Read Fulfulde Haggay 2 Bible Online

Haggay 2 - Fulfulde bible

Haggay 2

¹Nder lewru joweeɗiɗaɓru, nyannde noogas e go'oore maaru, Jawmiraawo wolwani annabi Haggay:

²“Wolwan Zorobaabila ɓii Salatiyel, ngomna dow Yahuuda e Yosuwa ɓii Yocadak, hooreejo liman'en e yimɓe luttuɓe nder ummaatoore fuu, yeccu ɓe:

³Moy caka mooɗon onon luttuɓe yi'nooɓe tedduŋgal haykaliiru naane? E noy ndaarɗon ndu jonta? Naa ndu laati bana huunde meere haa gite mooɗon na?

⁴Jawmiraawo wi'i: An Zorobaabila, sey a semmbiɗa jonta. An boo, Yosuwa ɓii Yocadak hooreejo liman'en, sey a semmbiɗa. Onon yimɓe lesdi fuu, sey on cemmbiɗa. Jawmiraawo honooɓe asama wi'i: Kuuwe, ngam mi ɗon wondi bee mooɗon,

⁵fodde alkawal ngal kaɓɓumi bee kaakiraaɓe mooɗon, saa'i ɓe ngurti Misra. Jonta boo, Ruuhu am ɗon caka mooɗon, taa kule!

⁶Ngam ndaa nii Jawmiraawo honooɓe asama wi'i: Nii seɗɗa mi dimmban asamanji e lesdi, mbeela e lesdi njoorndi.

⁷Mi dimmban ummaatooje fuu, nden kuuje maaje marɗe saman ngaran haa ɗo. Jawmiraawo honooɓe asama wi'i: Mi hebbinan haykaliiru ndu'u bee tedduŋgal.

⁸Cardi e kaŋŋeeri, min jeyi. Non Jawmiraawo honooɓe asama wi'i.

⁹Tedduŋgal haykaliiru ɗiɗawru ndu'u ɓuran ngal aranndu. Mi jo'inan salaaman e hayru haa nokkuure nde'e”, non Jawmiraawo honooɓe asama wi'i.

¹⁰Nder nduuɓu Dariyus ɗiɗaɓu, lewru joweenayaɓru, nyannde noogas e nayaɓre, Jawmiraawo wolwani annabi Haggay.

¹¹Ndaa nii Jawmiraawo honooɓe asama wi'i: “Ƴam liman'en ko ɓe anndi dow haala ka'a:

¹²To goɗɗo saawi kusel cenaaŋgel nder gawargal limce muuɗum, nden limce man meemi tamseere, koo nyaamdu defaandu, koo inaboojam, koo nebbam, koo nyaamdu woondu, ɗum senoto na?” Liman'en njaabi: “Aa'a!”

¹³Haggay tokki ƴamugo: “To goɗɗo soɓi bee meemugo maayɗo, nden meemi woore nder kuuje ɗe'e, nde soɓan na?” Liman'en njaabi: “Nde soɓan.”

¹⁴Nden Haggay wi'i: “Jawmiraawo wi'i: Bana non yimɓe ummaatoore nde'e laatori yeeso am, bana non kuugal juuɗe maɓɓe fuu wa'i. Ko ɓe lii'anto yam ton fuu, soɓi.

¹⁵Ammaa jonta, kakkilane ko waɗete diga hannde yahugo yeeso. Hiddeko on mballina hayre dow hayre haa haykaliiru Jawmiraawo,

¹⁶nde goɗɗo wari haa waagaare nde o tammoto muudooje noogas, sappo tan o tawi. Nde goɗɗo wari haa ɓiɗɗirde inaboojam ngam nyeɗugo bulki cappanɗe jowi, noogas tan o tawi.

¹⁷Mi nattini nafuuda kuuɗe juuɗe mon fuu, mi yoorni alkamaaje mon, mi wonni kuuje mon bee nyawuji e mallimallooje, ammaa on lortaaki haa am, non Jawmiraawo wi'i:

¹⁸Kakkilane ko waɗete diga hannde yahugo yeeso, waato diga nyannde noogas e nayaɓre nder lewru joweenayaɓru, nde on mballini caɓɓawal haykaliiru Jawmiraawo, kakkilane ɗu'um:

¹⁹Aawdi jinni haa beembal na? Inabohi e ibbi e rummaanoohi e jaytunhi ndimaay na? Ammaa diga hannde puɗɗanmi barkiɗingo on.”

²⁰Fahin Jawmiraawo wolwani Haggay nder nyannde noogas e nayaɓre lewru man, o wi'i:

²¹“Wolwan Zorobaabila, ngomna dow Yahuuda, yeccu mo: Mi dimmban asamanji e lesdi,

²²mi yibbinan leese laamuuji, mi halkan baawɗe laamuuji ummaatooje, mi do'an mootaaji pucci e wa'iiɓe ɗi. Wa'iiɓe pucci mbarmbartiran bee kaafahi, ɓe ndo'oto bee pucci maɓɓe.

²³Jawmiraawo honooɓe asama wi'i: Nyalaade man mi hoo'ete, an Zorobaabila ɓii Salatiyel, jaggiiɗo am, mi laatinte bana haatummeere am, ngam an woni cuɓaaɗo am.” Non Jawmiraawo honooɓe asama wi'i.