Read Fulfulde Mika 7 Bible Online

Mika 7 - Fulfulde bible

Mika 7

¹Kayto! Mi ɗon bana goɗɗo jahanɗo teɓugo ɓiɓɓe leɗɗe saa'i ittugo ko lutti haa gese inabooje wakkati teɓki: Walaa inaboore haa mi nyaama sam! Walaa ibbere aartunde nde ɓernde am yenwata!

²Hoolaaɓe ngalaa nder lesdi, walaa gooŋɗuɓe caka yimɓe. Ɓe fuu ɓe ɗon mbaalto ngam rufugo ƴiiƴam, koo moy maɓɓe ɗon looho deerɗum bee tuuforgol.

³Juuɗe maɓɓe anndi waɗugo kalluɗum masin. Ardiiɓe e hiitooɓe ɗon ƴama dokke, mawɓe ɗon mbaŋgina suuno muuɗum'en.

⁴Wooɗa-gikkuujo caka maɓɓe nanndi bee wumre gi'e. Gooŋɗuɗo maɓɓe ɓuri wumre gi'e hallugo. Nyalaade kiita nde aynooɓe mon mbi'no on ɗon wara. Nden kam saklere hoo'an on.

⁵Taa nuɗɗin soobaajo ma, taa hoola boowraaɗo ma! Aynu hunnduko ma koo yeeso debbo ma giɗaaɗo.

⁶Ngam ɓiɗɗo gorko yawoto baaba mum, ɓiɗɗo debbo ummanto daada mum, debbo boo ummanto esum debbo. Yimɓe saare goɗɗo laatoto wanywanyɓe mum.

⁷Ammaa min, gal Jawmiraawo mi tiitoto, mi ɗon tammoro Allah mo hisnatam, Allah am nanatam.

⁸An konneejo am, taa seyora do'ere am! Ngam koo to mi do'ake, mi ummoto! Koo to mi ɗon jooɗi nder nyiɓre, Jawmiraawo woni annoora am!

⁹Sey mi ɓusa tikkere Jawmiraawo, ngam mi waɗi hakke dow maako, haa to o jiŋngi yam, o tabitini gooŋga am. O wurtintam haa annoora ngam mi laara adilaaku maako.

¹⁰Konneejo am yi'an ɗum, semtan, kaŋko bi'nooɗo yam: “Toy Jawmiraawo Allah maaɗa?” Gite am ndaaran konneejo am, saa'i ɓe njaaɓata mo bana ɓe njaaɓirta loope dow laawol.

¹¹An Urusaliima, nyalaade nyiɓtuki mahi ma waran, nyannde man keeri ma njaajan.

¹²Nyalaade man yimɓe ngaran haa maaɗa diga Assuura e diga berniiji Misra, diga Misra haa yotti maayo Efratis, diga mbeela nga'a haa ngaya, diga hooseere nde'e haa ndeya.

¹³Ammaa duniyaaru laatoto winnde daliila jooɗiiɓe nder maaru e daliila ngeenaari halleende maɓɓe.

¹⁴Yaa Jawmiraawo, aynu ummaatoore ma bee sawru ma, ɗum tokkere ma, an mari nde. Ngam nde ɗon feere maare nder laynde haa caka gese booɗɗe. Duru nde bana ɓooyma haa Baasan e Gile'at.

¹⁵Jawmiraawo wi'i: “Bana nder nyalɗe gurtaaki ma diga Misra, mi yi'nan nde kuuje kayɗiniiɗe.”

¹⁶Ummaatooje goɗɗe ngi'an ɗum, ɗe cemta bee baawɗe maaje fuu. Kunnduɗe maaje maɓɓoto, noppi maaje pahɗan.

¹⁷Ɗe tahan mbulwuldi bana mboodi, bana ladooji. Ɗe ngurtoto cuuɗi maaje cemmbiɗɗi bee diwnugo yeeso Jawmiraawo Allah men. Ɗe maatan kulol e ɓe kulete.

¹⁸Moy ɗowanteeɗo nanndi bee maaɗa[18]? A yaafoto aybe, a falataa tuurtol yimɓe maaɗa luttuɓe. Tikkere maaɗa duurataa haa foroy ngam a yerdi woonango min.

¹⁹A hinnoto min fahin, a damman aybeeji amin les kosɗe maaɗa, a wudinan hakkeeji amin haa lugguɗum mbeela.

²⁰A waŋginanan Yaakubu gooŋgaaku e danygol Ibrahiima boo hoolaare, bana no kunaniiɗa kaakiraaɓe amin nder zamanu ɓooyma!