Read Fulfulde Habakuk 2 Bible Online

Habakuk 2 - Fulfulde bible

Habakuk 2

¹Sey mi wa'o haa nokkuure aynirde am, mi daro dow mahol ngam aynugo berniwol e anndugo ko Jawmiraawo wi'atammi e no o jaaborto siŋkuye am.

²Jawmiraawo jaabi yam, wi'i: “Winndu wahayu mo ngi'ɗa. Winndu ɗum dow alluhaaje, haa ɗum jaŋnge bee koyɗum.

³Wahayu man hiɓɓan to saa'i man yottake, ammaa ɗum ɗon yaawana timmoode, ɗum walaa fewre. To ɗum neeɓi, a munyana ɗum. Ngam ɗum laatoto fakat, ɗum neeɓataa sam.

⁴Ɓernde cooyɗo adilaaku ɗon mawnito, ammaa adiliijo yeeɗiran bee nuɗɗinki muuɗum.”

⁵Fakat risku[2] zammboto, goɗɗo mawnitiiɗo de'ataa. O ɗon maɓɓita kondondol maako bana joonde maayɓe, bana waade o haarataa. O mooɓti ummaatooje fuu haa maako, o hawti jama'aaje fuu les laamu maako.

⁶Yimɓe ɓe'e fuu taaliran mo, ɓe njancan mo bee balndi e annditanamji, ɓe mbi'an: “Bone laatanto ɗuɗɗinanɗo risku mum bee kuuje ɗe o maraay. Ndey o accata yowango yimɓe doŋngal nyamaale?”

⁷Law ɓe tokkiiɗa nyamaande ummoto, ɓillooɓe ma pinan. A laatoto keɓal konu maɓɓe.

⁸Ngam an, a hippi ummaatooje ɗuuɗɗe, an boo ummaatooje luttuɗe fuu kippete, ngam a rufi ƴiiƴam yimɓe e a wonni lesdi e a toonyi berniwol e jooɗiiɓe nder maagol fuu.

⁹Bone laatanto ɗaɓɓitanɗo riba kalluka ngam saare muuɗum, jo'inanɗo saɓɓo mum towɗum, ngam taa sarru heɓa ɗum.

¹⁰Bee dabareeji ma a fooɗani saare ma toskaare, a waɗi hakke dow hoore ma bee nattingo ummaatooje ɗuuɗɗe.

¹¹Koo hayre nder mahol boo ɗon wooka dow maaɗa, bilorgol boo ɗon waɗa non.

¹²Bone laatanto nyiɓanɗo wuro dow ƴiiƴam, jo'inanɗo berniwol dow caɓɓawal bee sooynde adilaaku muuɗum.

¹³Kadi, kanjum ɗum iwaay haa Jawmiraawo honooɓe asama na? Nafuuda torra jama'aaje halkan nder yiite, ummaatooje goɗɗe boo ɗon coma meere.

¹⁴Ngam duniyaaru heewan anndal tedduŋgal Jawmiraawo, bana ndiyam heewri mbeela.

¹⁵Bone laatanto jarnanɗo keeddiɗɗum'en, nyaɗinanɗo njaram muuɗum bana tooke ngam wuykingo ɓe, haa o laara temmbuki maɓɓe.

¹⁶A haari bee toskaare, naa bee tedduŋgal. Sey a yara, an boo, a waŋgina saadooniiku ma. Jardugel tikkere nder juŋngo nyaamo Jawmiraawo loroto dow hoore maaɗa, tedduŋgal maaɗa laatoto toskaare mawnde.

¹⁷Ngam toonyaare nde a toonyiri Libanon, loroto dow hoore ma, hippete. A halki dabbaaji goɗɗi, goɗɗi boo kulnete ngam a rufi ƴiiƴam yimɓe, a wonni lesdi e a toonyi berniwol e jooɗiiɓe nder maagol fuu.

¹⁸Ɗume suura nafata haa cehoowo seha ka? Ɗume suura njamndi ɓolinaandi ngam ekkitingo fewre nafata? Ngam ɗume goɗɗo waɗata hoolaare mum haa labbi ɗi mbolwataa nde nii kaŋko waɗi ɗi bee juuɗe maako?

¹⁹Bone laatanto bi'anɗo leggal: “Fin!” Malla hayre muukaare: “Umma!” Lawru waawi ekkitingo na? Yaasi maaru takkaama bee kaŋŋeeri e cardi, ammaa ngeendam walaa nder maaru koo seɗɗa.

²⁰Ammaa Jawmiraawo ɗon nder haykaliiru mum seniindu. Sey duniyaaru fuu sirwo yeeso maako.