Read Fulfulde Limle 8 Bible Online

Limle 8 - Fulfulde bible

Limle 8

¹Jawmiraawo umri Muusa,

²o wi'a Haruna ni'i: “To a ɗon jo'ina pittirlaaji joweeɗiɗi dow jo'inirɗum maaji, jo'in ɗi haa ɗi njayna yeeso maaji.”

³Haruna waɗi bana non. O jo'ini ɗi haa ɗi njayna yeeso jo'inirɗum maaji bana no Jawmiraawo umrino Muusa.

⁴Jo'inirɗum pittirlaaji kuuwraaɗum bee kaŋŋeeri ɗuuɗndi, diga jooɗorɗum man haa yotti pinndi man fuu. Ɗum baɗaaɗum bee kaŋŋeeri tappaandi, ɓe mbaɗi ɗum fodde misaalu mo Jawmiraawo holli Muusa nder wahayu.

⁵Jawmiraawo wi'i Muusa:

⁶“Senndu Lewi'en bee Isra'iila'en woɗɓe, sen ɓe

⁷bana ni'i: Wiccu ndiyam ittirɗam hakkeeji dow maɓɓe, ɓe laɓa gaasa ɓalli maɓɓe fuu, ɓe loota limce maɓɓe boo, ɓe cena ko'e maɓɓe.

⁸Nden ɓe koo'a ngaari kalhaldi, bee dokkal nyaamdu maari e kuroori njiiɓaandi bee nebbam. An boo, hoo'u ngaari ɗiɗawri kirseteendi ngam ittuki hakkeeji.

⁹Nden ɓaditin Lewi'en yeeso laymaaru fottirde e mooɓtu jama'aare Isra'iila fuu.

¹⁰Ɓaditin Lewi'en yeeso am, Isra'iila'en boo njowa juuɗe muuɗum'en dow ko'e Lewi'en.

¹¹Lewi'en hoo'aaɓe nder Isra'iila'en ɓe'e, Haruna lii'o ɓe yeeso am bana dokkal cenaaŋgal haa ɓe njaggano yam.

¹²Nden Lewi'en njowa juuɗe muuɗum'en dow ko'e ga'i kalhali go. Haruna taaskitina ngoori kirseteendi ngam ittuki hakkeeji, ngoori boo nguleteendi ngam am, ngam haa Lewi'en keɓra yaafuye.

¹³Darnu Lewi'en yeeso Haruna e ɓiɓɓe mum, ɓe laato dokkal cenaaŋgal ngam am.

¹⁴Senndu ɓe bee Isra'iila'en woɗɓe, nii non Lewi'en, min jeyi.

¹⁵Ɓaawo man Lewi'en ngaran, kuuwan nder laymaaru fottirde. Nii non cenirta ɓe, ɓe laatoto dokkal cenaaŋgal ngam am.

¹⁶Ɓe laatanto yam dokkal caka Isra'iila'en. Mi jaɓi ɓe mbattudi afɓe Isra'iila'en fuu, mbattudi kala afo daada mum fuu.

¹⁷Ngam ko aarti danyeego fuu, min jeyi. Nyannde nde mi mbari afɓe fuu nder lesdi Misra, mi seni afɓe Isra'iila'en e afi dabbaaji muuɗum'en ngam am.

¹⁸Jonta mi hoo'i Lewi'en mbattudi afɓe Isra'iila'en.

¹⁹Caka Isra'iila'en, mi hokki Haruna e ɓiɓɓe mum Lewi'en, haa ɓe kuuwana Isra'iila'en nder laymaaru fottirde, ɓe cuklano joɓki hakkeeji Isra'iila'en boo, ngam taa masiibo waɗa caka maɓɓe, to ɓe ɓaditake suudu seniindu.”

²⁰Muusa e Haruna e jama'aare Isra'iila fuu mbaɗani Lewi'en kal-kal bana Jawmiraawo umruno Muusa. Isra'iila'en mbaɗani ɓe ɗum.

²¹Lewi'en laɓɓini ko'e muuɗum'en, looti limce muuɗum'en. Haruna seni ɓe ngam Jawmiraawo, bana dokkal cenaaŋgal. Nden o heɓni ɓe yaafuye, o laɓɓini ɓe.

²²Ɓaawo man Lewi'en puɗɗi huuwugo nder laymaaru fottirde, dow ardaaŋgal Haruna e ɓiɓɓe mum bana Jawmiraawo umruno Muusa dow Lewi'en. Ɓe mbaɗani ɓe non.

²³Jawmiraawo wi'i Muusa:

²⁴“Ndaa umroore dow Lewi'en: To goɗɗo lenyol Lewi waɗi duuɓi noogas e jowi, o fuɗɗa huuwugo nder laymaaru fottirde.

²⁵To o waɗi duuɓi cappanɗe jowi, o wurto kuugal man, o acca ngal.

²⁶O wallan banndiraaɓe maako huuwanɓe nder laymaaru fottirde, ammaa taa o huuwa kuugal man bee hoore maako. Nii non njo'inirta Lewi'en dow kuuɗe maɓɓe.”