Read Fulfulde Mika 2 Bible Online

Mika 2 - Fulfulde bible

Mika 2

¹Bone laatanto nufotooɓe kalluɗum, taaskitinanɓe sarru diga dow be'itte muuɗum'en! Subaha ɓe puɗɗata hiɓɓingo ɗum, ngam ɓe mari baawɗe waɗugo ɗum.

²To ɓe cuunaama gese, ɓe njaɓta ɗe, to ɓe cuunaama cuuɗi boo, ɓe koo'a ɗi. Ɓe ɗon toonyo goɗɗo e saare muuɗum, goɗɗo e mardi muuɗum.

³Ngam maajum, ndaa nii Jawmiraawo wi'i: “Mi annini ukkugo sarru dow mooɗon. On mbaawataa daɗugo ngu. On mawnitittaako, ngam ɗum saa'iire sarru.

⁴Saa'i man ɓe njancan on, ɓe ngiman gimol boyki bana ni'i: Jinni! En nattinaama! Ɓe njaɓti maral ummaatoore am! Noy ɓe njaɓtiri ngal diga am! Ɓe cenndani tuurtooɓe gese men!”

⁵Ngam maajum a heɓataa koo goɗɗo ngam foondango ma geɗal lesdi nder jama'aare Jawmiraawo.

⁶Yimɓe ɗon mbaɗa haraka, ɗon mbi'ammi: “Accu wolwugo ɗuuɗɗum bana nii! Taa goɗɗo wi'a toskaare nde'e heɓan en fahin!”

⁷Nii mbi'ɗon na yimɓe Yaakubu? Munyal Jawmiraawo rammi na? Nii non kuuɗe maako mba'i na? Bolle am laataaki booɗɗe haa adili'en na?

⁸Jawmiraawo wi'i: “Onon on laatakeno konne'en ummaatoore am. To yimɓe ɗon ngarta konu, ɗon koota jam, on njaɓti ɓe alkibbaaje maɓɓe.

⁹On ɗon ndiiwa rewɓe ummaatoore am diga calaaje muuɗum'en ɗe ɓe ngiɗi, on ɗon ittana ɓikkoy maɓɓe tedduŋgal ngal mi hokki koy haa foroy,

¹⁰on ɗon mbi'a: Umme, ndille! Ngam nokkuure nde'e laataaki pellel siwtaago. Daliila coɓki maare on njaran boneeji naawɗi.”

¹¹To goɗɗo tokkake henndu, hasi fewre, wi'i: Mi waɗante annabaaku dow inaboojam e dow njaramji guykinooji, fakat o laatoto annabiijo ummaatoore nde'e!

¹²Jawmiraawo wi'i: “Onon danygol Yaakubu fuu, fakat mi mooɓtan luttuɓe Isra'iila. Mi hawtan on bana baali nder waalde, bana tokkere haa durdude, yimɓe mooɓre nde'e mbaɗan haraka makka.”

¹³Ceekoowo laawol ardoto ɓe, ɓe mbaɗan ceekli, ɓe caalo gal dammuɗe, ɓe ngurto yaasi. Jawmiraawo, laamiiɗo maɓɓe, ardoto ɓe, ɗowan ɓe.