Read Fulfulde Habakuk 1 Bible Online

Habakuk 1 - Fulfulde bible

Habakuk 1

¹Ɗo woni koŋngol ngol Jawmiraawo wolwani annabi Habakuk nder wahayu mum.

²Yaa Jawmiraawo, duuri mi ɗon toro ma ballal, ammaa a jaabaaki yam. Foroy mi ɗon wooka: Ndaa toonyaare! Ammaa a hisnaay min.

³Ngam ɗume a yi'natammi halleende yimɓe? Ngam ɗume a ɗon laara torraaji amin, ammaa a wallaay min: Jaɓtol e toonyaare ɗon yeeso am, jokkirgol waɗi, gaabotiral ɗon ummo.

⁴Ngam man tawreeta ɗowtanaaka, gooŋgaaku boo waŋgaay sam. Halluɓe ɗon ɓilla adili'en, ngam man kiita gooŋgaaha laati fewre.

⁵Jawmiraawo wi'i: “Ndaare caka ummaatooje, ngi'e. Kayɗine masin, ngam mi huuwan kuugal nder balɗe mooɗon. To goɗɗo yecci on habaru maajum, on nuɗɗintaa.

⁶Ndaa, mi umminan Kaldiya'en ummaatoore nde walaa enɗam e munyal sam, nde ɗon waanca duniyaaru yaasndu ndu'u fuu ngam nyaamugo jooɗorɗe ɗe nde maraay.

⁷Ɓe kuleteeɓe e ruggotooɓe. Kamɓe ndarnata baawɗe maɓɓe e ko haandani ɓe.

⁸Pucci maɓɓe ɓuri paaɗaaji yaawugo, ɗi ɓuri caafaali ladde baawal. Wa'iiɓe pucci ɗon camna, ɗon ngara diga daayiiɗum, ɗon piira bana dutal jaawɗotooŋgal dow ko ngal yiɗi naŋngugo.

⁹Yimɓe ummaatoore nde fuu ɗon ngara ngam toonyaago. Geese maɓɓe fuu ɗon tiito yeeso. Ɓe ɗon mooɓta dahaaɓe[1] ɗuuɗɓe bana njaareendi.

¹⁰Ɓe ɗon njanca laamiiɓe, ɓe ɗon pijira mawɓe, ɓe ɗon njala koo berniwol cemmbiɗŋgol ngole, ɓe mbaagan lesdi ɗakki mahol maagol, nden ɓe nyaaman ngol.

¹¹Ɓaawo man ɓe tokkoto yeeso bana henndu, ɓe ndilla. Bana non ɓe aybini ko'e maɓɓe, semmbe maɓɓe laati ɗowanteeɗo maɓɓe.”

¹²Yaa Jawmiraawo, naa an woni Allah am, Ceniiɗo am diga ɓooyma? An a maayataa! Yaa Jawmiraawo, a jo'ini yimɓe ɓe'e ngam hiitaago min. An tapaare hisnoore amin, a tabitini ɓe ngam ɓe ndartina min.

¹³Gite ma ngi'ataa halleende, ngam ɗe ceniiɗe, a yiɗaa laarugo toonyaare. Ammaa ngam ɗume a munyanta zammbotooɓe? Ngam ɗume a ɗon jeeɗo to kalluɗo ɗon moɗa ɓurduɗo ɗum adilaaku?

¹⁴A ɗon nanndina ɓiɓɓe Aadama bee liɗɗi nder mbeela, bee ladooji ɗi ngalaa ardiiɗo.

¹⁵Kaldiya'en ɓe'e ɗon naŋnga yimɓe ɓe'e fuu bee kunayel, ɗon ndasa ɓe nder zubaawol, ɗon mooɓta ɓe nder arewal. Nden ɓe ɗon ceyo, ɓe ɗon mbelmbelta.

¹⁶Ɓe ɗon lii'ano zubaawol kirseteeɗi, ɓe ɗon ngula uurle ngam arewal, ngam ɗum keɓni ɓe geɗal ɗuuɗŋgal e nyaamdu welndu.

¹⁷Ngam man ɓe njuppata zubaaji maɓɓe, ɓe tokkitina mbargo ummaatooje goɗɗe bilaa enɗam na?