa'i man Misra'en ɗon uwa ɓiɓɓe maɓɓe afɓe ɓe Jawmiraawo mbarno ɗum. Bana non Jawmiraawo hiitori ɗowanteeɓe Misra'en.

⁵Isra'iila'en ummi Ra'meses, caŋngini haa Sukkot.

⁶Ɓe ummi Sukkot, ɓe caŋngini haa Etam haa seɓatto ladde.

⁷Diga ton ɓe lori haa Pii-Hahirot haa fuunaaŋge Ba'al-Cefon, ɓe caŋngini baŋnge Migdol.

⁸Ɓe ummi Pii-Hahirot, ɓe caali weendu kewe, ɓe nasti ladde. Ɓe njehi nyalɗe tati nder ladde Etam, nden ɓe caŋngini haa Maara.

⁹Ɓe ummi Maara, ɓe ngari Elim. Ceeɓooje sappo e ɗiɗi ɗon ton, non boo dibinooje cappanɗe joweeɗiɗi.

¹⁰Ɓe ummi Elim, ɓe caŋngini baŋnge maayo Maaliya.

¹¹Diga ton ɓe ndilli ladde Siin.

¹²Ɓe ummi ladde Siin, ɓe caŋngini haa Dofka.

¹³Ɓe ummi Dofka, ɓe caŋngini haa Alus.

¹⁴Ɓe ummi Alus, ɓe caŋngini haa Refidim. Ndiyam ko yimɓe njara waala ton.

¹⁵Ɓe ummi Refidim, ɓe caŋngini haa ladde Sina.

¹⁶Ɓe ummi ladde Sina, ɓe caŋngini haa Kibirot-Hattaawa.

¹⁷Ɓe ummi Kibirot-Hattaawa, ɓe caŋngini haa Hacerot.

¹⁸Ɓe ummi Hacerot, ɓe caŋngini haa Ritma.

¹⁹Ɓe ummi Ritma, ɓe caŋngini haa Rimmon-Fares.

²⁰Ɓe ummi Rimmon-Fares, ɓe caŋngini haa Libna.

²¹Ɓe ummi Libna, ɓe caŋngini haa Rissa.

²²Ɓe ummi Rissa, ɓe caŋngini haa Kehelata.

²³Ɓe ummi Kehelata, ɓe caŋngini haa hooseere Sefer.

²⁴Ɓe ummi hooseere Sefer, ɓe caŋngini haa Harada.

²⁵Ɓe ummi Harada, ɓe caŋngini haa Makelot.

²⁶Ɓe ummi Makelot, ɓe caŋngini haa Tahat.

²⁷Ɓe ummi Tahat, ɓe caŋngini haa Tara.

²⁸Ɓe ummi Tara, ɓe caŋngini haa Mitka.

²⁹Ɓe ummi Mitka, ɓe caŋngini haa Hasmona.

³⁰Ɓe ummi Hasmona, ɓe caŋngini haa Moserot.

³¹Ɓe ummi Moserot, ɓe caŋngini haa Bene-Ya'akan.

³²Ɓe ummi Bene-Ya'akan, ɓe caŋngini haa Hor-Haggidgada.

³³Ɓe ummi Hor-Haggidgada, ɓe caŋngini haa Yotobata.

³⁴Ɓe ummi Yotobata, ɓe caŋngini haa Abaroona.

³⁵Ɓe ummi Abaroona, ɓe caŋngini haa Esiyon-Geber.

³⁶Ɓe ummi Esiyon-Geber, ɓe caŋngini haa ladde Ciin waato Kaades.

³⁷Ɓe ummi kaades, ɓe caŋngini haa hooseere Hor haa seɓatto lesdi Edoom.

³⁸Haruna limanjo wa'i dow hooseere Hor fodde umroore Jawmiraawo, maayi ton nder nduuɓu cappanɗe nayaɓu ɓaawo gurtaaki Isra'iila'en diga lesdi Misra, nyannde go'oore lewru jowaɓru.

³⁹Haruna waɗi duuɓi teemerre e noogas e tati (123), nden o maayi dow hooseere Hor.

⁴⁰Laamiiɗo Kanaani'en haa Arat nder yeɓre lesdi Kanaana fombinaare, nani Isra'iila'en ɗon ngara.

⁴¹Ɓe ummi hooseere Hor, ɓe caŋngini haa Calmon.

⁴²Ɓe ummi Calmon, ɓe caŋngini haa Punon.

⁴³Ɓe ummi Punon, ɓe caŋngini haa Obot.

⁴⁴Ɓe ummi Obot, ɓe caŋngini haa Iyyim-Abariima nder lesdi Mo'ab.

⁴⁵Ɓe ummi Iyyim, ɓe caŋngini haa Diblon-Gada.

⁴⁶Ɓe ummi Diblon-Gada, ɓe caŋngini haa Almon-Diblatayima.

⁴⁷Ɓe ummi Almon-Diblatayima, ɓe caŋngini haa kooseeje Abariima baŋnge Nebo.

⁴⁸Ɓe ummi kooseeje Abariima, ɓe caŋngini haa laɗɗe Mo'ab haa kommbi maayo Urdun haa fuunaaŋge Yeriko.

⁴⁹Ɓe caŋngini kommbi Yeriko diga Bayti-Yesimot haa yotti Abel-Sittim nder laɗɗe Mo'ab.

⁵⁰Jawmiraawo umri Muusa nder laɗɗe Mo'ab baŋnge Urdun haa fuunaaŋge Yeriko,

⁵¹o wi'a Isra'iila'en ni'i: “To on eerake maayo Urdun, on nasti lesdi Kanaana,

⁵²sey on ndiiwa jooɗiiɓe haa lesdi man fuu. Nattine labbi maɓɓe cehaaɗi nder kaa'e e labbi maɓɓe ɓolinaaɗi, ngibbine boo nokkuuje maɓɓe towɗe fuu.

⁵³Nyaame lesdi ndi'i, njooɗe ton, ngam min Jawmiraawo marni on ndi.

⁵⁴Cennde ndi bee kur'u fodde le'i mon e ci'e mon. Saare mawnde heɓa geɗal maŋngal, saare famarde boo heɓa geɗal pamaral, bana no kur'u waŋgiri ɗum.

⁵⁵Ammaa to on ndiiwaay jooɗiiɓe haa lesdi ndi'i, nden kam luttanɓe maɓɓe naawnan on bana kuɗoy nder gite mon malla gi'e nder buttuli mon, ɓe ɓillan on nder lesdi ndi njooɗotooɗon.

⁵⁶Min boo, mi waɗan on ko mi anninino waɗugo ɓe.”