Read Fulfulde Limle 9 Bible Online

Limle 9 - Fulfulde bible

Limle 9

¹Nder nduuɓu ɗiɗaɓu ɓaawo gurtaaki Isra'iila'en diga lesdi Misra, nder lewru aranndu, Jawmiraawo wolwani Muusa nder ladde Sina, o wi'i:

²“Sey Isra'iila'en mbaɗa juulde Paska nder saa'iire darnaande.

³Nyannde sappo e nayaɓre nder lewru ndu'u, deydey maŋngariba, mbaɗe juulde nde'e, fodde farillaaji e kiitaaji maare fuu.”

⁴Muusa umri Isra'iila'en ɓe mbaɗa juulde Paska.

⁵Ɓe mbaɗi nde maŋngariba nyannde sappo e nayaɓre nder lewru aranndu haa ladde Sina. Ɓe mbaɗi koo ɗume fuu kal-kal bana Jawmiraawo umruno Muusa.

⁶Ammaa woɗɓe maɓɓe coɓi, ngam ɓe meemi maayɗo. Ngam maajum ɓe keɓaay waɗugo juulde Paska nyalaade nde'e. Ɓe njehi haa Muusa e Haruna nyannde man nden,

⁷ɓe mbi'i: “Min coɓi ngam min meemi maayɗo. Koni min keɓataa hawtugo bee Isra'iila'en ngam min lii'ano Jawmiraawo dokkal hawtaade bee maɓɓe nder saa'iire darnaande?”

⁸Muusa jaabi ɓe: “Munye, ndare haa ɗo haa mi nana ko Jawmiraawo umrata dow haala ka'a.”

⁹Jawmiraawo umri Muusa,

¹⁰o wi'a Isra'iila'en ni'i: “To gooto mooɗon, caka gide mon fuu soɓi ngam o meemi maayɗo malla o dilli jahaaŋgal daayiiŋgal, o waɗan juulde Paska ngam Jawmiraawo,

¹¹nden kam o waɗa nde maŋngariba nyannde sappo e nayaɓre nder lewru ɗiɗaɓru. Sey ɓe nyaama jawgel Paska bee tamseeje ɗe ufnaaka e haakooji kaaɗɗi.

¹²Taa ɓe luttina koo ɗume haa fajiri, taa ɓe ngewa i'al kirsaaŋgel koo ngale boo. Ɓe mbaɗa juulde man fodde umrooje maare fuu.

¹³Ammaa goɗɗo mo soɓaay, mo dillaay jahaaŋgal boo, to o sali waɗugo juulde Paska, o gurtinteeɗo lenyol maako, ngam o lii'anaaki Jawmiraawo dokkal nder saa'iire darnaande. Goɗɗo oo heɓan ngeenaari hakke maako.

¹⁴To jananno jooɗiiɗo caka mooɗon yiɗi waɗugo juulde Paska ngam Jawmiraawo, sey o tokko ko umra e ko darna dow maare. Farilla ngoota tan laatanto jananɓe e ɓiɓɓe lesdi.”

¹⁵Nyannde darnuki jooɗorde Jawmiraawo, ruulde suddi nde gal wakeere laymaaru seedamku. Diga jemma haa fajiri, nde ɗon jooɗi dow maare, nde nanndi bee yiite.

¹⁶Jemma, ruulde man nanndi bee yiite. Tum nde ɗon suddi jooɗorde.

¹⁷Nde ruulde ummi, acci laymaaru fuu, Isra'iila'en boo ummo. Ɓe caŋngina haa nokkuure nde nde jippi fuu boo.

¹⁸Dow umroore Jawmiraawo ɓe ummoto, dow umroore maako boo ɓe caŋnginta. Saa'i ruulde ɗon faɓɓi dow jooɗorde, Isra'iila'en boo ɗon caŋngini.

¹⁹To ruulde ɗon faɓɓi dow jooɗorde, ɓe ɗon ɗowtano Jawmiraawo, ɓe ummataako.

²⁰Saa'i feere ruulde ɗon faɓɓa dow jooɗorde nyalɗe seɗɗa. Ɓe ɗon caŋngina malla ɓe ɗon ummo dow umroore Jawmiraawo.

²¹Saa'i feere ruulde ɗon jooɗo diga kiikiiɗe haa fajiri. To nde eeŋgake fajiri, kamɓe boo ɓe ummo. Koo ɓaawo nyalawmaare woore malla jemmaare woore, to ruulde eeŋgake nii, kamɓe boo ɓe ummo.

²²To nde faɓɓi nyalɗe ɗiɗi malla lewru malla hitaande woore dow jooɗorde man, Isra'iila'en ɗon caŋngini, ɓe ummataako. Ammaa to nde ummake, kamɓe boo ɓe ummo.

²³Dow umroore Jawmiraawo ɓe caŋnginta, dow umroore maako ɓe ummoto boo. Ɓe ɗowtani umroore nde Jawmiraawo umri ɓe bee hunnduko Muusa.