Read Fulfulde Limle 34 Bible Online

Limle 34 - Fulfulde bible

Limle 34

¹Jawmiraawo wi'i Muusa,

²o umra Isra'iila'en ni'i: “To on nasti lesdi Kanaana ndi nyaamoton, ndi laatoto maral mon. Ndaa keeri maari:

³Haa fombina, keerol fuɗɗan haa ladde Ciin, tokkoto keerol Edoom. Ngol fuɗɗan haa seɓatto Weendu Mannda fombinaaho, wakeere fuunaaŋgeere.

⁴Nden ngol waylito gal fombina haa wa'orde Akrabbiima, ngol saaloto Ciin yahugo fombina haa yotto Kaades-Barne'a. Nden ngol yahan haa Hacar-Addar haa yotto Asmuuna.

⁵Ton boo ngol waylititto heedi maayel Misra, ngol haaɗan haa Mbeela.

⁶Haa hiirnaaŋge, fomoonde Mbeela woni keerol mon. Kaŋgo woni keerol mon hiirnaaŋgewol.

⁷Haa woyla, keerol mon fuɗɗan haa Mbeela. Diga ton mbaɗe keerol yahugo hooseere Hor

⁸haa yotto nastirde Hamat. Ngol tokkoto haa yotto boo Sedada

⁹e Zifiron, ngol haaɗan haa Hacar-Enon. Kaŋgol woni keerol woylawol.

¹⁰Haa fuunaaŋge, mbaɗe keerol mon diga Hacar-Enon haa Sefam.

¹¹Nden ngol diirtoto gal fombina haa Harbela, haa fuunaaŋge Ayin, haa yotto towndiije haa fuunaaŋge weendu Kinneret.

¹²Nden ngol tokkoto maayo Urdun gal fombina, ngol haaɗan haa Weendu Mannda. Kanjum laatoto keeri mon nayi fuu.”

¹³Muusa wi'i Isra'iila'en: “Kanjum woni lesdi ndi cenndoton bee kur'u haa maron ndi. Jawmiraawo hokki ndi le'i joweenayi e reeta.

¹⁴Ngam le'i Ruben e Gada e reeta lenyol Manassa keɓno maral muuɗum'en fodde ci'e[24] muuɗum'en

¹⁵haa fuunaaŋge Yeriko, gaa'e maayo Urdun.”

¹⁶Jawmiraawo wi'i Muusa:

¹⁷“Ndaa inɗe senndananɓe on lesdi: Eli'azaaru limanjo e Yosuwa ɓii Nuuna.

¹⁸Koo'e nder le'i mon boo ardiiɗo gooto gooto, haa ɓe mballa on senndugo lesdi man.

¹⁹Ndaa inɗe yimɓe maajum: Kaaleb ɓii Yefunna mo lenyol Yahuuda,

²⁰Samuyila ɓii Ammihudu mo lenyol Simeyon,

²¹Elidat ɓii Kisilon mo lenyol Benyamin,

²²Bukki ɓii Yogli mo lenyol Dan,

²³Hanniyel ɓii Efoda mo lenyol Manassa ɓii Yusufu,

²⁴Kemuwel ɓii Siftan mo lenyol Efrayim ɓii Yusufu,

²⁵Elicafan ɓii Parnak mo lenyol Zabulon,

²⁶Paltiyel ɓii Azzan mo lenyol Issakar,

²⁷Ahihuda ɓii Selomi mo lenyol Aser

²⁸e Pedahel ɓii Ammihudu mo lenyol Neftali.”

²⁹Kamɓe Jawmiraawo umri senndango Isra'iila'en lesdi Kanaana haa ɓe mara ndi.