Read Fulfulde Limle 7 Bible Online

Limle 7 - Fulfulde bible

Limle 7

¹Nyannde nde Muusa timmini darnugo laymaaru fottirde, o wuji ndu nebbam, o seni ndu, kayru e kuuwruɗe maaru fuu, non boo hirsirde e kuuwruɗe maare fuu. O wuji e o seni ɗum fuu.

²Nden baaba-ci'e'en[4], ardiiɓe le'i Isra'iila waato ɗowooɓe, limnooɓe Isra'iila'en go

³ngaddani Jawmiraawo dokke muuɗum'en. Ndaa ko ɓe ngaddi: Mootaaji ga'i cuddaaɗi joweego e ga'i sappo e ɗiɗi. Moota ga'i ngoota ngam ardiiɓe ɗiɗo, ngaari boo ngam ardiiɗo fuu. Ɓe ngaddi ɗi yeeso jooɗorde Jawmiraawo.

⁴Jawmiraawo wi'i Muusa:

⁵“Jaɓ dokke ɗe'e, kuuwtinire ɗe ngam kuugal laymaaru fottirde. Hokku ɗe Lewi'en, koo moy fodde haaje kuugal mum.”

⁶Muusa hoo'i mootaaji e ga'i ɗi'i, hokki ɗi Lewi'en.

⁷O hokki Gersoni'en mootaaji ɗiɗi e ga'i nayi fodde haaje kuuɗe maɓɓe.

⁸O hokki Meraari'en mootaaji nayi e ga'i joweetati fodde haaje kuuɗe maɓɓe. Ɓe kuuwi dow ardaaŋgal Itamar ɓii Haruna limanjo.

⁹Ammaa Kehati'en, Muusa hokkaay ɓe koo ɗume, ngam ɓe halfitinaaɓe kuuje ceniiɗe, ɓe ndoondo ɗe dow balbe maɓɓe.

¹⁰Ardiiɓe ngaddi dokke muuɗum'en ngam waɗugo juulde cenki hirsirde, nyannde Muusa wuji nde nebbam. Ɓe ngaddi ɗe yeeso hirsirde.

¹¹Jawmiraawo wi'i Muusa: “Nyalaade fuu, ardiiɗo gooto tan lii'oto dokke mum ngam juulde cenki hirsirde.”

¹²Ngam maajum ardiiɓe ngaddi dokke muuɗum'en bee tokkindirki bana ni'i: Nyannde arannde, Nahasunu ɓii Amminadabu mo lenyol Yahuuda, nyannde ɗiɗawre, Nataneyel ɓii Cu'ar mo lenyol Issakar, nyannde tataɓre, Eliyabu ɓii Helon mo lenyol Zabulon, nyannde nayaɓre, Elicuru ɓii Sedewur mo lenyol Ruben, nyannde jowaɓre, Selumiyel ɓii Curisadday mo lenyol Simeyon, nyannde joweego'oore, Eliyasaf ɓii De'uwel mo lenyol Gada, nyannde joweeɗiɗawre, Eliisama ɓii Ammihudu mo lenyol Efrayim, nyannde joweetataɓre, Gamaliyel ɓii Pedacuru mo lenyol Manassa, nyannde joweenayaɓre, Abidan ɓii Gidi'oni mo lenyol Benyamin, nyannde sappoore, Ahi'ezer ɓii Ammisadday mo lenyol Dan, nyannde sappo e go'oore, Pagiyel ɓii Okran mo lenyol Aser, nyannde sappo e ɗiɗawre, Ahiira ɓii Enan mo lenyol Neftali. Dokke koo moy maɓɓe poti kal-kal: Taasawo cardi ngo kilo e reeta, taasayel cardi ngel reeta e reetita kilo, fodde etirgal suudu seniindu. Ɗe keewi kuroori ɗiggundi jiiɓaandi bee ne(...)

⁸⁴Kanje ngoni dokke ɗe ardiiɓe Isra'iila lii'i ngam juulde cenki hirsirde fuu: Taasaaje cardi sappo e ɗiɗi, taasahoy cardi sappo e ɗiɗoy, cardi man fuu, baakin kilo noogas e nayi, taasahoy kaŋŋeeri sappo e ɗiɗoy keewkoy uureteeɗum, kaŋŋeeri maakoy fuu, baakin kilo bee reetita fodde etirgal suudu seniindu, ga'i kalhali sappo e ɗiɗi, jawɗi baali sappo e ɗiɗi, njawkoy sappo e ɗiɗoy koy nduuɓu, koy fuu koy guleteekoy, non boo dokke nyaamdu kawtanɗe bee maaji, jawɗi be'i sappo e ɗiɗi, kirseteeɗi ngam ittuki hakkeeji, ga'i kalhali noogas e nayi, jawɗi baali cappanɗe joweego, jawɗi be'i cappanɗe joweego, njawkoy cappanɗe joweego koy nduuɓu, koy fuu koy kirseteekoy ngam kawtal yimɓe bee Allah.

⁸⁹Nde Muusa nasti laymaaru fottirde ngam wolididgo bee Jawmiraawo fuu, o nani sawtu Jawmiraawo haa dow jooɗorde ngam kefergal wonnde dow seedamku alkawal. Jooɗorde ngam kefergal nga'al ɗon hakkunde keruba'en ɗiɗo[5], ton Jawmiraawo woliditta bee maako.